မန္တလေးတိုင်းဒေသကြီး၊ မြင်းခြံမြို့နဲ့ ၅ မိုင်ခန့်ကွာဝေးတဲ့ တလုပ်မြို့ထဲက မြို့မကျေးရွာထဲကို အကြမ်းဖက်စစ်ကောင်စီရဲ့တပ်တွေက ညနေ ၅နာရီလောက်မှာ စစ်ကား ၈ စီးလောက်နဲ့ အင်အားသုံးဝင်ရောက်ခဲ့ပါတယ်။
မြို့မကျေးရွာအဝင်ဝမှာ အရင်တည်းက ကာရံထားတဲ့ တံခါးနှစ်ခုရှိပြီး အကြမ်းဖက်စစ်တပ်က အင်အားသုံးဝင်ပေမယ့် ပထမ တံခါးကိုသာဖြတ်လို့ရခဲ့ပါတယ်။
ဒုတိယ တံခါးကိုဖျက်ပြီးအဝင်မှာ ရွာသားတွေဘက်ကပြန်ခုခံတာကြောင့် စစ်တပ်ဘက်ကပြန်ဆုတ်ခဲ့ပြီး ရွာအဝင်ဝက နေအိမ်တချို့ကို ဝင်ရောက်မွှေနှောက်ခဲ့ပြီး ပစ္စည်းတွေကိုယူဆောင်သွားတယ်လို့သိရပါတယ်။
အဲ့လိုပြန်အဆုတ်မှာ မဲမဲမြင်ရာပစ်ခတ်သွားပြီးတော့ လမ်းမှာတွေ့တဲ့ လူ ၅ ယောက်ကို အကြမ်းဖက်စစ်တပ်က ခေါ်ဆောင်သွားပါတယ်။
ဒါပေမယ့် ဘယ်သူ၊ ဘယ်ဝါပါသွားတယ်ဆိုတာကိုမသိရဘဲ၊ နှစ်ဘက်အထိအခိုက်စရင်းကိုလည်း မသိရသေးပါဘူး။
နောက်ဆက်တွဲအနေနဲ့ကတော့ တလုပ်မြို့ထဲက မြို့မကျေးရွာမှာရှိတဲ့ အသက်အရွယ်ကြီးရင့်သူတွေ၊ အမျိုးသမီးတွေနဲ့ ကလေးသူငယ်အနည်းဆုံး ဦးရေ ၁၀၀ လောက် ညတွင်းချင်းပဲ ရွာကနေထွက်ခွာပြီး တိန်းရှောင်နေရပါပြီ။
ဒါပေမယ့် ဘာအကြောင်းကြောင့် ဒီလိုဝင်ရောက်လာတယ်ဆိုတာကိုတော့ မဇ္ဈိမက အတည်မပြုနိုင်တာကြောင့် ဆက်လက်စုံစမ်းနေပါတယ်။
