ရန်ကုန်၊ မတ် ၆ ။ ။ ရန်ကုန်တိုင်းဒေသကြီး၊ အရှေ့ဒဂုံ၊ ရွာသာကြီး စီးပွားရေးတက္ကသိုလ်တွင် ပြုလုပ်နေသော အကြိုသြင်္ကန်တွင် ကျောင်းသားများ၏ လုံခြုံရေးအတွက် အရက်သေစာ သောက်စားမှုကို ကန့်သတ်ထားသည်ဟု ကျောင်းသားသမဂ္ဂ ဥက္ကဋ္ဌ သိဒ္ဓိအောင်ကပြောသည်။
သြင်္ကန်အကြိုပွဲကို နံနက် ၁၀ နာရီမှစတင်ပြီးနေ့လယ်ပိုင်းအထိပြု လုပ်မည်ဖြစ်ကာ ရန်ကုန်စီးပွားရေး တက္ကသိုလ်ကျောင်းသားသမဂ္ဂမှ ဦးဆောင်ပြုလုပ်ခြင်း ဖြစ်ကြောင်းသိရသည်။
" အရက်သေစာသောက်စားမှုကိုလုံး၀ ကန့်သတ်ထားပါတယ်။ ပြီးတော့ လုံခြုံရေးအနေနဲ့ ၁၂ ယောက် ခေါ်ထားပါတယ်။ ပြီးတော့ လူနာတင်ယာဉ် ၂ စီးလည်း အရေးပေါ်ခေါ်ထားပါတယ်။ နှစ်တိုင်းကတော့ ကျောင်းသားတွေက ရိုးရိုးတန်းတန်းရေခွက်လေးတွေနဲ့ပက်တာ ။ အဲဒါကနေပြီးတော့ သိုက်သိုက်ဝန်းဝန်း တစ်နေရာတည်း မှာစုစုစည်းစည်းပက်ကြမယ်ဆိုပြီးတော့ ကျွန်တော်တို့ ကျောင်းသားမဂ္ဂကနေ ဦးဆောင်ပြီး ပြုလုပ်တာပါ " ဟု ရန်ကုန်စီးပွားရေးတက္ကသိုလ် ကျောင်းသားသမဂ္ဂဥက္ကဋ္ဌ သိဒ္ဓိအောင်ကပြောသည်။
အဆိုပါ စီးပွားရေးတက္ကသိုလ်အကြိုသြင်္ကန်တွင် မြန်မာ့ရိုးရာအကအလှများအပြင် ခေတ်ပေါ်တေးဂီတ ဖျော်ဖြေပွဲများလည်း ပါဝင်ပြီး စတုဒီတာကျွေးမွေးသည့် မဏ္ဍပ် ၂၈ ခုခန့်ရှိကြောင်းသိရသည်။
ထို့အပြင် ပွဲအတွက် ကုန်ကျစရိတ်များကို ကျောင်းသားများထံမှ အလှူခံပြီး ပြင်ပကုမ္မဏီများမှလည်း ကူညီမှု များရှိခဲ့ကာ စုစုပေါင်း ၁၅ သိန်းခန့် ကုန်ကျထားကြောင်းလည်းသိရသည်။
ရန်ကုန်စီးပွားရေးတက္ကသိုလ်တွင် ယခင်နှစ်မှစတင်ကာ အကြိုသြင်္ကန်ပြုလုပ်ခဲ့ခြင်းဖြစ်ပြီးယခုအကြိမ်မှာ ဒုတိယအကြိမ်အဖြစ်ပြုလုပ်ခြင်းလည်းဖြစ်သည်။
