နိုဝင်ဘာ ၂၅၊ ရန်ကုန် ။ ။ ယူနန် - အာဆီယံ ဖိတ်ခေါ်ဖလားပြိုင်ပွဲ ဝင်ရောက်ယှဉ်ပြိုင်လျက်ရှိသည့် ဟံသာဝတီအသင်းသည် အုပ်စုနောက်ဆုံးပွဲတွင် လက်ရှိ ချန်ပီယံ လီဂျင်းအသင်းကသရေ ကစားပြီး ကွာတားအဆင့်သို့ တက်ရောက်နိုင်ခဲ့ကာ ဗီယက်နမ်နာမည်ကြီးကလပ်အသင်းတစ်သင်း ဖြစ်သည့် ဟနွိုင်း t&t အသင်းနှင့် တွေ့ဆုံမည် ဖြစ်သည်။
ဟံသာဝတီအသင်းနှင့် တွေ့ဆုံမည့် ဗီယက်နမ်ကလပ် ဟနွိုင်း t&t အသင်းသည် ပြီးခဲ့သည့် ဘောလုံးရာသီ၌ ဗီယက်နမ်လိဂ်တွင် ဒုတိယဆု ရရှိထားပြီး လာမည့်နှစ် အာရှချန်ပီယံလိဂ် ဝင်ခွင့်ရရှိထား သည့် အသင်းတစ်သင်း ဖြစ်သည်။
ဟနွိုင်း t&t အသင်းသည် ယူနန်-အာဆီယံ ဖိတ်ခေါ်ဖလားပြိုင်ပွဲတွင် အုပ်စုပွဲစဉ်၌ လေးပွဲလုံး အနိုင်ရကာ ကွာတားအဆင့်သို့ တက်ရောက်လာသည့် အသင်းတစ်သင်း ဖြစ်ပြီး နိုင်ငံခြားသား ကစားသမား လေးဦးထိ ပါဝင်ကစားလျက်ရှိသည်။
ဟံသာဝတီယူနိုက်တက်အသင်းမှာမူ လက်ရှိတွင် ပြည်တွင်းကစားသမားများဖြင့်သာ ဝင်ရောက်ယှဉ်ပြိုင်လျက်ရှိပြီး အသင်း၏ အဓိကကစား သမားနှစ်ဦးဖြစ်သည့် မောင်မောင်လွင်နှင့် ကျော်ဇေယျ တို့ကိုလည်း လက်ရွေးစင်ယူ-၂၁ အသင်းသို့ စေလွှတ်ထားရသည့်အတွက် ပါဝင်နိုင်ခြင်း မရှိခဲ့ပေ။
ယူနန်-အာဆီယံ ဖိတ်ခေါ်ဖလားပြိုင်ပွဲ ကွာတားဖိုင်နယ်ပွဲစဉ် တစ်ပွဲ ဖြစ်သည့် ဟံသာဝတီအသင်းနှင့် ဟနွိူင်း t&t အသင်း တို့ ပွဲစဉ် ကို လာမည့် နိုဝင်ဘာ ၂၅ ရက်တွင် တရုတ်နိုင်ငံ မန်စီ ရုံတွင်းဘောလုံးအားကစားကွင်း၌ မြန်မာစံတော်ချိန် နေ့လည် ၂း၃၀ တွင် ယှဉ်ပြိုင်ကစားသွားမည် ဖြစ်သည်။