ကျိုက်ထိုတွင် ပစ်ခတ်ခံရသည့် စစ်ကောင်စီယာဉ်တန်းအား မေလ ၁၀ ရက်နေ့တွင် နောက်ထပ် နှစ်ကြိမ် မိုင်းဆွဲတိုက်ခိုက်ခဲ့သည်ဟု ဘီးလင်းပြည်သူ့ကာကွယ်ရေးတပ်ဖွဲ့(PDF) ထံမှသိရသည်။
မေလ ၁၀ ရက်နေ့ နံနက်ပိုင်းတွင် ပဲခူးတိုင်း ဝေါမြို့ဘက်မှထွက်လာသည့် စစ်ကောင်စီတပ်ယာဉ်တန်း ၁၃ စီးအား ကျိုက်ထို အင်္ဂဘိုဒေသ၌ KNU/KNLA တပ်မဟာ(၁)၊ တပ်ရင်း(၃) ပူးပေါင်းအဖွဲ့က တိုက်ခိုက်ခဲ့ ကြောင်း သိရသည်။
တိုက်ခိုက်ခံရသည့် အဆိုပါစစ်ယာဉ်တန်းအား မေလ ၁၀ ရက် နေ့လည် ၁၂ နာရီခန့်တွင် ဘီးလင်းမြို့ အထွက် ဒေါက်ရပ်ရွာတွင် KNU တပ်မဟာ(၁) တပ်ရင်း(၂)၊ တပ်ခွဲ(၃)နှင့် ဘီးလင်းပြည်သူ့ကာကွယ်ရေး တပ်ဖွဲ့ ၊ ပကဖပူးပေါင်း အဖွဲ့တို့မှ ပထမအကြိမ်တိုက်ခိုက်ခဲ့သည်ဟု သိရသည်။
ထပ်မံ၍ မွန်းလွဲ ၂ နာရီခန့်တွင် ဘီးလင်းအထွက် တောင်ကလေးရွာအနီးတွင် ဒုတိယအကြိမ် မိုင်းဆွဲတိုက် ခိုက်ခဲ့ကြောင်း သိရသည်။
“ ပထမအကြိမ် ဒေါက်ရပ်ရွာအနီးတိုက်ခိုက်မှုမှာ စစ်ကားနှစ်စီးပျက်စီးတယ်။ စစ်ကောင်စီတပ်က တစ်ဦး သေဆုံးပြီးတော့ တစ်ဦးဒဏ်ရာရခဲ့တယ်။ ဒုတိယအကြိမ် တောင်ကလေးရွာအနီး တိုက်ခိုက်မှုမှာလည်း ထိခိုက်မှု အနည်းငယ်ရှိခဲ့ပါတယ်” ဟု ဘီးလင်း ပြည်သူ့ကာကွယ်ရေးတပ်ဖွဲ့က ဆိုသည်။
ရုပ်သံ - စစ်ကောင်စီယာဉ်တန်းအား ကျိုက်ထို အင်္ဂဘိုအနီးတွင် KNU/KNLA ပူးပေါင်းတပ်ဖွဲ့မှ ပစ်ခတ် တိုက်ခိုက်စဉ်
#KNU/KNLA
