စစ်ကိုင်းတိုင်း၊ ဆားတောင်မြို့နယ်၊ ညောင်ပင်ရှည်ကျေးရွာအတွင်းသို့ စစ်ကြောင်းထိုးလာသည့် စစ်ကောင်စီ တပ်မ(၃၃)နှင့် ပျူစောထီးများအား ဧပြီလ ၂၂ ရက်နေ့ နံနက် ၁၀ နာရီခန့်တွင် ဒေသခံ ကာကွယ်ရေးတပ်ဖွဲ့များက ပူးပေါင်းတိုက်ခိုက်ခဲ့ကြောင်းသိရသည်။
တိုက်ပွဲဖြစ်ပွားချိန် လေးနာရီခန့်ကြာမြင့်ခဲ့ပြီး စစ်ကောင်စီ၏ အုန်းတောယန္တယားတပ်မှ Mi-35 တိုက်ခိုက် ရေးရဟတ်ယာဉ်ဖြင့် လေကြောင်းပစ်ကူရောက်ရှိလာသောကြောင့် ကာကွယ်ရေးတပ်များ ဆုတ်ခွာခဲ့ရ ကြောင်း Burma Phoenix Organization-BPO အဖွဲ့ထံက သိရသည်။
အဆိုပါထိတွေ့တိုက်ပွဲတွင် စစ်ကောင်စီမှ ၃၀ ဦးခန့်သေဆုံးခဲ့သည်။ ကာကွယ်ရေးအဖွဲ့များမှ ရဲဘော် ငါးဦး သည်လက်နက်ကြီးထိမှန်ဒဏ်ရာရရှိခဲ့ပြီး Zero ပြောက်ကျားတပ်ဖွဲ့မှ ရဲဘော်တစ်ဦးသည်လည်း ပြန်လည်ဆုတ်ခွာချိန်တွင် မြစ်အတွင်း ရေစီးဖြင့် မျောပါကာ ကျဆုံးခဲ့ကြောင်းသိရသည်။
“ အဲ့ဒီရွာမှာတော့ အမြဲမရှိဘူး။ ဆားတောင်မြို့နယ်ထဲမှာ သောင်းကျန်းနေတာ။ သူတို့က တစ်ရွာတည်းကို လုပ်တာမဟုတ်ဘူး။ ရွာစဉ်လှည့်ပြီးတော့ကိုလုပ်နေတာ။ အဆိုးဆုံးကတော့ ပျူစောထီးပေါ့။ သူတို့ မျက် မုန်းကျိုးတဲ့ရွာဆိုရင် စစ်ကောင်စီနဲ့ပေါင်းပြီး အမြဲဝင်မွှေကြတာ”ဟု Burma Phoenix Organization-BPO အဖွဲ့တာဝန်ရှိသူကပြောသည်။
အင်အား ၁၀၀ ခန့်ရှိသော စစ်ကောင်စီစစ်ကြောင်းသည် ဆားတောင်မြို့နယ်အတွင်းရှိကျေးရွာများသို့ စီးနင်းဝင်ရောက်ကာ ပြည်သူများအား ညှင်းပန်းနှိပ်စက်ခြင်း၊ ပစ္စည်းများသိမ်းယူခြင်း၊ ဖျက်ဆီးခြင်းများ ပြုလုပ်လျက်ရှိကြောင်း Burma Phoenix Organization-BPO အဖွဲ့ထံမှ သိရသည်။
စစ်ကောင်စီမှ ကျေးရွာအတွင်းသို့ လက်နက်ကြီးလက်နက်ငယ်များဖြင့်ပစ်ခတ်ကာ ဝင်ရောက်စီးနင်း သောကြောင့် လက်နက်ကြီး ထိမှန်သည့်ရွာသားများလည်းရှိနိုင်ကြောင်းသိရပြီး အတည်မပြုနိုင်သေးပေ။
