ဒီဇင်ဘာ ၂၅
၂၀၀၂ ခုနှစ်က ကရာချိမြို့မှာ ပြန်ပေးဆွဲခံရပြီး ခေါင်းဖြတ်သတ်ခံခဲ့ရတဲ့ အမေရိကန်ဂျာနယ်လစ် ဒန်နီယယ်ပါးလ်အား သတ်ဖြတ်မှုအတွက် စီရင်ချက်ချခံထားရတဲ့ ဗြိတိန်ဖွား စစ်သွေးကြွတစ်ဦးကို ပြန်လွှတ်ပေးဖို့ ပါကစ္စတန်တရားရုံးတစ်ခုက ဒီဇင်ဘာ ၂၄ ရက်မှာ အမိန့်ထုတ်ပြန်လိုက်ပါတယ်။
ဒန်နီယယ်ပါးလ် အသတ်ခံရမှုရဲ့ နောက်ကွယ်က ကြိုးကိုင်သူအဖြစ် စီရင်ချက်ချခံခဲ့ရတဲ့ အာမက်ဒ် အိုမာ ဆာအိ ရှိတ်ခ်ကို လူသတ်မှုအတွက် ပြစ်ဒဏ်စီရင်မှုနဲ့ သေဒဏ် ပြစ်ဒဏ်တို့ကို ပယ်ဖျက်ပေးမှုအတွက် နာကြည်းဒေါသထွက်မှုတွေ ဖြစ်စေခဲ့သလို အမှုနဲ့ ဆက်နွယ်တဲ့ အခြားအမျိုးသားသုံးဦးကို တရားသေလွှတ်ပေးခဲ့ပြီးနောက် လများအကြာမှာပဲ ဆင်း ပြည်နယ် ဗဟိုတရားရုံးရဲ့ ယခု ဆုံးဖြတ်ချက် ထွက်ပေါ်လာတာဖြစ်ပါတယ်။
တရားသေလွှတ်မှုတွေအပေါ် ဆန့်ကျင်တဲ့ အယူခံဝင်မှုတစ်ရပ်က လက်ရှိအချိန်မှာ ပါကစ္စတန်ရဲ့ အမြင့်ဆုံး တရားရုံးချုပ်မှာ ဆက်ရှိနေဆဲဖြစ်ပြီး ယင်းက ၎င်းတို့ လွတ်မြောက်မှုကို ထိထိရောက်ရောက် တားဆီးနိုင်ခဲ့ပါတယ်။ ဒါပေမယ့် တရားခံရှေ့နေတွေကတော့ ၎င်းတို့ရဲ့ အမှုသည်တွေ နိုင်ငံတောင်ပိုင်းမှာ ဆက်လက်ထိန်းသိမ်းခံထားရတဲ့အပေါ် ကန့်ကွက်ခဲ့ကြပါတယ်။
“သူတို့ကို လွတ်မြောက်ခွင့် မပေးဘဲထားဖို့အတွက် ကျိုးကြောင်ခိုင်လုံတဲ့ အကြောင်းပြချက် မရှိဘူးဆိုတာကို တရားရုံးက စစ်ဆေးတွေ့ရှိထားခဲ့ပါတယ်” လို့ ရှိတ်နဲ့ ပူးတွဲတရားခံတွေကို ကိုယ်စားပြုတဲ့ ရှေ့နေ မာမွတ် ရှိတ်က ပြောပါတယ်။
“လွတ်ငြိမ်းမှုက ဒီနေ့မှာ ဖြစ်ကောင်းဖြစ်နိုင်ပါတယ်၊ အဲလိုမှ မဟုတ်ရင်လည်း နောက်ထပ် ၂၄ နာရီအတွင်း ဖြစ်ပါလိမ့်မယ်၊ သူတို့ကို လွှတ်မြောက်စေမှုအတွက် ဥပဒေ အဟန့်အတား ဘာမှ မရှိပါဘူး” လို့ ၎င်းက ဖြည့်စွက်ပြောပါတယ်။
“ဤအမိန့် လက်ခံရရှိတာနဲ့ ချက်ချင်းပဲ လေးဦးစလုံးကို လွှတ်ပေးရမှာဖြစ်တယ်” လို့ တရားရုံးက ဒီဇင်ဘာ ၂၄ ရက်မှာ ထုတ်ပြန်တဲ့ လက်ရေးအမိန့်တစ်ခုထဲမှာ ပြောထားခဲ့ပါတယ်။
လန်ဒန် စီးပွားရေးကျောင်းမှာ ပညာသင်ယူခဲ့ဖူးပြီး နိုင်ငံခြားသားတွေကို ပြန်ပေးဆွဲတဲ့ ရာဇဝင် ရှိထားခဲ့တဲ့ သမ္ဘာရင့် ဂျီဟတ်ဒစ်တစ်ဦးဖြစ်တဲ့ အာမက်ဒ် အိုမာ ဆာအိ ရှိတ်ခ်ဟာ ပါးလ် ပြန်ပေးဆွဲခံရပြီးနောက်ပိုင်း ရက်တွေအကြာမှာ ဖမ်းဆီးခံရပြီး ယင်းနောက် ကြိုးပေးသတ်ဖို့ သေဒဏ်ပြစ်ဒဏ်ချမှတ်ခံခဲ့ရတာဖြစ်ပါတယ်။
ပါးလ် သေဆုံးမှုအပေါ် စုံစမ်းစစ်ဆေးမှုတစ်ခု လုပ်ဆောင်ပြီးနောက်ပိုင်း ၂၀၁၁ ခုနှစ် ဇန်နဝါရီလမှာတော့ ဂျော့ဂျ်တောင်း တက္ကသိုလ်မှာ ပါးလ် ပရောဂျက်က ထုတ်ပြန်ခဲ့တဲ့ အစီရင်ခံစာတစ်စောင်က ကျောချမ်းဖွယ် ဖွင့်ဟချက်တွေ ထွက်ပေါ်စေခဲ့ပြီး ပါးလ် အသတ်ခံရမှုအတွက် စီရင်ချက်ချမှတ်ခံထားရသူတွေဟာ လူမှားပြီး ချမှတ်ခံထားရသူတွေဖြစ်တယ်လို့ ထုတ်ဖော်ခဲ့ပါတယ်။
ပါးလ်ရဲ့ သူငယ်ချင်းဖြစ်ပြီး ဝေါလ်စထရိ ဂျာနယ်က လုပ်ဖော်ကိုင်ဘက်လည်းဖြစ်တဲ့ အက်စ်ရာ နိုမာနီနဲ့ ဂျော့ဂျ်တောင်း တက္ကသိုလ် ပါမောက္ခတစ်ဦးတို့ ဦးဆောင်တဲ့ စုံစမ်းစစ်ဆေးမှုတစ်ခုမှာတော့ ဂျာနယ်လစ် ပါးလ်ကို သတ်သူဟာ အာမက်ဒ် အိုမာ ဆာအိ ရှိတ်ခ် မဟုတ်ဘဲ ၂၀၀၁ စက်တင်ဘာ ၁၁ တိုက်ခိုက်မှုတွေကို ကြိုးကိုင်ခဲ့သူလို့ ဆိုတဲ့ ခါလစ်ဒ် ရှိတ် မိုဟာမက် ဖြစ်တယ်လို့ ထုတ်ဖော်ခဲ့ပါတယ်။
ပါးလ်ကတော့ ဝေါလ်စထရိ ဂျာနယ်ရဲ့ တောင်အာရှ ဗျူရို အကြီးအကဲဖြစ်ခဲ့ပြီး ၎င်းဟာ အစ္စလမ္မစ် စစ်သွေးကြတွေနဲ့ပတ်သက်ပြီး စတိုရီတစ်ခု သုတေသနလုပ်နေခဲ့ချိန် ၂၀၀၂ ဇန်နဝါရီမှာ ပြန်ပေးဆွဲခံခဲ့ရတာဖြစ်ပါတယ်။
ယင်းနောက် တစ်လနီးပါးအကြာမှာ ၎င်း ခေါင်းဖြတ်သတ်ခံရတာကို ပြထားတဲ့ ကွက်ကွက်ကွင်းကွင်း ရှိလှတဲ့ ဗီဒီယိုတစ်ခုကို အမေရိကန် ကောင်စစ်ဝန်ရုံးကို ပေးပို့ခဲ့ပါတယ်။
ပါးလ် အသတ်ခံရမှုနဲ့ပတ်သက်လို့ ပါကစ္စတန် စစ်အစိုးရအပေါ် နိုင်ငံတကာ ဝေဖန်ပြစ်တင်မှုတွေ ရှိခဲ့ပြီး အဲဒီအချိန်တုန်းက ပါကစ္စတန် စစ်အစိုးရဟာ အိမ်နီးချင်း အာဖဂန်နစ္စတန်က တာလီဘန်တွေကို နှစ်များစွာ ထောက်ခံခဲ့ပြီးနောက် ယင်းရဲ့ ပုံရိပ်ကို ပြန်လည်တည်ဆောက်နေခဲ့တာဖြစ်ပါတယ်။
