ရန်ကုန် (မဇ္ဈိမ) ။ ။ ရန်ကုန်မြို့ပတ် ရထားတစီးမှ နောက်ဆုံးတွဲသည် ကမာရွတ်မြို့နယ်အတွင်း ကမာရွတ် ဘူတာနှင့် လှည်းတန်းဘူတာ အကြားတွင် ကြာသပတေးနေ့ မွန်းလွဲ ၁ နာရီ ၅၅ မိနစ်အချိန်က ပြုတ်ကျကျန်ပြီး လမ်းချော် တိမ်းမှောက်မှု ဖြစ်ပွားရာ လူလေးဦး ပြင်းထန်စွာ ဒဏ်ရာ ရရှိသွားသည်။
အင်းစိန်မှ ရန်ကုန်ဘူတာကြီးသို့ မောင်းနှင်လာသည့် မြို့ပတ် ရထားအမှတ် (တ-၈) သည် ကမာရွတ် ဘူတာ
ကျော်လွန်ပြီးနောက် နောက်ဆုံးလူစီးတွဲ ပြုတ်ထွက်ပြီး လမ်းဘေးသို့ တိမ်းမှောက်ခဲ့ရာမှ အမျိုးသား ၃ ဦးနှင့်
အမျိုးသမီး ၁ ဦး ဒဏ်ရာရရှိခဲ့ခြင်း ဖြစ်သည်။ လမ်းချော်တိမ်းမှောက်ခဲ့သည့် ရထားတွဲအတွင်း လူဦးရေ ၂၀ ခန့်
သာ ပါဝင်ပြီး ထိခိုက် ဒဏ်ရာရသူများမှာ အင်းစိန် ဘူတာရုံပိုင်ကြီး ဦးကျော်ရွှေ (၅၆) နှစ်၊ ဦးရဲဝင်း (၅၇) နှစ်၊
ကိုလှဦး (၂၇) နှစ် နှင့် ဒေါ်နော်လီခင် (၄၉) နှစ်တို့ ဖြစ်သည်။
“ အင်းစိန်ကနေ ၁ နာရီ ၃၅ မိနစ်မှာ ထွက်လာတာ။ ကျနော်လဲ နောက်တွဲ ပြုတ်သွားတယ်ဆိုတာ သိသိခြင်း
ရထားကို ရပ်လိုက်တာပဲ။” ဟု ရထားစက်ခေါင်း မောင်းနှင်သူ ဦးဝင်းမင်းဦးက ပြောသည်။
အခင်းဖြစ်ပွားမှုကို မျက်မြင်ကြုံတွေ့ခဲ့သည့် အနီးဝန်းကျင် နေသူတဦးက “ ကျနော်တို့က ဈေးဆိုင်ထဲမှာ ထိုင်
နေတာ။ 'ဂလုံး' ဆိုပြီး အသံကြီးထွက်လာလို့ ကြည့်လိုက်တော့ ရထားကနေ တွဲတတွဲ ကျန်ခဲ့ပြီး သူက
တစောင်းကြီး ကိုက် ၁၅၀ လောက် ဆက်သွားနေပီးမှ လဲသွားတာ။ အဲ့တာ အနားက လူတွေက အားလုံးပြေးပြီး
လှေကားတွေ ခုံတွေရှာပြီး ခရီးသည်တွေ ဆွဲထုတ်ကြတာ။ ” ဟု ပြောသည်။
ရထားတွဲ တိမ်းမှောက်ရာသို့ ရန်ကုန်တိုင်း ဒေသကြီး ပို့ဆောင်ရေးဝန်ကြီး ဦးအောင်ခင်နှင့် စစ်တိုင်းမှူးတို့ပါ လာရောက်ခဲ့ပြီး ရန်ကုန်တိုင်း စစ်တိုင်းမှူးက ဖြစ်စဉ်မှာ ပြင်ပ ပယောဂကြောင့် ဖြစ်ခြင်း မဟုတ်ပဲ သဘာဝ အလျောက် ဖြစ်ပွားခြင်းဟု သတင်းထောက်များကို ပြောဆိုခဲ့ပြီး ဖြစ်ရပ်နှင့် ပတ်သတ်၍ အပြုသဘောဖြင့်
ရေးသားရန် သတင်းထောက်များကို ပြောသည်။
     |
