မတည်ငြိမ်သေးသည့် မြို့နယ်များတွင် ဌာနဆိုင်ရာဝန်ထမ်းများပါဝင်သည့် လုံခြုံရေးတပ်ဖွဲ့ ဖွဲ့စည်းဆောင်ရွက်နေရခြင်း ရှိကြောင်း စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက စစ်ကောင်စီဝါဒဖြန့် မြဝတီရုပ်သံတွင် နိုဝင်ဘာလ ၁၆ ရက်နေ့က ပြောဆိုခဲ့သည်။
လုံခြုံရေးအခြေအနေအရ ထိုသို့ ဖွဲ့စည်းဆောင်ရွက်နေရခြင်းဖြစ်ကြောင်း ဗိုလ်ချုပ်ဇော်မင်းထွန်းက ဆိုသည်။
“နေပြည်တော်မှာရှိတဲ့ ဝန်ကြီးဌာနတွေမှာ လုံခြုံရေးအဖွဲ့ဖွဲ့စည်းနေတယ်ဆိုတဲ့ဟာမျိုးတွေ၊ လုံခြုံရေးတပ်ဖွဲ့ဖွဲ့စည်းနေတယ်ဆိုတဲ့ဟာမျိုးတွေ ထွက်လာတာရှိပါတယ်။ ဒါဟာ အချိန်ကိုက် ဝါဒဖြန့်မှုသာဖြစ်ပါတယ်”ဟုလည်း ၎င်းက ပြောသည်။
"မတည်ငြိမ်သေးတဲ့ စစ်ကိုင်းတိုင်းဒေသကြီးက အချို့မြို့နယ်တွေ၊ ရခိုင်ပြည်နယ်ကအချို့မြို့နယ်တွေ၊ ချင်းပြည်နယ်ထဲက အချို့မြို့နယ်တွေမှာပဲ ဒါတွေရှိတယ်"ဟု ဆက်လက်ပြောဆိုခဲ့ခြင်းဖြစ်သည်။
နိုဝင်ဘာလ ၁၆ ရက်နေ့က စစ်ကောင်စီရုံးစိုက်ရာ နေပြည်တော်တွင် ဌာနအလိုက် နိုင်ငံ့ဝန်ထမ်းတက္ကသိုလ်တက်ရောက်ပြီးသော ဝန်ထမ်းများ၊ စစ်မှုထမ်းဟောင်းဝန်ထမ်းများကို အခြေခံပြီး တပ်ခွဲ နှစ်ခွဲ ဖွဲ့စည်းထားပြီး လုံခြုံရေးနှင့် သဘာဝဘေးအန္တရာယ်အတွက် လိုအပ်ပါက ဆောင်ရွက်ရန် လျှို့ဝှက် ညွှန်ကြားစာထွက်ပေါ်ခဲ့ခြင်းဖြစ်သည်။
လက်ရှိတွင် စစ်ကောင်စီအနေဖြင့် နိုင်ငံ့ဝန်ထမ်းတက္ကသိုလ်များတွင် ဝန်ထမ်းများအား စစ်ပညာသင်ကြားပေးခြင်းကိုအာဏာသိမ်းပြီးနောက်ပိုင်းကတည်းက ပြန်လည်ပြုလုပ်လျက်ရှိကြောင်း ဝန်ထမ်းအသိုင်းအဝိုင်းထံက သိရသည်။
အာဏာသိမ်းပြီးနောက် အင်အားပြုန်းတီးမှုများနှင့် ရင်ဆိုင်နေရသည့် စစ်ကောင်စီတပ်အနေဖြင့် ပျူစောထီးအဖွဲ့များ ဖွဲ့စည်းပြီး လက်နက်တပ်ဆင်ပေးခြင်းများလည်း ပြုလုပ်ခဲ့သည်။ ပြီးခဲ့သည့် စက်တင်ဘာလအတွင်းကလည်း ပဲခူးတိုင်းတောင်ငူတပ်နယ်နှင့် ပြည်တပ်နယ်တို့ရှိ ပြည်သူ့စစ်အမည်ခံ ပျူစောထီးအဖွဲ့ကို လက်နက်တပ်ဆင်ပေးခြင်းများ ဆောင်ရွက်ခဲ့သေးသည်။
စာတည်း။ ။အောင်ကျော်ဖြိုး