နိုဝင်ဘာ ၂၆၊ ရန်ကုန်။ ။ မြန်မာနေရှင်နယ်လိဂ်-၂ မှ လိဂ်-၁ သို့ တန်းတက်လာနိုင်ခဲ့သော Horizon အသင်းသည် အနာဂတ်စီမံကိန်းအဖြစ် အိမ်ကွင်း၊ ကိုယ်ပိုင်လေ့ကျင့်ရေးကွင်း၊ ကိုယ်ပိုင်ဘောလုံးသင်တန်းကျောင်း စသည်တို့ကတည်ဆောက်ရန် ပြင်ဆင်မှုများ ပြုလုပ်နေသည် ဟု Horizon အသင်းမန်နေဂျာ ဦးကျော်ကျော်ဦးက ပြောသည်။
Horizon အသင်းသည် ၂၀၁၃ ခုနှစ်မှ စတင်ကာ အသင်းစတင်တည်ထောင်ခဲ့ပြီး ယခုနှစ် ၂၀၁၅ ဘောလုံးရာသီ လိဂ်-၂ တွင် ဒုတိယဆုရရှိကာ လာမည့်ရာသီတွင် လိဂ်-၁ သို့ အသင်းသမိုင်းတလျောက် ပထမဆုံး တန်းတက်နိုင်ခဲ့ခြင်း ဖြစ်သည်။
“ ကျွန်တော်တို့ အသင်း အိမ်ကွင်းရည်မှန်းချက်က အခုမှ မဟုတ်ပါဘူး။ အသင်းစတင်တည်ထောင်ကတည်းက တန်းတက်အောင်လုပ်မယ်။ ပြီးရင် ကိုယ်ပိုင် အိမ်ကွင်း၊ ကိုယ်ပိုင်လေ့ကျင့်ရေးကွင်း၊ ကိုယ်ပိုင်ဘောလုံးသင်တန်းကျောင်းတွေ ဆောက်ဖို့ရည်ရွယ်ထားပါတယ်။ ရန်ကုန်မြို့နဲ့ နီးစပ်တဲ့ သန်လျင်လို နေရာမျိုး၊ ကျောင်းနဲ့နီးတဲ့ သာကေတ နေရာမျိုးမှာ မြေနေရာရှာနေပါတယ်။ ချိတ်ထားတာတွေလည်း ရှိပါတယ်။ မြေနေရာ ရခဲ့တာနဲ့ အသင်းရဲ့လူကြီးပိုင်းတွေက အားလုံးတိုင်ပင်ပြီး စတင်အကောင်အထည်ပေါ်အောင် လုပ်ဆောင်သွားမှာပါ ” ဟု ဦးကျော်ကျော်ဦးက အသင်း၏ အနာဂတ်စီမံကိန်းနှင့် ပတ်သက်၍ ပြောသည်။
Horizon အသင်းသည် လာမည့် ဘောလုံးရာသီသစ်အတွက် တူရကီလူမျိုး နည်းပြသစ် ပါလာ ကို အသစ်ခေါ်ယူထားသည့်အပြင် ပြီးခဲ့သည့် ရာသီက ပြည်ပကစားသမားများဖြစ်သော တိုက်စစ်မှူး ချီကာ၊ နောက်ခံလူ အိုဘီနာ တို့ကိုလည်း သက်တမ်းတိုး စာချုပ်ချုပ်ဆိုရန် စီစဉ်လျက်ရှိသည်။
