ဧပြီလ ၁၁ ရက်

မကွေးတိုင်း၊ ပေါက်မြို့နယ် အတွင်းရှိ စစ်ဆေးရေးဂိတ်များတွင် ယခုရက်ပိုင်း အသင့်စား ရှူးရှဲလဖက်ထုပ်နှင့် အသင့် စားသောက်နိုင်သည့် စားသောက်ကုန်များကို ယူဆောင်ခွင့် မပြုတော့ကြောင်း ဒေသခံထံမှ သိရသည်။

အစစ်အဆေးတင်းကြပ်သည်ဟု နာမည်ကြီးနေသည့် ပေါက်မြို့နယ်တွင် ဂိတ်သုံးခုရှိပြီး သရက်တောဂိတ်မှာ ပို၍ တင်းကြပ်မှု ပြုလုပ်နေခြင်း ဖြစ်သည်ဟုလည်း သိရသည်။

''သရက်တောဂိတ်မှာအရမ်းဆိုးတယ်။ကားတွေဆိုင်ကယ်တွေစစ်ပြီး လူငယ်တွေဆိုရင် နေပူထဲမှာ တစ်နာရီနီးပါး ရပ်ခိုင်းပြီးစစ်တာ။ တချို့မင်းတပ်ကနေ ဆင်းလာတဲ့ လူငယ်တွေဆိုရင် တစ်ကိုယ်လုံးအဝတ်တွေချွတ်ပြီးတော့တောင်စစ်တယ်။ အဲဒီလောက်ထိ ကြမ်းတာ။နောက်ဆုံးလူသေအလောင်းတွေတောင်အလွတ်မပေးဘူး အနှံ့နှိုက်ပြီးစစ်တာ'' ဟုအစစ်ဆေးခံခဲ့ရသူ တစ်ဦးက ဆိုသည်။

လက်ရှိ ပေါက်မြို့နယ်အတွင်းရှိ စစ်ဆေးရေး ဂိတ်များတွင် သယ်ခွင့်မပြုသည့်ကုန်ပစ္စည်းများမှာ အသင့်စား ငပိ ၊ရှူးရှဲ ၊အသင့်စားမုန့် အမျိုးမျိုး၊ မြေဆီမြေသြဇာအမျိုးမျိုး၊ပိုးသတ်ဆေးများ၊ဘိလပ်မြေ၊သံချောင်းအမျိုးမျိုး၊ဆန်၊လောက်လေး၊ မျှော့သရေကြိုးများ၊ ကော်ပိုက်ချောင်း၊ သံပိုက်ချောင်းများ၊ဘထ္ထရီ၊ မီးကြိုးများ၊ဓာတ်ဆီ၊ ဆိုင်ကယ်ပစ္စည်းများ၊ AB ကော်၊ ယိုးဒယားကော်၊ ပါဝါဓာတ်ခဲအသေး၊အကြီး၊နိုင်လွန်ကြိုးအသေး၊ စက်ဘီးဘောစေ့များနှင့်ဆေးဝါးပစ္စည်းများကို လုံးဝသယ်ဆောင်ခွင့် မပြုတော့ကြောင်း သိရသည်။