စစ်ကိုင်းတိုင်း၊ ကနီမြို့နယ်မှာ စစ်ကောင်စီတပ်စစ်ကြောင်းဝင်ရောက်မီးရှို့မှုကြောင့် စစ်ဘေးသင့်ခဲ့သည့် ကျေးရွာဒေသခံများအား အခမဲ့ရွေ့လျားဆေးဝါးကုသပေးနေကြောင်း ကနီမြို့နယ် နွေဦးတော်လှန်ရေးသပိတ်အင်အားစု တာဝန်ရှိသူက မဇ္ဈိမကို ပြောသည်။
"သပိတ်အင်အားစုရဲ့ ရွေ့လျားဆေးဝါးကုသပေးခြင်းကို CDM ဆရာဝန်၊ ဆရာမတွေ၊ စေတနာ့ ဝန်ထမ်းတွေနဲ့ ဆောင်ရွက်နေတာပါ။ ကနီမြို့နယ် အတွင်းမှာ အခမဲ့ ဆေးဝါးကုသပေးနေတာ နှစ်နှစ်ရှိပါပြီ"ဟု ၎င်းတာဝန်ရှိသူဆိုသည်။
၎င်းအစီအစဉ်အနေဖြင့် ယမန်နေ့ ဇွန်လ ၁ ရက်နေ့တွင် ကနီမြို့နယ် အတွင်း စစ်ဘေးသင့်ကျေးရွာ လေးရွာ မှ ဒေသခံပြည်သူ ၁၃၃ ဦးကို အခမဲ့ ဆေးဝါးကုသပေးခဲ့ပြီး လူနာ ရှစ်ဦးကိုလည်း အသေးစား ခွဲစိပ်ကုသမှုပေးခဲ့ကြောင်း ကနီမြို့နယ် နွေဦးတော်လှန်ရေးသပိတ်အင်အားစုမှထုတ်ပြန်သည်။
ကနီမြို့နယ်တွင် စစ်ကောင်စီတပ်စစ်ကြောင်းများ မကြာခဏဝင်ရောက်နေပြီး စစ်ဘေးသင့်သူများအား ရွေ့လျားဆေးဝါးကုသပေးနိုင်ရန်အတွက် ဆေးဝါးပစ္စည်း အထောက်အပံ့ အကူအညီများ လိုအပ်နေကြောင်း ဒေသခံများက ပြောသည်။
စာတည်း - သန့်ဇော်(သန်လျင်)