ရေးသားသူ Aye Thi Mon
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win
လေ့ကျင့်ခန်းလုပ်ဖို့က ပျိုပျိုအိုအိုလေဒီလေးတိုင်းလိုအပ်ပါတယ်။ အကြောင်းကတော့ လေဒီလေးတိုင်းဟာအချိန်မရွေး ကျန်းမာလှပနေဖို့လိုအပ်လို့ပါ။ ဒီတစ်ခေါက်တော့ လေဒီတစ်ယောက်ရဲ့ အစွန့်စားရဆုံးအချိန်ဖြစ်တဲ့ ကိုယ်ဝန်ဆောင်နေရချိန်မှာ လေ့ကျင့်ခန်းလုပ်သင့်တဲ့ အကြောင်းလေးကိုပြောပြပေးပါရစေ။
လေဒီဗိုက်တို့ လေ့ကျင့်ခန်းလုပ်သင့်တယ်လို့ပြောရတဲ့ အကြောင်းအရင်းက
လေဒီဗိုက်တို့အနေနဲ့ ကျန်းမာပျော်ရွှင်တဲ့ မေမေတစ်ယောက်ဖြစ်စေဖို့လေ့ကျင့်ခန်းလုပ်ပေးသင့်ပါတယ်။ လေဒီဗိုက်တို့ လေ့ကျင့်ခန်းလုပ်သင့်တယ်လို့ ပြောရတာ ဒီအချက်တွေကြောင့်ပါ။
ကိုယ်အလေးချိန်ကို ထိန်းညှိနိုင်စေဖို့
ကိုယ်ဝန်ဆောင်ချိန်မှာ ကိုယ်အလေးချိန်တိုးလာတာက ပုံမှန်ဖြစ်စဉ်တစ်ခုဆိုပေမယ့် ကိုယ်အလေးချိန်အရမ်းတိုးလာတာမျိုးကတော့ မဖြစ်သင့်ပါဘူး။ ကိုယ်အလေးချိန်က အရမ်းတိုးလာမယ်ဆိုရင်တော့ နောက်ဆက်တွဲကျန်းမာရေးပြဿနာတွေရှိလာနိုင်ပါတယ်။ ကိုယ်အလေးချိန်လိုအပ်တာထက်ပိုတိုးလာတဲ့အခါ သွေးတိုးတာ၊ ကိုယ်ဝန်ဆောင်ဆီးချိုဖြစ်တာ၊ နှလုံးကျန်းမာရေးထိခိုက်တာ အပါအဝင် အဝလွန်တာနဲ့ အခြားကျန်းမာရေးနောက်ဆက်တွဲပြဿနာတွေဖြစ်လာနိုင်ပါတယ်။
ကျန်းမာရေးနဲ့သင့်တော်တဲ့ကိုယ်အလေးချိန်အနေနဲ့ ကိုယ်ဝန်ဆောင်ချိန်မှာ
- သာမန်ကိုယ်အလေးချိန်ရှိသူက ရှိရင်းစွဲကိုယ်အလေးချိန်ထက် ၂၅ ပေါင် ကနေ ပေါင် ၃၀ တိုးလာပါမယ်
- ပုံမှန်ထက်ကိုယ်အလေးချိန်နည်းသူတစ်ယောက်အနေနဲ့ ရှိရင်းစွဲကိုယ်အလေးချိန်ထက် ၂၈ ပေါင် ကနေ ပေါင် ၄၀ လောက်တိုးလာပါမယ်
- ပုံမှန်ကိုယ်အလေးချိန်ထက်များနေသူတစ်ယောက်အနေနဲ့ ရှိရင်းစွဲကိုယ်အလေးချိန်ထက် ၁၅ ပေါင်ကနေ ၂၅ ပေါင်လောက်တိုးလာပါမယ်
- အဝလွန်နေသူတစ်ဦးအနေနဲ့ ရှိရင်းစွဲကိုယ်အလေးချိန်ထက် ၁၁ ပေါင် ကနေ ပေါင် ၂၀ လောက်တိုးလာပါမယ်။
ပင်ပန်းနွမ်းနယ်မှုပြေလျော့စေပြီး အိပ်ရေးဝစေဖို့
ကိုယ်ဝန်ဆောင်ချိန်က လေဒီတွေအတွက် တော်တော်လေးပင်ပန်းတဲ့ အခိုက်အတန့်ပါ။ ဒါကြောင့် ကိုယ်ဝန်ဆောင်နေချိန်မှာ တက်ကြွလန်းဆန်းနေစေဖို့ အိပ်ရေးဝဖို့ကလည်း မဖြစ်မနေလိုအပ်တဲ့အချက်တစ်ခုပါ။ ဒါကြောင့် ကိုယ်ယန်ဆောင်ချိန်မှာ မအီမသာဖြစ်တာကင်းစင်ပြီး အိပ်ရေးဝနေစေဖို့ လေ့ကျင့်ခန်းလုပ်ပေးသင့်ပါတယ်။ လေ့ကျင့်ခန်းလုပ်ပေးတာက ခန္ဓာကိုယ်မှာ သွေးစီးဆင်းမှုကောင်းစေပြီး ဘေဘီလေးဆီ သွေးစီးဆင်းရောက်ရှိမှုကောင်းစေသလို သွေးအားနည်းတာမျိုးမဖြစ်အောင်လည်း အကောင်းဆုံးကာကွယ်ပေးနိုင်ပါတယ်။
ကိုယ်နေဟန်ထားမှန်စေပြီး အဆစ်နာတာတွေကို သက်သာစေဖို့
လေ့ကျင့်ခန်းလုပ်တာက ကိုယ်ဝန်ဆောင်ချိန်မှာဖြစ်တဲ့ ခန္ဓာကိုယ်ပြောင်းလဲမှုကြောင့် ကိုယ်နေဟန်ထားမမှန်တာနဲ့ အဆစ်တွေနာကျင်တာကို သိသိသာသာ သက်သာစေနိုင်ပါတယ်။ ခါး နဲ့ အဆစ်တွေနာကျင်တာကို သိသိသာသာသက်သာစေနိုင်ပါတယ်။ ဒါကြောင့် ကိုယ်ဝန်ဆောင်ချိန်မှာ ကိုယ်နေဟန်ထားမှန်ကန်ပြီး အဆစ်တွေကျန်းမာစေဖို့ အကြောလျှော့လေ့ကျင့်ခန်းလုပ်ပေးပါ။
ဝမ်းချုပ်တာကို သက်သာစေဖို့
ကိုယ်ဝန်ဆောင်နေချိန်မှာ ခန္ဓာကိုယ်က progesterone ဟော်မုန်းကို ပုံမှန်အချိန်ထက်ပိုပြီး ထုတ်လွှတ်ပေးပါတယ်။ ဒီလိုအချိန်မှာ ကြွက်သားတွေက ပြေလျော့မှုနည်းလာပါလိမ့်မယ်။ ဒါက ကလေးကြီးထွားဖွံ့ဖြိုးဖို့အတွက်လိုအပ်တဲ့ ဖြစ်စဉ်တစ်ရပ်ဖြစ်တာကြောင့် မေမေတိုင်း မလွှဲမရှောင်သာကြုံတွေ့ရမှာပါ။ ဝမ်းချုပ်တာကြောင့် ကိုယ်ဝန်ဆောင်မေမေအနေနဲ့ လိပ်ခေါင်းဖြစ်တာအပါအဝင် အခြားသောကျန်းမာရေးပြဿနာတွေကိုပါ ခံစားရနိုင်ပါတယ်။ ဒါကြောင့် ကိုယ်ဝန်ဆောင်ချိန် ဝမ်းချုပ်တာကင်းဝေးစေဖို့ဆိုရင် ပုံမှန်လေ့ကျင့်ခန်းလုပ်ပေးသင့်ပါတယ်။ အမျှင်ဓာတ်ကြွယ်ဝတဲ့ အစားအစာတွေစားပေးဖို့လည်း မမေ့နဲ့နော်။
စိတ်ဖိစီးမှုကို ပြေလျော့စေဖို့
ကိုယ်ဝန်ဆောင်ချိန်မှာ စိတ်ဖိစီးမှုက မေမေတိုင်းကြုံရနိုင်တဲ့ပြဿနာတစ်ရပ်ပါ။ ခဏတဖြုတ်ဖြစ်တာက ကြီးကြီးမားမားသက်ရောက်မှုမရှိပေမယ့် ရေရှည်မှာ စိတ်ဖိစီးနေတာက ကိုယ်ဝန်ပျက်ကျတာအထိ ဖြစ်စေနိုင်ပါတယ်။ ဒီလိုမဟုတ်ရင်တောင် လမစေ့ဘဲ ကလေးမွေးတာ၊ ပေါင်မပြည့်ဘဲ ကလေးမွေးတာ၊ ကလေးမွေးဖွားပြီးချိန်မှာ စိတ်ဓာတ်ကျတာမျိုးတွေ ခံစားရနိုင်ပါတယ်။ ဒီပြဿနာတွေက ကင်းဝေးဖို့ဆိုရင် ပုံမှန်လေ့ကျင့်ခန်းလုပ်ပေးပါ။
မွေးဖွားရလွယ်ကူစေဖို့
ကိုယ်ဝန်ဆောင်ချိန်မှာ ပုံမှန်လေ့ကျင့်ခန်းလုပ်ပေးတာက သွေးစီးဆင်းမှုကောင်းစေပြီး သားအိမ်ကျုံ့ဆန့်အားကို ကောင်းစေပါတယ်။ သားအိမ်ကြွက်သားတွေ မွေးလမ်းကြောင်းကြွက်သားတွေကို သန်မာအောင် လုပ်ပေးရာကျသလို မွေးဖွားချိန်မှာလည်း မွေးဖွားရလွယ်ကူစေပါတယ်။
မြန်မြန်ဆန်ဆန်နဲ့ ပြန်လည်အားပြည့်လာစေဖို့
လေ့ကျင့်ခန်းလုပ်ပေးတာက ကိုယ်ဝန်ဆောင်ချိန်နဲ့ မွေးဖွားချိန်မှာတင် ကျန်းမာစေတာမဟုတ်ဘဲ မွေးဖွားပြီးချိန်မှာ ခန္ဓာကိုယ်ပြန်လည်အားပြည့်လာစေဖို့ အကောင်းဆုံး ထောက်ပံ့ပေးနိုင်ပါတယ်။ ရိုးရိုးမွေးဖွားနိုင်ခြေများစေပြီး ခန္ဓာကိုယ်ကို ကျန်းမာစေမှာပါ။
ကိုယ်ဝန်ဆောင်ချိန်မှာ ခံစားရတဲ့ကျန်းမာရေးပြဿနာတွေခံစားရနိုင်ခြေကိုလျှော့ချနိုင်ဖို့
လေ့ကျင့်ခန်းလုပ်ပေးတာက ကိုယ်ယန်ဆောင်ချိန်မှာ ခံစားရနိုင်တဲ့ နောက်ဆက်တွဲကျန်းမာရေးပြဿနာတွေကို ကင်းစေနိုင်ပါတယ်။ ဥပမာ ကိုယ်ဝန်ဆောင်ဆီးချိုဖြစ်တာ၊ ဆီးထဲမှာ ပရိုတင်းများတာ၊ ကိုယ်ဝန်ဆောင်ချိန် သွေးတိုးတာတွေခံစားရနိုင်ခြေကို လျှော့ချပေးနိုင်ပါတယ်။
ဘာလေ့ကျင့်ခန်းတွေလုပ်ရမလဲ…………
ကိုယ်ဝန်ဆောင်ချိန်မှာ လုပ်ရမယ့်လေ့ကျင့်ခန်းက အခြားအချိန်တွေမှာလုပ်ရတဲ့လေ့ကျင့်ခန်းတွေနဲ့ မတူနိုင်ပါဘူး။ ဒီတော့ ကိုယ်ဝန်ဆောင်ချိန်မှာ မေမေရော ဘေဘီလေးပါကျန်းမာစေဖို့အတွက် ကိုယ်ဝန်ဆောင်ကာလအလိုက် အခုလိုလေ့ကျင့်ခန်းလေးတွေလုပ်ပေးရင် အဆင်ပြေပါတယ်။
ကိုယ်ဝန်ဆောင် ပထမ ၃ လပတ်မှာ မိနစ် ၃၀ လောက်လမ်းလျှောက်မယ်။ တရားထိုင်မယ်။ ကိုယ်ဝန်ဆောင်ယောဂလေ့ကျင့်တာမျိုးလုပ်ပေးလို့ရပါတယ်။
ကိုယ်ဝန်ဆောင် ဒုတိယ ၃ လပတ်မှာ ရေကူးတာ၊ ယောဂလေ့ကျင့်ခန်းလုပ်တာ၊ ခပ်ရွရွလေးပြေးတာ၊ လမ်းလျှောက်တာမျိုးတွေ တစ်နေ့ကို မိနစ် ၃၀ လောက်လုပ်ပေးလို့ရပါတယ်။
ကိုယ်ဝန်ဆောင် တတိယ ၃ လပတ်မှာ ရေကူးတာ နဲ့ လမ်းလျှောက်တာက အဆင်အပြေဆုံးဖြစ်မှာပါ။
Mizzima Key Campaign မှာ ပါဝင်ဖို့ ဖိတ်ခေါ်လိုက်ပါတယ်။ Visit Our website: http://building.mizzimafoundation.org/
