September 24
မဇ္ဈိမ ။ ။ ရှမ်း- ကရင်နီပြည်နယ်အစပ် မိုးဗြဲမြို့ လွယ်ယင်းမဂ်လာကျေးရွာ ကာလဝါရီတောင်ပေါ်သို့ ထိုးစစ်ဆင်တပ်စွဲထားသည့် စစ်ကောင်စီတပ်နှင့် မဟာမိတ်တပ်ပေါင်းစုများ တိုက်ပွဲဆက်လက်ပြင်းထန်ခဲ့ပြီး စစ်ကောင်စီတပ်သား အများအပြားသေဆုံးမှုရှိကာ မဟာမိတ်တပ်ပေါင်းစုဘက်မှလည်း ရဲဘော် နှစ်ဦးကျဆုံးခဲ့ကြောင်း မိုးဗြဲ PDF က ယမန်နေ့ စက်တင်ဘာလ ၂၃ရက်တွင် သတင်းထုတ်ပြန်ထားသည်။
ကာလဝါရီတောင်ပေါ်တွင် ယမန်နေ့ နံနက် ၃ နာရီ ၃၀မိနစ်အချိန်မှစ၍ ည ၆နာရီ အချိန်ထိ စစ်ကောင်စီတပ်နှင့် မဟာမိတ်တပ်ပေါင်းစုများဖြစ်သည့် MBPDF 1001၊ MBPDF 1007၊ ဖယ်ခုံ PDF B-01၊ လွိုင်ကော် PDF၊ အလယ်ပိုင်းတိုင်း အထူးစစ်ဆင်ရေးတပ်ဖွဲ့၊ DMO 1102 တပ်ရင်း၊ နေပြည်တော် PDF၊ KNDF၊ KA၊ KGZ၊ URF တပ်ဖွဲ့များ တစ်နေကုန် တိုက်ပွဲပြင်းထန်ခဲ့သည်။
" သူတို့ဘက် ထိုးစစ်ဆင်လာတဲ့အတွက် မနက် ၃ နာရီလောက်ကစပြီး တိုက်ပွဲဖြစ်တာ၊ ကင်းယူထားတဲ့ လမ်းကြောင်းအတိုင်း ထိုးလာလို့ ထိပ်တိုက် တိုက်ပွဲဖြစ်တာ၊ တိုက်ပွဲကတော့ ဆက်လက်ပြင်းထန်နေတဲ့အခြေအနေပါ" ဟု နေပြည်တော် PDF (၈၀၄) တပ်ရင်းမှ တပ်ခွဲမှူး ဆင်ကြီးက မဇ္စျိမကို ပြောဆိုထားသည်။
အဆိုပါတိုက်ပွဲအတွင်း စစ်ကောင်စီတပ်များ၏ အကျအဆုံးကို အတည်ပြုနိုင်ခြင်းမရှိသေးဘဲ မဟာမိတ်ပူးပေါင်းတပ်ဖွဲ့ဖက်မှ အသေးစားဒဏ်ရာရ လေးဦး၊ စိုးရိမ်ဒဏ်ရာရ သုံးဦးနှင့် တာဝန်ထမ်းဆောင်ရင်း ရဲဘော် နှစ်ဦးမှာ နွေဦးတော်လှန်ရေးအတွက် အသက်စတေးခဲ့ရသည်ဟု ထုတ်ပြန်ဖော်ပြထားသည်။
ယခုအချိန်ထိ ပူပေါင်းမဟာမိတ်အဖွဲ့မှ စစ်ကောင်စီတပ်၏ ထိုးစစ်ဆင်မှုကို ဆက်လက်တောင့်ခံနေဆဲဖြစ်ပြီး စစ်ရေးအခြေအနေ ဆက်လက်တင်းမာလျှက်ရှိကာ ပြည်သူများအနေဖြင့် မိုးဗြဲမြို့တွင်း အသွားအလာလုံးဝ မပြုလုပ်ကြရန် မိုးဗြဲ PDF က သတိပေးထားသည်။
စစ်ကောင်စီတပ်သည် မိုးဗြဲမြို့ကို ထိန်းချုပ်ရန် စတင်ဘာလ ၈ ရက်ကစ၍ စစ်ကြောင်းထိုးဝင်ရောက်ခဲ့လာခဲ့ကာ ကရင်နီတပ်ပေါင်းစုများ၏ ခုခံစစ်ကြောင့် အထိနာက စတင်ဘာလ ၁၂ရက်တွင် ပြန်လည်ဆုတ်ခွာသွားခဲ့ရပြီး စက်တင်ဘာလ ၁၉ရက်မှစ၍ လက်ရှိအချိန်ထိ မိုးဗြဲမြို့ထဲကို အင်အားအလုံးအရင်းဖြင့် တစ်ကျော့ပြန် စစ်ကြောင်းထိုးလာခဲ့ခြင်း ဖြစ်သည်။
စာတည်း - သန့်ဇော်(သန်လျင်)
