တရုတ်စစ်လေယာဉ် ၁၈ စင်းသည် ထိုင်ဝမ်၏ လေကြောင်းရန်ကာကွယ်ရေးသတ်မှတ်ဇုန် (ADIZ) အတွင်းသို့ ဝင်ရောက်ခဲ့ကြောင်း ထိုင်ဝမ်က မေ ၆ ရက်တွင် သတင်းထုတ်ပြန်ခဲ့သည်။

အဆိုပါ လေယာဉ်များတွင် J-11 တိုက်လေယာဉ် ၆ စင်း ၊ J-16 တိုက်လေယာဉ် ၆ စင်း၊ ရှီအန်း H-6 ဗုံးကြဲလေယာဉ် ၂ စင်း၊ KJ-500 ဝေဟင်ကြိုတင်သတိပေးရေးနှင့် ထိန်းချုပ်ရေးလေယာဉ် ၂ စင်း၊ ရှန်းရှီး Y-8 ရေငုပ်သင်္ဘောတိုက်ဖျက်ရေး စစ်ဆင်ရေးလေယာဉ် ၁ စင်းနှင့် ရှန်းရှီး Y-8 အီလက်ထရွန်နစ်စစ်ပွဲလေယာဉ် ၁ စင်းတို့ဖြစ်ကြောင်း Taiwan News သတင်းတွင် ဖော်ပြသည်။

ရေငုပ်သင်္ဘောတိုက်ဖျက်ရေးလေယာဉ် Y-8 နှင့် H-6 ဗုံးကြဲလေယာဉ် ၂ စင်းတို့သည် ထိုင်ဝမ်လေကြောင်းရန်ကာကွယ်သတ်မှတ်ဇုန်၏ အနောက်တောင်နှင့် အရှေ့တောင်ထောင့်များကို ဖြတ်သန်းသွားပြီး တခြားလေယာဉ်များမှာ ကျူးကျော်မှုအများဆုံးတွေ့ရသည့် အနောက်တောင်မှ ဝင်ရောက်ခဲ့ခြင်းဖြစ်သည်။

ထိုင်ဝမ်လေတပ်က ယခင်ဖြစ်စဉ်များကဲ့သို့ပင် လေယာဉ်များစေလွှတ်ပြီး ရေဒီယိုသတိပေးချက်ထုတ်ပြန်ကာ တရုတ်လေယာဉ်များကို ခြေရာခံရန်
လေကြောင်းကာကွယ်ရေးဒုံးကျည်စနစ်များ တပ်ဖြန့်ခဲ့ကြောင်း Taiwan News က ဖော်ပြသည်။ ၂၀၂၂ ခုနှစ်တွင် ယနေ့အချိန်အထိ တစ်ရက်အတွင်း လေယာဉ်ကျူးကျော်ဝင်ရောက်မှုအများဆုံးကို ဇန်နဝါရီ ၂၃ ရက်က တွေ့ရှိခဲ့ပြီး တရုတ်လေတပ် (PLAAF) မှ လေယာဉ် ၃၉ စင်း ပျံသန်းခဲ့သည်ကို တွေ့ရှိခဲ့သည်။

ထိုင်ဝမ်သည် အမေရိကန်အပါအဝင် ဒီမိုကရေစီနိုင်ငံများနှင့် ဗျူဟာမြောက်ဆက်ဆံရေးတိုးမြှင့်ခြင်းအားဖြင့် တရုတ်၏ ရန်လိုမှုကို ရင်ဆိုင်နေရသည်။ ထိုင်ဝမ်၏ လွတ်လပ်ရေးသည် စစ်ပွဲဟု အဓိပ္ပါယ်သက်ရောက်ကြောင်း တရုတ်က ခြိမ်းခြောက်ထားသည်။