စစ်ကိုင်းတိုင်း၊ ကနီမြို့နယ် ချစ်တွင်းမြစ်အတွင်း သွားလာနေသည့် စစ်ကောင်စီတပ် ထောက်ပို့သင်္ဘော(ဖလက် မော်တော်) နှစ်စင်းကို နိုဝင်ဘာ ၆ရက်၊ ည ၁၀နာရီဝန်းကျင်က သိမ်းပိုက်နိုင်ခဲ့ကြောင်း ကျောက်လုံးကြီး(KLG) တပ်မဟာတာဝန်ရှိသူက မဇ္ဈိမကိုပြောသည်။
စစ်ကိုင်းတိုင်း၊ မော်လိုက် မြို့နယ်မှ စုန်ဆင်းလာပြီး ကနီမြို့နယ်၊ ချင်းတွင်းမြစ်ကြောင်းတွင် သောင်တင်နေသည့် သင်္ဘော ခုနစ်စီးကို နိုဝင်ဘာ ၅ရက် မှစတင်တိုက်ခိုက်ရာ ၆ရက်နေ့ ညပိုင်းတွင် နှစ်စီးကို သိမ်းယူနိုင်ခဲ့ခြင်းဖြစ်သည်။
"ထောက်ပို့သင်္ဘော ခုနစ်စင်းထဲကမှ နှစ်စင်းကို ကျွန်တော်တို့အဖွဲ့နဲ့ကာကွယ်ရေးတပ်ဖွဲ့တွေပူးပေါင်းပြီး အောင်အောင်မြင်မြင်နဲ့ တိုက်ခိုက်သိမ်းပိုက်နိုင်ခဲ့ပါတယ်ခင်ဗျ။ ထောက်ပို့ သင်္ဘော နှစ်စီးပေါ်မှာက ဘာပစ္စည်းမှပါမလာတော့ ဒီသင်္ဘော နှစ်စီးပဲ သိမ်းဆည်းရမိတယ်။"ဟု KLG တာဝန်ရှိသူက ပြောသည်။
သိမ်းဆည်းရမိသည့် သင်္ဘော နှစ်စင်းပေါ်မှ စစ်ကောင်စီတပ်ဖွဲ့ဝင်များသည် ကျန်သင်္ဘောပေါ်သို့ ထွက်ပြေးပူးပေါင်းသွားပြီး အပြန်အလှန်ပစ်ခတ်မှု တနာရီကျော်ကြာမြင့်ခဲ့ကာ စစ်ကောင်စီတပ်ဖွဲ့ အထိနာသွားကြောင်းသိရသည်။
"သူတို့ကထွက်ပြေးပြီး ဟိုဘက် သင်္ဘောတွေမှာ သွားပေါင်းတယ်။ကျွန်တော်တို့နဲ့ အပြန်အလှန်ပစ်ခတ်တာတွေရှိတယ်။ သူတို့ အထိနာပါတယ်။ ကျွန်တော်တို့ဘက်က စနိုက်ပါနဲ့ တည်ပစ်တာတွေရှိတယ်။"ဟု တိုက်ခိုက် မှုတွင်ပါဝင်သည့် ကာကွယ်ရေးတပ်ဖွဲ့ဝင် တဦးကပြောသည်။
အဆိုပါတိုက်ခိုက်မှုကို ကျောက်လုံးကြီး(KLG)တပ်မဟာ၊ ယင်းမာပင်ခရိုင်၊တပ်ရင်း(၂၁)၊ တပ်ရင်း(၂၂)၊ တပ်ရင်း(၂၃ )တို့ ပူးပေါင်းလုပ်ဆောင်ခဲ့ကြောင်းသိရသည်။
ကျန်ရှိနေသည့် စစ်ကောင်စီတပ် ထောက်ပို့သင်္ဘော ငါးစင်းမှာ ယနေ့ နိုဝင်ဘာ ၇ရက်၊ နံနက်ပိုင်းစတင်၍ ကနီမြို့နယ် အောက်ဘက်သို့ စုန်ဆင်းသွားကြောင်း သိရသည်။
စာတည်း - သန့်ဇော်(သန်လျင်)
