ဇူလိုင်လ ၁၀ ရက်
ချင်းပြည်နယ်၊ မတူပီမြို့နယ်တွင် စစ်ကောင်စီက ၂၀၂၂-၂၃ ပညာသင်နှစ်အတွက် အခြေခံပညာကျောင်း များကို ဇွန်လ ၂ ရက်နေ့က စတင်ဖွင့်လှစ်ခဲ့သော်လည်း ယနေ့အထိ Grade-9 ၊ Grade-10 နှင့် Grade-11 အတန်းများအတွက် ကျောင်းသုံးပုံနှိပ်စာအုပ်များ ရောက်ရှိလာခြင်းမရှိသေးကြောင်း သိရသည်။
မတူပီမြို့နယ်အတွင်းရှိကျေးရွာများတွင် စာသင်ကျောင်းများဖွင့်လှစ်နိုင်ခြင်းမရှိဘဲ မြို့ပေါ်ရှိ အထက (၁) နှင့် အထက(၂) ကျောင်း နှစ်ကျောင်းကိုသာ ဖွင့်လှစ်နိုင်ကြောင်း သိရသည်။
“ အခုဆိုရင် ကျောင်းဖွင့်တာ တစ်လကျော်ပြီပြောရမယ်။ ပုံနှိပ်စာအုပ်တွေမရှိသေးဘဲ ဒီတိုင်းသင်နေရ တယ်။ ရဟတ်ယာဉ် မဆင်းလို့။ ရဟတ်ယာဉ်ဆင်းရင် စာအုပ်တွေပါလာမယ်ဆိုပြီး ဆရာမတွေက ပြော ကြတယ်” ဟု ကျောင်းသားမိဘတစ်ဦးက ပြောသည်။
လက်ရှိဖွင့်လှစ်ထားသော အထက(၂)သည် စစ်ကောင်စီ၏ စစ်ဗျူဟာအခြေချနှင့် (၁၄၀)တပ်ရင်းမှ တပ် မိသားစုမှ ကျောင်းသားများ အများဆုံး တက်ရောက်နေကြောင်းသိရသည်။
“ မတူပီမှာက ပညာရေးနဲ့ ကျန်းမာရေးဝန်ထမ်းတွေ CDM ဝင်တာ တော်တော်လေးများတယ်။ ဒါကြောင့် ရွာတွေမှာတာဝန်ကျတဲ့ Non-CDM တွေကို မြို့ပေါ်ကျောင်းတွေမှာပြန်ခေါ်ပြီး ပြန်တွဲထားကြတယ်။ စာလည်း သေသေချာချာမသင်နိုင်ပါဘူး။ အဓိက ပုံနှိပ်စာအုပ်တွေမရှိတာပေါ့။ ဆရာမတွေကိုင်မဲ့စာအုပ် တွေတောင် ခိုးကြောင်ခိုးဝှက်ကား သမားတွေကနေတဆင့် မှာရတယ်” ဟု ဆရာမတစ်ဦးက ဆိုသည်။
လက်ရှိတွင် မတူပီ-ပခုက္ကူကားလမ်း ပိတ်ဆို့မှုများကြောင့် အစိုးရဌာနဆိုင်ရာအပြောင်းအရွှေ့နှင့်ရုံးသုံး ပစ္စည်းများသယ်ယူရာတွင် အခက်အခဲများရှိနေပြီး ဝန်ထမ်းအပြောင်းအရွှေ့အတွက် ရဟတ်ယာဉ်များ သာအားကိုးနေရသည်။ ရဟတ်ယာဉ်ရောက်ရှိ လာခြင်းမရှိသည့်အတွက် အပြောင်းအရွှေ့ပြုလုပ်မည့် Non-CDM ဝန်ထမ်းများလည်း ပြောင်းရွှေ့၍ မရကြောင်း သိရသည်။
