နေရာဇီဇာမကြောင်သည့် အသီး

ခူးဆွတ်ချိန်နီးကပ်နေသည့် စပျစ်စိုက်ခင်းထဲမှတောင်သူတစ်ဦး။ မိမိဒေသနှင့် ကိုက်ညီသည့် စိုက်နည်းစနစ် အသုံးပြုပါမှ သွင်းအားစုဟုခေါ်ကြသည့် မြေသြဇာ၊ ပိုးသတ်ဆေးကုန်ကျစရိတ် ပိုမိုသက်သာပေမည်။
Y Shape (အင်္ဂလိပ်အက္ခရာYပုံစံ) စနစ်ဖြင့် စိုက်ပျိုးထားသည့် စပျစ်ခြံတစ်ခု။ ရမည်းသင်းဒေသတွင် အများအားဖြင့် စင်တင်စနစ်ကိုတွေ့ရသော်လည်း ယမကာထုတ်လုပ်မည့် စပျစ်အတွက်ဆိုလျှင် Y Shape စနစ်ဖြင့်စိုက်ပျိုးကြသည်။
စပျစ်ပင်သည် ရေကြိုက်သည့်နှစ်ရှည်နွယ်ပင်တစ်မျိုးဖြစ်ပြီး ငါးရက်လျှင်တစ်ကြိမ်ခန့် ရေသွင်းပေးရသည်။ ရေကြိုက်သည် ဆိုသော်လည်း ရေဝပ်သည့်မြေတွင် စပျစ်ဖြစ်ထွန်းနိုင်မည် မဟုတ်ပေ။
စပျစ်ခူးဆွတ်ပြီးလျှင် သုံးပိဿာ၊ လေးပိဿာဆံ့သည့် ခြင်း၊ စက္ကူပုံးများဖြင့် ထုတ်ပိုးကြသည်။ စပျစ်သီးလှိုင်လှိုင်ထွက်ပေါ်သည့် လများမှာ မတ်၊ဧပြီလ၊ သြဂုတ်လတို့တွင်ဖြစ်ပြီး ကျန်ကာလများတွင်လည်း အနည်းအကျဉ်း ထွက်ရှိတတ်သည်။
ထုတ်ပိုးပြီးပါက တစ်နိုင်ငံလုံးဖြန့်ပေးမည့် ကားဂိတ်များသို့ ပို့ဆောင်ရသည်။
ထုတ်ပိုးပြီးသားစပျစ်ကို ဆိုင်ကယ်ဖြင့် တင်သွားပြီး ကားလမ်းအထိ သို့မဟုတ် ကားဂိတ်အထိ ပို့ဆောင်ကြရသည်။
ဝိုင်စပျစ်အတွက် ဝိုင်အရက်ချက်ကုမ္ပဏီတချို့ကမည်သည့်ဈေးနှုန်းဖြင့် မည်မျှဝယ်ယူမည် ဆိုသည်ကိုစာချုပ် ကြိုတင်ချုပ်ထားလေ့ ရှိသည်။ ကုမ္ပဏီကားက စိုက်ခင်းဘေးအထိမောင်းလာပြီး စပျစ်ပုံးကို လာရောက် သယ်ဆောင်မည် ဖြစ်သည်။ အသီးစားစပျစ်ကမူ ဝယ်လက် ရှာဖွေရန် လိုအပ်သည်။ ထို့အပြင် ဈေးကွက်တင်ရန် ကားဂိတ်အထိသွားရောက် ပို့ဆောင်ပေးရသည်။
ရမည်းသင်းမြို့တွင် တစ်နိုင်ငံလုံးသို့ စပျစ်တင်ပို့ရောင်းချသည့် ကားဂိတ်သုံးခုထက်မနည်းရှိနေပြီး တင်ပို့မှုအားလုံး၏ ၆၀ရာခိုင်နှုန်းမှာ ရန်ကုန်မြို့ဖြစ်သည်။

ဒေသအများအပြားတွင် ဖြစ်ထွန်းနိုင်သည့် စပျစ်ကိုအရည်အသွေးကောင်းရရှိရေးအတွက် စိုက်မည့်ဒေသနှင့် သင့်လျော်သည့် နည်းနာရွေးချယ်ရန် လိုအပ်သည်
အောင်ငြိမ်းချမ်း / Myanmar Now
မြန်မာနိုင်ငံတွင် စပျစ်အများဆုံးစိုက်ပျိုးသည့်ဒေသမှာ မန္တလေးတိုင််းဒေသကြီး ရမည်းသင်းမြို့နယ် ဖြစ်သည်။
မြန်မာပြည်ဒေသအများစုတွင် စပျစ်စိုက်ပျိုးဖြစ်ထွန်းနိိုင်သော်လည်းရာသီဥတု၊ မြေအမျိုးအစားတို့ တူညီခြင်းမရှိသောကြောင့် စပျစ် စိုက်လိုသူသည် မိမိဒေသနှင့် ကိုက်ညီမည့် စိုက်ပျိုးနည်းစနစ်၊ ပြုပြင်ထိန်းသိမ်းပုံတို့ကိုလေ့လာသိရှိထားရသည်။
ထိုသို့ သိရှိထားမှ သီးနှံဖြစ်ထွန်းအောင်မြင်ခြင်း၊  အရည်အသွေးကောင်းခြင်း၊ စျေးကွက်ဝင်ခြင်းအဆင့်တို့ကိုတက်လှမ်းနိုင်မည်ဖြစ်သည်။
စိုက်ပျိုးသူပေါများလာပါကစပျစ်သီးဖျော်ရည်၊စပျစ်သီးခြောက်၊စပျစ်ယို၊စပျစ်စေ့အဆီ၊စပျစ်စေ့အမှုန့်စသည့် တန်ဘိုးမြင့်ထုတ်ကုန်များ၊ ပြည်ပပို့ကုန်များကိုထုတ်လုပ်နိုင်မည်ဖြစ်သည်။