တောင်ဒဂုံရှိ အသေးစားအလတ်စားလုပ်ငန်းစာရင်းကို ရှေ့ပြေးစီမံချက်အနေနှင့် ကောက်ယူမည်

ရန်ကုန်တိုင်းဒေသကြီးအစိုးရအနေနှင့် ရန်ကုန်တိုင်းအတွင်း မြို့နယ် ၄၅ မြို့နယ်မှ SME အသေးစားအလတ်စား လုပ်ငန်းများ စာရင်းကို အောက်တိုဘာလမှ စတင်ကောက်ယူဖို့ရှိရာ ရှေ့ပြေးစီမံကိန်းအဖြစ် တောင်ဒဂုံမြို့နယ်တွင် စတင်သွားမည်ဟု တိုင်းဒေသကြီးဝန်ကြီးချုပ် ဦးဖြိုးမင်းသိန်းက စက်တင်ဘာလ ၂၃ ရက်နေ့ ကုန်သည်စက်မှုအသင်းချုပ်ရုံးတွင် ပြုလုပ်သော ဒုတိယသမ္မတ ဦးမြင့်ဆွေနှင့် လုပ်ငန်းရှင်များ ပုံမှန်တွေ့ဆုံပွဲအခမ်းအနားတွင် ပြောဆိုသည်။

စာရင်းကောက်ယူပြီးလျှင် အလားအလာရှိသော SME များကို နည်းပညာနှင့် ချေးငွေများ ထောက်ပံ့ရန်စီစဉ်ထားသည်ဟု သိရသည်။ ငွေကြေးကူညီရန်အတွက် မကြာခင် ပြဌာန်းရန်ရှိသည့် ရန်ကုန်မြို့တော်စည်ပင်သာယာရေးဥပဒေနှင့်အညီ ရန်ကုန်မြို့တော်ဘဏ်ကို အဆင့်မြှင့်တင်သွားမည်ဟု ၀န်ကြီးချုပ်က အဆိုပါအခမ်းအနားတွင် ပြောဆိုထားသည်။