စက်တင်ဘာ ၂၀ ။ ။ ဘင်္ဂလားဒေ့ရှ်ရောက် ဘင်္ဂလီဒုက္ခသည်များ၏ မျိုးဆက်ပွားကျန်းမာရေးစောင့်ရှောက်မှုများအတွက် ကုလသမဂ္ဂ လူဦးရေ ရန်ပုံငွေအဖွဲ့ UNFPA က အမေရိကန်ဒေါ်လာ ၁၃ သန်း တောင်းခံလျက် ရှိသည်။
ကိုယ်ဝန်သည်များ၊ မီးဖွားစမိခင်များနှင့် မွေးကင်းစကလေးငယ်များ၏ လိုအပ်ချက်များကို ဖြည့်ဆည်းပေးနိုင်ရေး အတွက် အဆိုပါ ကုလသမဂ္ဂအေဂျင်စီက ဝမ်းဆွဲသည်ဒါဇင်များစွာကို ထားရှိပေးထားသည်။
"အရေးပေါ်အခြေအနေကာလကြောင့် အမျိုးသမီးတွေဟာ ကိုယ်ဝန်တားဆီးတာ၊ ကလေးမရအောင်တို့ကို မလုပ်နိုင်ကြဘူး "ဟု ဘင်္ဂလားဒေ့ရှ်က UNFPA ယာယီတာဝန်ခံ အိုင်အိုရီကာတိုက ပြောသည်။
ဘင်္ဂလားဒေ့ရှ်ဖက်သို့ ရောက်ရှိလာသူ ဘင်္ဂလီ ဒုက္ခသည်ပေါင်း ၃၇၀၀၀၀ ခန့်ရှိရာတွင် သုံးပုံနှစ်ပုံ(၆၇ ရာခိုင်နှုန်း)မှာ အမျိုးသမီးများနှင့် မိန်းကလေးများ ဖြစ်ပြီး ၁၃ ရာခိုင်နှုန်းမှာ ကိုယ်ဝန်သည်နှင့် နို့တိုက်မိခင်များ ဖြစ်ကြောင်း UNFPA က ခန့်မှန်းထားသည်။
မြန်မာနှင့် ဘင်္ဂလားဒေ့ရှ် နယ်စပ်ကြား မြေနေရာတွင် မွေးဖွားသည့် ကလေးငယ် ၄၀၀ ကျော် ရှိသည်။
အဆိုပါ အေဂျင်စီအနေဖြင့် ကလေးမီးဖွားရာ အသုံးအဆောင်များ၊ အမျိုးသမီးများနှင့် မိန်းကလေးများအတွက် အမျိုးသမီးအသုံးအဆောင်များ၊ တစ်ကိုယ်ရည်သုံးပစ္စည်းများ စသည်ဖြင့် ပေးဝေဖြန့်ဖြူးထားသည်။
"ဒီ လိုအပ်ချက်တွေက တိုးသထက်များပြားလာနေတယ်"ဟု ကာတိုက ပြောသည်။
သြဂုတ်လကုန်လောက်တွင် အကြမ်းဖက်သမားများက အစိုးရတပ်ဖွဲ့များကို လာရောက်တိုက်ခိုက်ရာမှ အစိုးရလုံခြုံရေးတပ်ဖွဲ့များက နယ်မြေရှင်းလင်းရေးများ လုပ်ဆောင်ခဲ့ခြင်း ဖြစ်သည်။
ဘင်္ဂလားဒေ့ရှ်နှင့် မြန်မာကို လူသားချင်းစာနာမှုအကူအညီများပေးခြင်းအတွက် ထပ်တိုး ပေါင် သုံးသန်း ကူညီပေးအပ်မည်ဖြစ်ကြောင်း ဥရောပကော်မရှင်က ပြီးခဲ့သည့် သီတင်းပတ်က ကြေညာခဲ့ပြီး ဗြိတိန်နိုင်ငံကလည်း ဒုက္ခသည်များအကူအညီအတွက် ပေါင် ၂၅ သန်း ကူညီရန် ကတိပြုထားသည်။
"နိုင်ငံတကာအဖွဲ့အစည်းနဲ့အတူ မြန်မာနိုင်ငံတွင်း နေထိုင်သူအားလုံးအား ကာကွယ်ပေးရေးကို အာဏာပိုင်များက အာမခံရန် တိုက်တွန်းကြောင်း" ကမ္ဘာ့ဘဏ်ကလည်း ပြီးခဲ့သည့်အပတ်က ပြောခဲ့သည်။