ဆောင်းရာသီအားလပ်ရက်ပြီးနောက် ကျောင်းပြန်ရောက်လာကြသည့် တိဗက်ကလေးများသည် ယခုအခါ တရုတ်ဘာသာဖြင့်သာ သင်ကြားသည့် အတန်းထဲသို့ တက်ရောက်နေကြပြီဖြစ်သည်။
တိဗက်ကျောင်းသားများအား မိခင်ဘာသာစကား၊ ယဉ်ကျေးမှုတို့နှင့်ချိတ်ဆက်မှု အားနည်းစေရန် ရည်ရွယ်ထားသည်ဟူသော မူဝါဒများကို အာဏာပိုင်များက တွန်းအားပေးနေကြောင်း ဝေဖန်သူများက ပြောကြားသည်။
ဆရာ/ဆရာများသည်လည်း ကလေးများအား တရုတ်ဘာသာစကား စတင်သင်ကြားပုံဆိုင်ရာ အလုပ်ရုံဆွေးနွေးပွဲများကို တက်ရောက်နေကြကြောင်း အဆိုပါဒေသတွင်နေထိုင်သည့် တိဗက်သတင်းရင်းမြစ်က RFA သို့ ယခုသီတင်းပတ်တွင်ပြောသည်။
“ဒီအပြောင်းအလဲတွေရဲ့ နောက်ကွယ်က ရည်ရွယ်ချက်က ကျောင်းသားတွေရဲ့ အတွေးအခေါ်ကို ပြောင်းပစ်ဖို့ပါပဲ” ဟု လုံခြုံရေးအကြောင်းပြချက်ဖြင့် အမည်မဖော်လိုသူတစ်ဦးက ပြောသည်။
“ဥပမာတိဗက်မြို့တော် လာဆာက ကျောင်းတွေမှာ ဘာသာရပ်အားလုံးကို အခု တရုတ်ဘာသာနဲ့ သင်ကြားနေပါပြီ။ကျောင်းတချို့က ကျောင်းသားတွေကို ဘယ်လိုထင်လဲလို့ မေးကြည့်တော့ အများစုက တိဗက်ဘာသာနဲ့ သင်ကြားရတာကိုပဲ ပိုကြိုက်တယ်လို့ ပြောကြတယ်” ဟု ဆိုသည်။
တရုတ်နိုင်ငံ အနောက်မြောက်ပိုင်း ချင်းဟိုင်ပြည်နယ်ရှိ ဂိုလော့တိဗက်ကိုယ်ပိုင်အုပ်ချုပ်ခွင့်ရစီရင်စုတွင် ယခုအခါတွင် ဖတ်စာအုပ်များအားလုံးကို တရုတ်ဘာသာသို့ ဘာသာပြန်ဆိုထားပြီးဖြစ်သည် ဟုဆိုသည်။ တိဗက်ဘာသာစကားအတန်းမှလွဲ၍ သင်္ချာ၊ သိပ္ပံနှင့် အနုပညာဘာသာရပ်ကဲ့သို့ အခြားဘာသာရပ်အားလုံးကို တရုတ်ဘာသာဖြင့် သင်ကြားလျက်ရှိသည်။
ယခုအခါတွင် တိဗက်ကျောင်းများအားလုံးတွင် တရုတ်ဘာသာဖြင့် သင်ကြားခြင်းအပေါ် အလေးပေးမှု တိုးမြှင့်လာခဲ့ပြီး တရုတ်သမ္မတ ရှီကျင့်ဖျင်၏ နိုင်ငံရေးအတွေးအခေါ်သည် ယခုအခါ သင်ကြားပို့ချမှုအတွက် အဓိကအကြောင်းအရာတစ်ခု ဖြစ်လာနေပြီဖြစ်သည်။
တရုတ်အာဏာပိုင်များသည် ငယ်ရွယ်သောတိဗက်လူမျိုးများနှင့် ၎င်းတို့၏ အမျိုးသားယဉ်ကျေးနှင့် ကိုယ်ပိုင်လက္ခဏာချိတ်ဆက်မှုအပေါ် သက်ရောက်မည်ကို စိုးရိမ်နေသော အခြားသူများနှင့် မိဘများ၏ကန့်ကွက်မှုကို တားဆီးနိုင်ရန် ဤပြောင်းလဲမှုဆိုင်ရာ အများပြည်သူဆွေးနွေးပွဲများကိုလည်း နှိပ်ကွပ်လျက်ရှိသည်။
