ကရင်ပြည်နယ် ကော့ကရိတ်မြို့နယ် ကျုံဒိုးမြို့အခြေစိုက် ခမရ(၅၄၅)၊ ခမရ(၅၄၆)၊ ကျုံဒိုးရဲစခန်း၊ ဂျိုင်းတံတားနှင့် ငါးတိုင် အလယ်တန်းစာသင်ကျောင်းအတွင်း တပ်စွဲထားသော စစ်ကောင်စီတပ်၊ ကရင်နယ်ခြားစောင့်တပ်(BGF)နှင့် ရဲများကို မတ်လ၂၅ရက်နေ့ နံနက် ၇နာရီမိနစ် ၃၀တွင် ကရင်လက်နက်ကိုင်ပူးပေါင်းတပ်ဖွဲ့တို့မှ တိုက်ခိုက်ခဲ့ကြောင်း Lion Battalion Commando-ဗျူဟာစစ်ကြောင်း (KTLA)မှ မတ်လ၂၈ရက်နေ့တွင် ထုတ်ပြန်ထားသည်။
“ကျနော်တို့က စစ်ကြောင်းတစ်ကြောင်း၊ တပ်ခွဲ သုံးခွဲနဲ့ တိုက်တာ၊ တစ်နေ့ထဲကို ပစ်မှတ်ထားပြီး တိုက်တာတော့မဟုတ်ဘူး၊ မဟာဗျူဟာမြောက်တိုက်ခိုက်ခဲ့တယ်၊ တိုက်ခိုက်ခဲ့တဲ့နေရာတွေက စစ်ကောင်စီတပ်ဖွဲ့တွေအခြေစိုက်တဲ့နေရာတွေပါ၊ အင်အားအလုံးအရင်းနဲ့ ဝင်တာတော့မဟုတ်ဘူး၊ ကျနော်တို့ အထူးကွန်မန်ဒိုတွေနဲ့ တိုက်ခိုက်ခဲ့တာပါ”ဟု Lion Battalion Commando-ဗျူဟာစစ်ကြောင်းမှ ပြန်ကြာရေးတာဝန်ရှိသူ ရဲဘော်အညာသားက ပြောသည်။
စစ်ကောင်စီတပ် ခမရ(၅၄၅)၊ခမရ(၅၄၆)တို့သည် စစ်ဆင်းရေးပြုလုပ်ခြင်းမရှိဘဲ ကော့ကရိတ်မြို့ မြို့ထိန်းတပ်အနေဖြင့် မြို့စောင့်တပ်ပြုလုပ်နေသည့် တပ်ဖြစ်ကြောင်းသိရသည်။ ယင်းတပ်ရင်းတို့တွင် ခန့်မှန်းအင်အားအများအပြားရှိပြီး ခံစစ်ပြင်ဆင်ထားသည့် တပ်ဖြစ်ကြောင်းသိရသည်။
မတ်လ၂၅ရက်နေ့မှ မတ်လ၂၆ရက်နေ့အထိ နှစ်ရက်တာ တိုက်ပွဲတွင် စစ်ကောင်စီတပ်ဘက်မှ ၁၅ဦးကျော်သေဆုံးခဲ့ပြီး အများအပြားထိခိုက်ဒဏ်ရာရရှိခဲ့ကြောင်း Lion Battalion Commando-ဗျူဟာစစ်ကြောင်းထံမှသိရသည်။
တိုက်ပွဲတွင် Lion Battalion Commando-ဗျူဟာစစ်ကြောင်းမှ ရဲဘော်အရှည်ကြီး၊ ရဲဘော်မျိုးကြီးနှင့် ရဲဘော်သရဲနီတို့သည် လက်နက်ကြီးကျည်ကြောင့် ကျဆုံးသွားခဲ့ကြောင်း သိရသည်။
“သိမ်းဆည်းရမိတဲ့ လက်နက်တွေရှိတယ် သေချာစိစစ်ပြီးမှ ကျနော်တို့ သတင်းထုတ်ပြန်ဖို့ရှိပါတယ်၊ လက်တလောမှာတော့ စီစစ်ဆဲပဲရှိပါသေးတယ်”ဟု Lion Battalion Commando-ဗျူဟာစစ်ကြောင်းမှ ပြန်ကြာရေးတာဝန်ရှိသူ ရဲဘော်အညာသားက ပြောသည်။
အဆိုပါတိုက်ပွဲကို Lion Battalion Commando-ဗျူဟာစစ်ကြောင်း (KTLA)၊ KNLA၊ KNDOအမှတ်(၆)တပ်ရင်း၊ ဂဠုန်စစ်ကြောင်း၊ ကျားဖြူစစ်ကြောင်း၊ နဂါးဖြူစစ်ကြောင်းနှင့် ကရင့်လက်နက်ကိုင်ပူးပေါင်းတပ်ဖွဲ့တို့ ပူးပေါင်းတိုက်ခိုက်ခဲ့ကြောင်း သိရသည်။
စာတည်း - သန့်ဇော်(သန်လျင်)