ဒီဇင်ဘာလ ၂၁ ရက် ။           ။ ရခိုင်ပြည်နယ်စစ်တွေမြို့၌ ရိုးမအလင်းတက္ကသိုလ်ဝင်တန်း အခမဲ့ပညာသင်ကျောင်းမှ ဒုတိယအကြိမ်မြောက် မြန်မာစာ (ဘာသာရပ်) နှင့် အင်္ဂလိပ်စာ (Letter & Essay) စွမ်းရည်ပြိုင်ဆုပေးပွဲအခမ်းအနားကို ဒီဇင်ဘာ ၂၀ ရက်နေ့က ကျင်းပပြုလုပ်ခဲ့သည်။

အဆိုပါ အခမဲ့ပညာသင်ကျောင်းတွင် နှစ်စဉ် ဒီဇင်ဘာ ၁၅ ရက်နေ့၌ ပြိုင်ပွဲကျင်းပလေ့ရှိကာ မည်သည့် ကျောင်းသား/ ကျောင်းသူမဆို ဝင်ရောက်ဖြေဆိုနိုင်ကြောင်းနှင့် ဂုဏ်ထူးဖြင့်အောင်မြင်သူများကို အသိအမှတ် ပြု ဆုများချီးမြင့်ပေးနေခြင်းဖြစ်ကြောင်း သိရသည်။

“ကျနော်တို့ ရခိုင်ပြည်ပညာရေး တိုးတက်မြင့်မားလာစေရန် တစ်ဖက်တစ်လမ်းမှ ကျနော်တို့ပုဂ္ဂလိက ဆရာများ အနေဖြင့် ပံ့ပိုးကူညီနိုင်ရန် ဒီပြိုင်ပွဲကိုကျင်းပရတဲ့ ရည်ရွယ်ချက်ဖြစ်ပါတယ်။ ရခိုင်ပြည်မှာ ၆ ဘာသာ ဂုဏ်ထူး ရှင်များ ပေါ်ထွန်းလာစေရေးအတွက် တစ်ဖက်တစ်လမ်းက ဒီစာမေးပွဲကို အထောက်အကူပြုစေလိုသော ရည်ရွယ်ချက်ပါ။” ဟု ဆုပေးပွဲအား ဦးစီးဆောင်ရွက်နေသည့် ပုဂ္ဂလိကဆရာ များအသင်း (စစ်တွေ) အဖွဲ့ ဥက္ကဌ ဦးမြင့်သောင်းက ပြောသည်။

ကျူရှင်မတက်နိုင်သော ဆင်းရဲနွမ်းပါသည့် ကျောင်းသား/ကျောင်းသူနှင့် စာမေးပွဲနှစ်ကျ ကျောင်းသား/ ကျောင်းသူတို့ကို သင်ကြားပေးနိုင်ရန် ရည်ရွယ်၍ အဆိုပါ အခမဲ့ပညာသင်ကျောင်းကို ၂၀၁၂ ခု၌ စတင် တည်ထောင်ခဲ့ကြောင်း သိရသည်။

အဆိုပါကျောင်းတွင် ရခိုင်ပြည်နယ်အတွင်းရှိ လူမျိုးဘာသာမရွေး တက်ရောက်သင်ကြားနိုင်ပြီး ယခုနှစ်တွင် ဆုရရှိသူများမှာ အ.ထ.က(၂)၊ အ.ထ.က(၃)၊ အ.ထ.က(၄)၊ အ.ထ.က (၉)၊ အ.ထ.က (ခွဲ) စက်ရုံစု နှင့် မဟာပညာကျော် ကိုယ်ပိုင်အထက်တန်းကျောင်းတို့မှ ဖြစ်ကြောင်းသိရသည်။