အမေရိကန်လက်ထောက်နိုင်ငံခြားရေးဝန်ကြီး ဝင်ဒီရှာမန်သည် တရုတ်နိုင်ငံဆိုင်ရာ အမေရိကန်-အီးယူ တတိယအဆင့် အဆင့်မြင့်အစည်းအဝေးကို ဘရပ်ဆဲလ်တွင် ကျင်းပရန် ဥရောပပြည်ပရေးရာလှုပ်ရှားမှုဌာနမှ အတွင်းရေးမှူးချုပ် စတက်ဖန်နိုဆန်နီနိုနှင့် တွေ့ဆုံခဲ့သည်။ 

“သက်ဆိုင်ရာ တာဝန်ရှိသူများက တရုတ်နိုင်ငံနှင့် နှစ်နိုင်ငံဆက်ဆံရေးအသီးသီးအပေါ် အမြင်ချင်းဖလှယ်ခဲ့ကြသည်။ အထူးသဖြင့် ယူကရိန်းအပေါ် ရုရှား၏ လှုံ့ဆော်မှုမပါသော တရားမျှတမှုမရှိသော စစ်ပွဲနှင့်ပတ်သက်ပြီး တရုတ်နိုင်ငံနှင့် မကြာသေးမီက စေ့စပ်ဆွေးနွေးမှုအပေါ် နက်ရှိုင်းစွာ ဆွေးနွေးခဲ့ကြသည်” ဟု ဧပြီ ၂၁နှင့် ၂၂ ရက်တွင် ပြုလုပ်ခဲ့သည့် နှစ်ဘက်တွေ့ဆုံမှုအပြီးတွင် အမေရိကန်နိုင်ငံခြားရေးဝန်ကြီးဌာနက သတင်းထုတ်ပြန်ခဲ့သည်။

၎င်းတို့သည် ရုရှားအပေါ် ပိတ်ဆို့အရေးယူမှုများကို တရုတ်အနေဖြင့် ရှောင်တိမ်းခြင်း သို့မဟုတ် နှောင့်ယှက်ခြင်းမပြုရန်၊ ယူကရိန်းအပေါ် ရုရှား၏ ရန်စမှုများအတွက် မည်သည့်ပုံစံနှင့်မျှ ပံ့ပိုးမှုမပေးရန် တရုတ်အား ဆက်လက်တိုက်တွန်းမည်ဖြစ်ကြောင်း အလေးပေးပြောကြားခဲ့သလို ထိုသို့သော ပံ့ပိုးကူညီမှုသည် တရုတ်နိုင်ငံနှင့် သက်ဆိုင်ရာဆက်ဆံရေးအတွက် အကျိုးဆက်များ ရှိလာမည်ဖြစ်ကြောင်း ထပ်မံအတည်ပြုခဲ့သည်။ 

ယူကရိန်းကို ရုရှားကျူးကျော်မှုနှင့် ပတ်သက်၍ ရုရှား၏ မဟုတ်မမှန်သတင်းများကို ချဲ့ကားခြင်းအပါအဝင် တရုတ်က သတင်းအချက်အလက်များကို အကြိမ်ကြိမ် ထိန်းချုပ်ခြယ်လှယ်မှုများနှင့်ပတ်သက်၍လည်း စိုးရိမ်ကြောင်းလည်း ဖော်ပြခဲ့ကြသည်။

ထိုင်ဝမ်အရေးနှင့်ပတ်သက်၍ ၎င်းတို့သည် ဒေသတွင်းနှင့်ကမ္ဘာလုံးဆိုင်ရာ လုံခြုံရေးနှင့် သာယာဝ ပြောရေး အတွက် ထိုင်ဝမ်ရေလက်ကြားတွင် ငြိမ်းချမ်းရေးနှင့်တည်ငြိမ်ရေး၏ အရေးပါပုံကို အလေးပေး ပြောခဲ့ကြ သည်။ ရေလက်ကြားဖြတ်ကျော်ပြဿနာများကို ငြိမ်းချမ်းစွာဖြေရှင်းရေးအတွက် ထောက်ခံကြောင်း ဖော်ပြ ခဲ့ကြပြီး လက်ရှိအနေအထားကို ပျက်ပြားသွားစေသည့် မည်သည့်လုပ်ရပ်မျိုးကိုမဆို အားမပေးကြောင်း ထုတ်ဖော်ပြောဆိုခဲ့သည်။

ဘက်ပေါင်းစုံဝါဒ၊ လူ့အခွင့်အရေးနှင့် တရုတ်နိုင်ငံနှင့် ထိတွေ့ဆက်ဆံမှုဆိုင်ရာ ကိစ္စရပ်များအပေါ် အကြီးတန်းအရာရှိများနှင့် ကျွမ်းကျင်သူအဆင့်ဖလှယ်မှုများမှ ရလဒ်များကိုလည်း ပြန်လည်သုံးသပ်ခဲ့ကြသည်။

ရှင်ကျန်းရှိအခြေအနေများ၊ နိုင်ငံရေးဆိုင်ရာပညာပေးစခန်းကွန်ရက်တည်ရှိမှု၊ ကျယ်ကျယ်ပြန့်ပြန့် စောင့်ကြည့်မှု၊ ဝီဂါနှင့်တခြားတိုင်းရင်းသားလူနည်းစုများ၏ ဘာသာရေးလွတ်လပ်မှုနှင့် ယုံကြည်မှုအပေါ် စနစ်တကျ ကန့်သတ်ခြင်းနှင့် အဓမ္မလုပ်အားခိုင်းစေမှုများကိုလည်း ရှုတ်ချခဲ့ကြသည်။