ပြင်ဦးလွင်၊ ဒီဇင်ဘာ ၇ ။ ။ ပြင်ဦးလွင်မြို့တွင် ဒီဇင်ဘာလ ၆ ရက်က ဖမ်းဆီးခံခဲ့ရသော တောင်သူလယ်သမားသမဂ္ဂ ဥက္ကဋ္ဌ မစုစုနွေးကို ပြင်ဦးလွင်မြို့နယ် တရားရုံးမှ ဒီဇင်ဘာလ ၇ ရက်တွင် ရုံးထုတ်စစ်ဆေးခဲ့ပြီး အာမခံဖြင့် ပြန်လည် လွတ်မြောက်လာကာ အပြင်မှ အမှုကို ရင်ဆိုင်သွားမည်ဟု မစုစုနွေးကပြောသည်။
 
“အပြင်ကနေ တစ်ဆင့်ပြီးတစ်ဆင့် တက်ပြီး အဆုံးထိ ရင်ဆိုင်ဖြေရှင်းသွားမယ်" ဟု အာမခံယူအပြီးတွင် မစုစုနွေး က ပြောသည်။
 
ပြင်ဦးလွင်မြို့နယ်၊ ထုံးဘိုကျေးရွာတွင် လယ်မြေအသိမ်းဆည်ခံတောင်သူများအား ခရိုနီတစ်ဦးမှ ဥပဒေမဲ့စွာ ဖမ်းဆီးရိုက်နှိက်ခြင်းနှင့် ပတ်သက်၍ ၂၀၁၄ ခုနှစ် ဇွန်လက မစုစုနွေးမှ ဒေသခံများကို ဦးဆောင်၍ ခွင့်ပြုမိန့်မတင်ဘဲ ဆန္ဒပြခဲ့ခြင်းကြောင့် ဒီဇင်ဘာလ ၆ ရက်တွင် ပြင်ဦးလွင်မြို့နယ် (မြို့မ)ရဲစခန်းမှ (ပ)၁၂၂/၁၄၊ငြိမ်း၊ စု၊ စီ ပုဒ်မ ၁၈ ဖြင့် ဖမ်းဆီးခဲ့ပြီး ဒီဇင်ဘာလ ၇ ရက်တွင် ရုံးထုတ်စစ်ဆေးခဲ့ခြင်းဖြစ်သည်။
 
ပြင်ဦးလွင်မြို့နယ်၊ (မြို့မ)ရဲစခန်းမှ စခန်းမှူးက “အမှုက ၂၀၁၄ ခုနှစ်ကတည်းက ဖွင့်ထားတာပါ။ခုမှကောက်ဖမ်းတာမဟုတ်ပါဘူး။” ဟုပြောသည်။
 
မစုစုနွေးအမှုအား လိုက်ပါကူညီဆောင်ရွက်ပေးမည့် တရားလွှတ်တော်ရှေ့နေ ဦးကျော်စွာထွန်း(ရန်ကုန်ရှေ့နေအသင်း) က “ဖြစ်စဉ်အတိအကျတော့ မသိရသေးပါဘူး။ ဒီနေ့အာမခံယူလိုက်တယ်။" ဟုပြောသည်။
 
တောင်သူလယ်သမားအရေး ကူညီဆောင်ရွက်ပေးနေသူ ဒေါက်တာအောင်ဌေးကလည်း “ကျွန်တော်တို့ ဒေသခံတွေနဲ့ ပူးပေါင်းပြီး အစွမ်းကုန်ကူညီသွားမယ်။" ဟုပြောသည်။
 
ဒေသခံတောင်သူ မစန္ဒာအေးက “ကျွန်မတို့ရွာကလူတွေ မတရားခံရလို့ အစ်မက အမှန်တရားပေါ်ပေါက်ဖို့ ကူညီတာ အခုလိုအဖမ်းခံရတော့ ဝမ်းနည်းတယ်။" ဟုပြောသည်။
 
ဒုတိယ ရုံးချိန်းအဖြစ် ဒီဇင်ဘာလ ၂၁ ရက်တွင် ပြန်လည် ချိန်းဆိုလိုက်သည်။