ကရင်နီ ပြည်နယ်၊ ဒီးမော့ဆိုမြို့အရှေ့ဖက်ခြမ်းရှိ တနီးလာလဲကျေးရွာ အရှေ့ဖက်တောင်ပေါ်တစ်ကြောတွင် ဖြစ်ပွားခဲ့သော နှစ်ရက်တာပြင်းထန်တိုက်ပွဲအတွင်း စစ်ကောင်စီတပ်မှ ၁၀ ဦးကျော်သေဆုံးခဲ့ပြီး လက်နက်ခဲယမ်းများ သိမ်းဆည်းရမိခဲ့ကြောင်း ကရင်နီအမျိုးသားများကာကွယ်ရေးတပ် (KNDF)က ဧပြီလ ၈ ရက်နေ့တွင် ထုတ်ပြန်သည်။
ပြီးခဲ့သည့် ဧပြီလ ၄ ရက်နှင့် ၅ ရက်တို့တွင် စစ်ကြောင်းထိုးနေသော စစ်ကောင်စီတပ်များနှင့် ကရင်နီတပ်မတော် (KA)၊ KNDF ပူးပေါင်းအဖွဲ့တို့အကြား တနေကုန်နီးပါး ထိတွေ့တိုက်ပွဲများ ဖြစ်ပွားခဲ့ခြင်းဖြစ်ကြောင်း သိရသည်။
တိုက်ပွဲအတွင်း စစ်ကောင်စီဘက်မှ သေဆုံးသူများအပြင် ထိခိုက်ဒဏ်ရာရရှိသူလည်း များပြားပြီး စစ်ကောင်စီ စစ်ကြောင်းထိုးနေသော တပ်ရင်းများထဲမှ ခမရ (၅၁၇) တပ်ရင်း အမှတ်တံဆိပ်ပါ MA-1 သေနတ် နှစ်လက်၊ MA-3 သေနတ် တစ်လက်နှင့် ကျည်ဆန်များ၊ ဆက်စပ်ခဲယမ်းမီးကျောက်များနှင့် အသုံးအဆောင်ပစ္စည်းတချို့ကို သိမ်းဆည်းရမိခဲ့ကြောင်း KNDFက ဖော်ပြထားသည်။
စစ်ကောင်စီတပ်သားများ ထိခိုက်ကျဆုံးမှုများနှင့် ပတ်သက်ပြီး မဇ္စျိမအနေဖြင့် သီးခြားအတည်ပြုနိုင်ခြင်းမရှိသေးပါ။
အဆိုပါ နှစ်ရက်တာပြင်းထန်တိုက်ပွဲအတွင်း စစ်ကောင်စီ၏ ငွေတောင်အခြေစိုက် ခလရ(၁၀၂) တပ်နှင့် လွိုင်ကော်မြို့နယ်အခြေစိုက်တပ်များက လက်နက်ကြီးများအဆမတန်အသုံးပြုကာ ပစ်ကူပေးခဲ့ပြီး ဧပြီလ ၄ ရက်နေ့တိုက်ပွဲတွင် တိုက်လေယာဉ်ဖြင့် ခြောက်ကြိမ်တိုင်လာရောက်ပစ်ခတ်ခဲ့ကြောင်း KNDFကထုတ်ပြန်ထားသည်။
ဧပြီလ ၄ ရက်နေ့တွင် ဖြစ်ပွားခဲ့သော တိုက်ပွဲအတွင်း KNDF B/06တပ်ရင်းမှ ရဲဘော်တစ်ဦးကျဆုံးခဲ့ကြောင်းလည်း သိရသည်။
ဒီးမော့ဆိုအရှေ့ဖက်ခြမ်း ဒေါတမြေး၊ ဒေါတငူး၊ တနီးလာလဲ ကျေးရွာများအနီးတွင် စစ်ကြောင်းထိုးနေသော စစ်ကောင်စီတပ်ဖွဲ့များနှင့် KA ၊ KNDFတပ်ပေါင်းစုများအကြား ပြီးခဲ့သည့် မတ်လမှစတင်ပြီး ယခုဧပြီလအထိ နေ့စဉ်ထိတွေ့တိုက်ပွဲများ ဖြစ်ပွားနေကြောင်း သိရသည်။
ကရင်နီပြည်တွင် ပြီးခဲ့သည့် ၂၀၂၁ ခုနှစ် ဖေဖော်ဝါရီလမှ ယခုနှစ် မတ်လကုန်အထိ တိုက်ပွဲပေါင်း ၆၅၀ ဖြစ်ပွားခဲ့ပြီး အဆိုပါ တိုက်ပွဲများအတွင်း စစ်ကောင်စီတပ်ဖွဲ့ဘက်မှ ဦးရေ ၁၈၀၀ ကျော်သေဆုံးခဲ့ကာ PDF ၊ KNDFနှင့် KAတပ်ဖွဲ့ဝင် ဦးရေ၂၅၀ ကျော်ကျဆုံးခဲ့ကြောင်း တိုးတက်သောကရင်နီပြည်သူ့အင်အားစု PKPFက ဧပြီလ ၁ ရက်နေ့က ထုတ်ပြန်ထားသည်။
စာတည်း။ ။ အောင်ကျော်ဖြိုး
