မေ ၁၃
ကရင်ပြည်နယ်၊ မြဝတီခရိုင်၊ ဝေါလေမြိုင်ဒေသ၊KNU တပ်မဟာ(၆) ထိန်းချုပ်နယ်မြေတွင် ငှက် ဖျားရောဂါနှင့် ရာသီတုပ်ကွေးရောဂါ ဖြစ်ပွါးသူ များနေကြောင်း ဒေသခံများထံက သိရသည်။
ဒေသခံများအပြင် KNLA၊ KNDO မှ တပ်သားအချို့လည်း ရောဂါဖြစ်ပွါးနေပြီး ဆေးဝါးနှင့် ကျန်းမာရေးစောင့်ရှောက်မှုများ လိုအပ်နေကြောင်းသိရသည်။
“ကျွန်တော့် စခန်းမှာ အယောက်၂၀လောက်ဖြစ်နေတယ် ။ ဆေးဝါးလည်းလိုတယ် ။ဆရာဝန်လည်း လိုတယ် ။ အခု ယာယီ ဆေးခန်းဆောက်နေတယ်။ ဒီနေ့ ဗိုလ်ချုပ်စောနယ်ဒါးမြက ဌာနချုပ်ကနေ ဆရာဝန် လွှတ်ပေးတယ်”ဟု KNDO ဗိုလ်စောစလုံးက ပြောသည်။
ယင်းဒေသတွင် ဧပြီလမှ စတင်ပြီး ဌက်ဖျားရောဂါအဖြစ်များနေကာ မေလ ပထမပတ်မှ စတင်၍ ရာသီတုပ်ကွေးရောဂါ အဖြစ်များနေကြောင်း သိရသည်။
“အခုက စစ်ရှောင်တွေမှာပါ ဖြစ်နေတော့ ပိုဆိုးတာပေါ့ ။ ဆေးဝါးလည်း အတော်လိုအပ်နေတယ် ။ ဌက်ဖျား တစါခုထဲမဟုတ်ဘူး ။ တုပ်ကွေးပါဖြစ်နေတော့ အတော်ဆိုးဆိုးပဲ”ဟု စစ်ဘေးရှောင်များကို ကူညီပေးနေသူတစ်ဦးက ပြောသည်။
အဆိုပါ ဝေါလေမြိုင်ဒေသတွင် စစ်ကောင်စီက အင်အားအများအပြားဖြင့် ထိုးစစ်ဆင်နေပြီး KNLA၊KNDOတို့နှင့် တိုက်ပွဲများ ပြင်းထန်နေသည်။
စစ်ကောင်စီမှ ထိုးစစ်ဆင်နေခြင်းကြောင့် ကျေးရွာ ၁၀ရွာ ထက်မနည်းမှ ပြည်သူများ စစ်ရှောင်နေကြရပြီး စစ်ဘေးရှောင်ပြည်သူ ဦးရေ ၁၀,၀၀၀ ဝန်းကျင်ရှိနေကြောင်း သိရသည်။
#KNUတပ်မဟာ(၆)ထိန်းချုပ်နယ်မြေ