တရုတ်က အာကာသစခန်း၏ ပထမဆုံး သီးသန့်ဓာတ်ခွဲခန်းဖြစ်သော Wentian ကို လွှတ်တင်ကြောင်း ဒေသတွင်း မီဒီယာသတင်းများက ဖော်ပြသည်။

သီးသန့်ဓာတ်ခွဲခန်းအသစ်သည် ပင်မသီးသန့်ဓာတ်ခွဲခန်း၏ အရန်အဖြစ်နှင့် အစွမ်းထက်သော သိပ္ပံနည်းကျ စမ်းသပ်ခန်းတစ်ခုအဖြစ် နှစ်မျိုးလုပ်ဆောင်နိုင်မည်ဖြစ်ကြောင်း ဆင်ဟွာသတင်းအေဂျင်စီက ဖော်ပြခဲ့သည်။

Wentian သီးသန့်ဓာတ်ခွဲခန်းသည် အရှည် ၁၇ ဒသမ ၉ မီတာရှိပြီး အမြင့်ဆုံး အချင်း ၄ ဒသမ ၂ မီတာ ရှိကာ အလေးချိန် ၂၃ တန် ရှိကြောင်း တရုတ်အာကာသသိပ္ပံနည်းပညာအကယ်ဒမီ၏ အာကာသစခန်းစနစ်၏ လက် ထောက် ဒီဇိုင်နာဖြစ်သူ လျှိုဂန်က ပြောကြားခဲ့သည်။

အဆိုပါဓာတ်ခွဲခန်းတွင် အလုပ်ခန်း၊ လေလုံခန်းနှင့် အရင်းအမြစ်ခန်းတစ်ခန်းတို့ပါဝင်သည်။

Wentian ကို တင်ဆောင်လာသော Long March-5B Y3 ဒုံးကျည်သည် ဟိုင်နန်ပြည်နယ်တောင်ပိုင်း ကမ်းရိုး တန်းရှိ ဝမ်ချန်အာကာသယာဉ်စခန်းမှ လွှတ်တင်ခဲ့ကြောင်း တရုတ်အာကာသအေဂျင်စီ(CMSA) ၏ ထုတ်ပြန်ချက်ကို ဆင်ဟွာသတင်းတွင် ဖော်ပြသည်။

ယင်းဓာတ်ခွဲခန်းသည် ၄၉၅ စက္ကန့်အကြာတွင် ဒုံးပျံမှ ခွဲထွက်ကာ ပတ်လမ်းထဲသို့ ဝင်ရောက်ခဲ့သည်။

လွှတ်တင် မှုသည် ပြီးပြည့်စုံစွာ အောင်မြင်ခဲ့ကြောင်း CMSA မှ ကြေညာခဲ့သည်။

လူလိုက်ပါသည့် အာကာသအစီအစဉ်ကို အတည်ပြုပြီးကတည်းက ယင်းသည် ၂၄ ကြိမ်မြောက် ပျံသန်းရေး မစ်ရှင်ဖြစ်သည်။