စစ်ကိုင်းတိုင်း၊ ကနီမြို့နယ်၊ အလယ်ကျွန်း ပျူစောထီးကျေးရွာကို ဒေသကာကွယ်ရေးတပ်ဖွဲ့များ မှ မတ်လ ၂၇ ရက်နေ့ညပိုင်းက လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း KLG PDF တပ်ဖွဲ့ထံမှ သိရသည်။
အဆိုပါတိုက်ခိုက်မှုတွင် စစ်ကောင်စီတပ်နှင့် ပျူစောထီးပူးပေါင်းတပ်ဖွဲ့မှ အထိအခိုက်ရှိနိုင်ပြီး အသေး စိတ်ကို မသိရသေးကြောင်း KLG တပ်ဖွဲ့ သတင်းနှင့်ပြန်ကြားရေးက ဆိုသည်။
“ပွိုင့်ငါးခုကနေ ၆၀ မမ ၊ ၈၀ မမ ၊ ၇၉ စတဲ့ လက်နက်ကြီး အလုံး ၅၀ လောက် ပစ်ခတ်တိုက်ခိုက်ခဲ့ပါတယ်။ ရန်သူ့ဘက်က စက်ကလေးတွေနဲ့ ပြန်လည်ပစ်ခတ်တာတွေရှိခဲ့တယ်။ တိုက်ပွဲကြာချိန် သုံးနာရီခန့်ရှိခဲ့ပြီး ရန်သူ့ဘက်မှာ အထိအခိုက်ရှိနိုင်ပြီး အသေးစိတ်တော့ မသိရသေးဘူး” ၎င်း ကဆိုသည်။
ထိုတိုက်ခိုက်မှုကို ကျောက်လုံးကြီး ပြည်သူ့ကာကွယ်ရေးတပ် (KLG PDF)၊ DRPA ၊ ယင်းမာပင်ခရိုင် အမှတ်(၂)တပ်ရင်း နှင့် ဒေါင်းမျိုးဆက်တပ်ဖွဲ့တို့ ပူးပေါင်းတိုက်ခိုက်ခဲ့ကြောင်း သိရသည်။
ကနီမြို့နယ် အလယ်ကျွန်းကျေးရွာအနီးတွင် မတ်လ ၁၈ ရက်နေ့ နံနက်ပိုင်းကလည်း တိုက်ပွဲဖြစ်ပွားခဲ့ပြီး စစ်ကောင်စီတပ်သားများ သေဆုံးမှုရှိခဲ့ကြောင်း သိရသည်။
စာတည်း။ ။စောဖေ
စာမူတည်းဖြတ်။ ။စောဖေ
