အသေးစားအလတ်စားလုပ်ငန်းများ (SMEs) များကို ကျောရိုးပြုသော စီးပွားရေးစနစ် ထူထောင်မည်

"ရန်ကုန်တိုင်းဒေသကြီး အစိုးရက SME အေဂျင်စီကို ဦးဆောင်မှာဖြစ်ပါတယ်။ ဒီ SME အေဂျင်စီကနေပြီးတော့ အသေးစိတ် ကျွန်တော်တို့ ချေးငွေထုတ်ပေးလိုက်တဲ့ သူကို ကြီးပွားချမ်းသာအောင် ပြုစုပျိုးထောင်ပါမယ်။ ဒီအတွက် ကျွန်တော် တို့ စနစ်တကျစိစစ်ပါမယ်" ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ဖေဖော်ဝါရီလ ၁ ရက်နေ့က ရန်ကုန်မြို့ ကုန်သည်စက်မှုအသင်းချုပ်တွင် ပြုလုပ်သော ဒုသမ္မတ ဦးမြင့်ဆွေနှင့် စီးပွားရေးလုပ်ငန်းရှင်များ ပုံမှန်တွေ့ဆုံပွဲအခမ်းအနားတွင် ပြောဆိုခဲ့သည်။

ထို့အပြင် ၀န်ကြီးချုပ်က အသေးစားအလတ်စားစီးပွားရေးလုပ်ငန်းများ (SME) များကို ကျောရိုးပြုသော စီးပွားရေးစနစ်ကို ထူထောင်သွားမည်ဖြစ်ကာ  လုပ်ငန်းများအတွက် လိုအပ်သော ချေးငွေများကို စနစ်တကျ စီမံခန့်ခွဲသွားပြီး အောင်မြင်သော စီးပွားရေးလုပ်ငန်းရှင်များဖြစ်အောင် ထိန်းညှိုဆောင်ရွက်သွားမည်ဟုလည်း အဆိုပါ အခမ်းအနားတွင် ပြောဆိုခဲ့သည်။

ယင်းကဲ့သို့ အကူအညီပေးနိုင်ရေးအတွက် လက်ရှိရန်ကုန်တိုင်းဒေသကြီးအတွင်းက အသေးစားနဲ့ အလတ်စားစက်မှုလုပ်ငန်းများကို စာရင်းကောက်ယူခြင်းကို ဆောင်ရွက်နေပြီး ပထမအဆင့်အနေနှင့် လုပ်ငန်းရှင် ၁၀၀ နီးပါးကို စတင်ဆောင်ရွက်သွားမှာဖြစ်သည်ဟု သိရသည်။ 

သတင်းပေးပို့သူ- အာကာ (မဇ္ဈိမ)