စစ်ကိုင်းတိုင်း၊ စစ်ကိုင်းမြို့အနီးရှိ အုန်းတောစစ်တပ်ဝင်းနှင့် မာလဲတောကျေးရွာအတွင်း စခန်း ချထားသည့်စစ်အုပ်စုကို ဒရုန်းဖြင့်တိုက်ခိုက်ခဲ့ကြောင်း ယူနီကွန်းပြောက်ကျားတပ်ဖွဲ့က သတင်းထုတ် ပြန်ထားသည်။
စစ်ကိုင်းမြို့အဝင် အုန်းတောကျေးရွာရှိအုန်းတောစစ်တပ်ဝင်းကို ဒရုန်းဗုံးနှစ်လုံးဖြင့်လည်းကောင်း၊ ၎င်း နှင့်လေးမိုင်အကွာခန့်ရှိ ပျူစောထီးကြီးစိုးရာ မာလဲတောကျေးရွာ စစ်အုပ်စုစခန်းကို ဒရုန်းဗုံးသုံးလုံး ဖြင့်လည်းကောင်း ဧပြီလ ၇ ရက်နေ့ ညနေ ၅ နာရီဝန်းကျင်က တိုက်ခိုက်ခဲ့ခြင်းဖြစ်ကြောင်း ယူနီကွန်း ပြောက်ကျားတပ်ဖွဲ့ ပြန်ကြားရေးတာဝန်ခံက မဇ္ဈိမကို ပြောသည်။
“အဲဒီနေရာနှစ်ခုက တစ်ခုနဲ့တစ်ခု လေးငါးမိုင်လောက်ပဲကွာတယ်။ အဲဒီနားအထိ ကျွန်တော်တို့မဟာမိတ် တွေသွားပြီး မစ်ရှစ်လုပ်ခဲ့ကြတယ်၊ စကစတွေအထိအခိုက် အတိအကျမသိရသေးပါဘူး” ဟု ၎င်းကဆို သည်။
တိုက်ခိုက်မှုအတွင်း စစ်ကောင်စီတပ်မှ ထိခိုက်သေဆုံးမှုရှိမရှိမသိရသေးသော်လည်း၊ မဟာမိတ်များမှာ အထိအခိုက်မရှိ ဆုတ်ခွာနိုင်ခဲ့ကြောင်း သိရသည်။
အဆိုပါတိုက်ခိုက်မှုကို စစ်ကိုင်းမြို့နယ်ပြည်သူ့ကာကွယ်ရေးတပ်ဖွဲ့(စစ်ကိုင်းမြို့နယ်ပကဖ)၊ ယူနီကွန်း ပြောက်ကျားတပ်ဖွဲ့၊ Fight For Federal၊ Phoenix Sgg ၊ Zero Power နှင့် စစ်ကိုင်းခရိုင်တပ်ရင်း (၇) တပ်ခွဲ(၄)တို့ ပူးပေါင်းလုပ်ဆောင်ခဲ့ခြင်းဖြစ်ကြောင်း ထုတ်ပြန်ချက်တွင်ဖော်ပြထားသည်။
ယူနီကွန်းပြောက်ကျားတပ်ဖွဲ့နှင့်မဟာမိတ်ပူးပေါင်းအဖွဲ့သည် ပြီးခဲ့သည့်မတ်လ ၃၁ ရက်နေ့ကလည်း စစ်ကိုင်းမြို့မှဈေးဝယ်ပြန်လာသည့် စစ်အုပ်စုယာဉ်တန်းကို ဒရုန်းဗုံး ၁၀ လုံးဖြင့်တိုက်ခိုက်ရာ စစ်သား နှစ် ယောက်ထက်မနည်း သေဆုံးခဲ့သည်။
စာတည်း။ ။စောဖေ
စာမူတည်းဖြတ်။ ။စောဖေ