ကိုရီးယားဒရာမာဇာတ်ကားများကို ကြိုက်နှစ်သက်သူများ၏ စိတ်ကူးထဲမှစုံတွဲဖြစ်ကြသော ဆောင်ဂျွန်ကီနှင့် ဆောင်းဟေကိုတို့သည် လာမည့်အောက်တိုဘာလတွင် လက်ထပ်ကြတော့မည်ဖြစ်သည်။

၂၀၁၆ခုနှစ်၏ လူကြိုက်အများဆုံး ဇာတ်လမ်းတွဲဖြစ်သော “Descendants of the Sun” ထဲမှ သရုပ်ဆောင် နှစ်ဦး၏ အေဂျင်စီများဖြစ်ကြသော Blossom Entertainment နှင့် UAA တို့မှ ဇူလိုင် ၅ ရက်နေ့တွင် ပူးတွဲ ကြေညာချက်တစ်ခု ထုတ်ပြန်ခဲ့သည်။

ထိုကြေညာချက်ထဲတွင် “ ပထမဦးဆုံးအနေနဲ့ ဆောင်ဂျွန်ကီနှင့် ဆောင်းဟေကိုတို့ကို အားပေးကျသော ကိုရီးယားနှင့် နိုင်ငံတကာမှ ပရိသတ်များကို ကျေးဇူးတင်ကြောင်း ပြောချင်ပါတယ်။ ယခုလို အံ့သြစရာ သတင်း တစ်ခုကို ဖော်ပြရတဲ့အတွက်လည်း နားလည်ပေးဖို့ တောင်းဆိုပါတယ်။ ဆောင်ဂျွန်ကီနှင့် ဆောင်းဟေကိုတို့ ဟာ လာမည့် ၂၀၁၇ အောက်တိုဘာလ နောက်ဆုံးရက်ထဲမှာ လက်ထပ်ပွဲကျင်းပကြတော့မှာ ဖြစ်ပါတယ်” ဟု ဖော်ပြထားသည်။

ဒါ့အပြင် “ သူတို့စုံတွဲအတွက် လှပသာယာတဲ့ အနာဂတ်လေးကို အတူတကွပိုင်ဆိုင်စေဖို့ ဆုမွန်ကောင်း တောင်းပေးကြဖို့ ကျနော်တို့တောင်းဆိုပါတယ်။ ပြီးတော့ သူတို့နှစ်ဦးစလုံးကလည်း သူတို့ရဲ့ ပရိသတ်တွေဆီကို သီးခြားစီ သတင်းစကားပါးကြဖို့ အစီအစဉ်ရှိပါတယ်။ ကျေးဇူးတင်ပါတယ်” ဟုလည်း ဖော်ပြထားသည်။