နိုဝင်ဘာ ၉ ၊ ၂၀၂၀
ကယားပြည်နယ်အတွင်း လွှတ်တော် ၃ ရပ်အတွက် မဲဆန္ဒနယ် ၃၄ နေရာအနက် ကယားပြည်နယ်ဒီမိုကရက်တစ်ပါတီက (၈)နေရာ၊ USDP က (၆)နေရာ၊ NLD က နေရာ(၂၀) အနိုင်ရထားတယ်လို့ ကနဦးသတင်းရရှိထားပါတယ်။
ကယားပြည်နယ် ဒီမိုကရက်တစ်ပါတီ (KySDP) ကဖရူဆိုမြို့နယ်တွင် အပြတ်အသတ်အနိုင်ရထားပြီး ရှားတော မြိုနယ်မှာလည်း (၃)နေရာအနိုင်ရတယ်လို့သိရပါတယ်။
ဓာတ်ပုံ - ကိုဇာနည်
ဒီမော့ဆို၊ မယ်စဲ့၊ လွိုင်ကော်မြို့နယ် တွေမှာတော့ ပြည်နယ်အခြေစိုက်တိုင်းရင်းသားပါတီ (၂)ခုဖြစ်တဲ့ ကယားပြည်နယ်ဒီမိုကရက်ပါတီ နှင့် ကယန်းအမျိုးသားပါတီတွေက အရေးနိမ့်ခဲ့ပြီး NLD ပါတီ ကိုယ်စားပြု လွှတ်တော်ကိုယ်စားလှယ်လောင်းတွေက အနိုင်ရရှိကြောင်း သိရပါတယ်။
“ မဲရုံတွေကို ရေတွက်ပြီးပြီ။ ရေတွက်ပြီးတဲ့အချိန်မှာတော့ နိုင်မယ့် အနေအထားမျိုးတော့ ရှိတာပေါ့လေ။ ဒါပေမယ့် ရွေးကောက်ပွဲ ကော်မရှင် အဖွဲ့ခွဲကနေ အတည်ပြုလို့မရသေးဘူးပေါ့။ အဲဒီလိုမျိုးလေး တော့ သိထားတယ်” လို့ လွိုင်ကော်မြို့နယ် မဲန္ဒနယ် အမှတ် ၂ က ပြည်နယ် လွှတ်တော် ကိုယ်စားလှယ်လောင်း ဦးခင်မောင်ဖြူက ပြောပါတယ်။
ဓာတ်ပုံ - ကိုဇာနည်
ဦးခင်မောင်ဖြူဟာ လက်ရှိ ပြည်နယ်အစိုးရရဲ့ လျှပ်စစ် စွမ်းအင်ဝန်ကြီး လည်းဖြစ်ပါတယ်။
KySDP ပါတီက လွှတ်တော်ကိုယ်စားလှယ် လောင်းတွေဖြစ်တဲ့ ပြည်နယ်လွှတ်တော် ရှားတော မဲဆန္ဒနယ် အမှတ် ၁က ခူးမိုင်ကယ် ဘိုးရယ်၊ ပြည်သူ့ လွှတ်တော် မဲဆန္ဒနယ်က မော်မိုးမြာ နှင့် အမျိုးသား လွှတ်တော် မဲဆန္ဒနယ်မှာ ခူးညေး ရယ်တို့က အနိုင်ရရှိထားတယ်လို့ သိရပါတယ်။
