စက်တင်ဘာလ ၂၁၊ ၂၀၂၀
COVID-19 ဒုတိယလှိုင်းကြောင့် ကူးစက်မှု၊ ထိတွေ့မှုများ လျှော့ချနိုင်ရန် ပြည်တွင်း ပုဂ္ဂိလကဘဏ် အများစုက ဘဏ်ခွဲအချို့ကို ပိတ်ထားကြောင်း သိရသည်။
ဘဏ်ခွဲများကို ခေတ္တပိတ်မည်ဆိုပါက ဗဟိုဘဏ်ကို တင်ပြရမည်ဖြစ်ပြီး ငွေကြေးလည်ပတ် စီးစင်းမှုကိုလည်း မထိခိုက်စေရန် အစီအမံများ ဆောင်ရွက်ထားကြောင်း ဘဏ်လုပ်ငန်း ကြီးကြပ်စစ်ဆေးရေးဌာန ညွှန်ကြားရေးမှူးချုပ် ဒေါ်သန်းသန်းဆွေက ပြောသည်။
“ဗဟိုဘဏ်မှာလေ ဘယ်ဘဏ်တွေ ပိတ်တယ်၊ ဘယ်လိုတွေရှိတယ်၊ တရားဝင်ဇယားကြီး ကျွန်မတို့မှာ အများကြီးရှိတယ်။ ဘဏ်တိုင်းက တော်တော်များများ ပိတ်ပါတယ်။ တချို့ဟာတွေ၊ မလိုအပ်တဲ့နေရာတွေ” ဟု ညွှန်ကြားရေးမှူးချုပ် ဒေါ်သန်းသန်းဆွေက မဇ္ဈိမသို့ ပြောသည်။
အကယ်၍ နယ်ဘဏ်ခွဲများတွင် အခက်အခဲရှိခဲ့လျှင် မြန်မာ့စီးပွားရေးဘဏ်များနှင့် ဆက်သွယ် ဆောင်ရွက်နိုင်ခြင်းကြောင့် ငွေကြေးအခက်အခဲလည်း ဖြစ်မည်မဟုတ်ကြောင်း သူမက ရှင်းပြသည်။
ပြည်တွင်းဘဏ်များထဲတွင် ဘဏ်ကြီးတစ်ခုဖြစ်သည့် ဧရာဝတီဘဏ်က ဘဏ်ခွဲပေါင်း ၂၀၀ ကျော် ရှိသည့်အနက် ရန်ကုန်မြို့ထဲမှ ဘဏ်ခွဲ ၄၃ ဘဏ်ကို ခေတ္တပိတ်ကြောင်း တရားဝင်ကြေညာထားသည်။
“ဆေးဝါးလုပ်ငန်းတို့လိုပဲ ကျွန်တော်တို့က လုံးဝ ပိတ်လို့လည်း မရဘူးပေါ့။ လောလောဆယ် ကာလမှာ ဘဏ်ဝန်ထမ်းတွေက ဆောင်ရွက်နေရတဲ့ ကာလလည်းဖြစ်နေတော့ အဓိကတော့ ထိတွေ့မှု အနည်းဆုံးဖြစ်အောင် လူလည်းလျှော့သလို မြို့နယ်ထဲမှာလည်း တူနေတဲ့ဘဏ်တွေကို လျှော့ချချင်တဲ့ ရည်ရွယ်ချက်ပါ” ဟု ဧရာဝတီဘဏ်၏ သတင်းပြန်ကြားရေး ကော်မတီအဖွဲ့ဝင် ဦးကျော်ဇောဟန်က ပြောသည်။
ဧရာဝတီဘဏ်အနေဖြင့် မြို့နယ်တစ်ခုတည်းတွင် ဘဏ်ခွဲ နှစ်ခု၊ သုံးခု ရှိနေခြင်းကြောင့် ထိတွေ့မှု လျော့စေရန် ဤသို့ ပြုလုပ်ရခြင်းဖြစ်ကြောင်း သိရသည်။ ဘဏ်ခွဲတိုင်းတွင် ATM ငွေထုတ်စက်ကို ငွေအမြဲဖြည့်ပေးထားမည် ဖြစ်ပြီး ဘဏ်ကို လာရောက်သည့် ဖောက်သည်များကိုလည်း ခြောက်ပေစီခြားစေပြီး ဝန်ဆောင်မှုပေးမည်ဟု ဦးကျော်ဇောဟန်က ပြောသည်။
ကမ္ဘာ့ရတနာဘဏ် (GTB) ကလည်း အရေးမကြီးသော ဘဏ်ခွဲအချို့ကို ပိတ်ထားပြီး ဝန်ထမ်း ၃၀ ရာခိုင်နှုန်းကို နေအိမ်တွင် နေစေကြောင်း သိရသည်။
GTB ဘဏ် မန်နေးဂျင်းဒါရိုက်တာ ဒေါက်တာ လှညွန့်က “ဒါပေမယ့် ဒီဘဏ်ပိတ်လိုက်လို့ အဲဒီမြို့နယ်မှာ တခြားဘဏ်တွေကလည်း တာဝန်လွှဲယူရတာပေါ့။ လူတွေလည်း သိပါတယ်။ တစ်ဘဏ်တည်းကို ပြုံတိုးသွားမှာ မဟုတ်ဘူးလေ။ ပြောချင်တာက ဒီလိုဖြစ်နေတဲ့ အခြေအနေက ဖြစ်နေပြီဆိုတော့ အားလုံး ငွေလွှဲတာတို့၊ ငွေပို့တာတို့က အွန်လိုင်းက သွားတာလေ” ဟု ပြောသည်။
ထို့ကြောင့် မလိုအပ်ဘဲ ငွေကြေးကိုင်ခြင်း၊ ဘဏ်များတွင် စုပြုံတိုးခြင်း မလုပ်ဘဲ အွန်လိုင်းဘဏ်စနစ်၊ အွန်လိုင်းငွေပေးငွေယူ စနစ်များကို အဓိကသုံးကြရန် သူက တိုက်တွန်းသည်။
COVID-19 ကူးစက်လူနာဦးရေ မြင့်တက်လာခဲ့ပြီးနောက် စက်တင်ဘာ ၂၀ ရက်နေ့ နောက်ပိုင်း ကိုကိုးကျွန်းမှအပ ရန်ကုန်တိုင်းဒေသကြီး တစ်ခုလုံးတွင် အပြင်မထွက်ကြဘဲ အိမ်မှာတွင် Stay at Home လုပ်ရန် ကျန်းမာရေးနှင့် အားကစား ဝန်ကြီးဌာနက ညွှန်ကြားထားသည်။
သို့သော် အများပြည်သူနှင့် သက်ဆိုင်သော ဘဏ်လုပ်ငန်း၊ သယ်ယူပို့ဆောင်ရေး၊ အစားအသောက်နှင့် ဆေးဝါးလုပ်ငန်းများကမူ လှုပ်ရှားသွားလာခွင့် ရှိသည်။
စက်တင်ဘာလ ၂၁ ရက် ညနေ ၄နာရ ခွဲအထိ မြန်မာတစ်နိုင်ငံလုံးတွင် COVID-19 အတည်ပြုလူနာ ၅၈၀၅ ဦး၊ ရောဂါကြောင့် သေဆုံးသူ ၉၇ ဦး ရှိနေသည်။