ဝါရှင်တန်နှင့် ပြံုယမ်းတို့၏ တင်းမာမှု ဒီရေ မြင့်မားလျက်ရှိချိန် အမေရိကန်နိုင်ငံအား တိုက်ခိုက်ရန် လူငယ်နှင့် စစ်မှုထမ်းဟောင်း သုံးသန်းခွဲနီးပါး စစ်တပ်သို့ ဝင်ရောက်ခွင့်ရရေးအတွက် စာရင်းပေးသွင်းလာကြောင်း မြောက်ကိုရီးယားက သြဂုတ် ၁၂ ရက်တွင် သတင်းထုတ်ပြန်လိုက်သည်။
ကုလသမဂ္ဂ၏ ဒဏ်ခတ်ပိတ်ဆို့မှုသစ်များ ချမှတ်ခြင်းကို လက်တုံ့ပြန်ရေး မြောက်ကိုရီးယားအစိုးရက ကြေညာခဲ့သည့် သြဂုတ် ရ ရက်မှ စကာ သုံးရက်အတွင်း ကျောင်းသားများ၊ လူငယ် အလုပ်သမားများနှင့် စစ်သားဟောင်းများ ၃ ဒဿမ ၄၇ သန်းက စစ်ထဲဝင်ရောက်ရန် စာရင်းပေးကြကြောင်း နိုင်ငံပိုင် Rodong Sinmun သတင်းစာက ဖော်ပြသည်။
“အမေရိကန်ကို တိုက်ဖို့အတွက် တစ်နိုင်ငံလုံးအနှံ့က ပြည်သူတွေ စိတ်အားတက်ကြွနေတယ်။”ဟု အဆိုပါ အလုပ်သမားပါတီ သတင်းစာက ဖော်ပြသည်။
မြောက်ကိုရီးယားနိုင်ငံသည် လူဦးရေ ၂၅ သန်းရှိပြီး စစ်တပ်တွင် ခုနစ်သိန်းမှ ၁ ဒဿမ ၃ သန်း အမှုထမ်းနေသည်။
သြဂုတ် ၉ ရက်တွင်လည်း မြောက်ကိုရီးယား နိုင်ငံပိုင်ရုပ်သံက ပြံုယမ်းရှိ ကင်အီဆွန်းရင်ပြင်တွင် လက်ရှိခေါင်းဆောင် ကင်ဂျုံးအွန်အား ကာကွယ်ရေးနှင့် ကုလသမဂ္ဂ ဒဏ်ခတ်ပိတ်ဆို့မှုများကို ရှုတ်ချသည့် ပိုစတာ၊ စာတမ်းများ ကိုင်ဆောင်ကြလျက် ထောင်သောင်းများစွာသော ပြည်သူများ ဆန္ဒဖော်ထုတ်မှုကို ထုတ်လွှင့်ခဲ့သည်။
မကြာသေးမီက ဒုံးကျည်များ ပစ်လွှတ်စမ်းသပ်ခြင်းကြောင့် မြောက်ကိုရီးယားနိုင်ငံအပေါ် ကုလသမဂ္ဂက ပြင်းထန်သည့် ဒဏ်ခတ်ပိတ်ဆို့မှုသစ်များ ချမှတ်ထားခဲ့သည်။