ရွေးကောက်ပွဲတွင် တောင်ပြိုကမ်းပြိုအနိုင်ရသည့် NLD ပါတီ ခေါင်းဆောင်ဒေါ်အောင်ဆန်းစုကြည်အား တရုတ်က ဂုဏ်ပြုစကားဆိုရန် ရှောင်ဖယ်လျက်ရှိရာ တရုတ်နှင့် ဆက်ဆံရေးသစ် တစ်ဖန်မွေးဖွားရန် အားစိုက်ရမည့် အလားအလာရှိနေသည်။

တရုတ်နိုင်ငံက မြန်မာပြည်သူ အမြောက်အမြား မဲပေးခြင်းမရှိခဲ့သည့် အာဏာရစစ်တပ်ခေါင်းဆောင်များနှင့် ဆယ်စုနှစ်များစွာ နီးစပ်သည့် ဆက်ဆံရေးရှိခဲ့သည်။

မြန်မာရွေးကောက်ပွဲတွင် ဒေါ်အောင်ဆန်းစုကြည်က ကျိန်းသေအနိုင်ရသွားပြီဖြစ်ရာ နှစ်ဆယ့်ငါးနှစ်တာ ရုန်းကန်ခဲ့သည့် နိုင်ငံရေးခရီးကြမ်းတွင် မြန်မာနိုင်ငံအတွက် ဒီမိုကရေစီလမ်းကြောင်းသို့ စတင်တွန်းတင်နိုင်တော့မည်ဖြစ်သည်။

ရွေးကောက်ပွဲအနိုင်ရ ဒေါ်အောင်ဆန်းစုကြည်အား အမေရိကန်သမ္မတ ဘားရတ်အိုဘားမားက မြန်မြန်ဆန်ဆန်ပင် ဂုဏ်ပြုစကားပြောသော်လည်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက မယုတ်မလွန်သာ ပြောဆိုလာသည်။

"တရုတ်နိုင်ငံက မြန်မာနီုင်ငံအပေါ် အကူအညီများ ဆက်လက်ပေးသွားမှာပဲဖြစ်ပါတယ်။ နှစ်ဦးနှစ်ဖက် အကျိုးရှိတဲ့ ဆက်ဆံရေးနဲ့ ဆက်ဆံသွားမှာပဲဖြစ်ပါတယ်။"ဟု ရွေးကောက်ပွဲ အနိုင်ရလဒ်ထွက်ပေါ်ပြီးနောက် တရုတ်နိုင်ငံခြားရေးပြောရေးဆိုခွင့်ရှိသူ ဟောင်လီက ပြောသည်။

ဒေါ်အောင်ဆန်းစုကြည်အား ဂုဏ်ပြုစကားပြောကြားခြင်းနှင့် ပတ်သက်၍ မေးရာတွင် ၎င်းက တိုက်ရိုက်အဖြေမပေးပေ။

"မြန်မာနိုင်ငံမှာ နိုင်ငံရေးတည်ငြိမ်မှုများ ဖြစ်ထွန်းရေးနဲ့ ဖွံ့ဖြိုးတိုးတက်ရေးတို့အတွက် ကျွန်တော်တို့က ရိုးရိုးသားသား စိတ်ဆန္ဒသဘောထားရှိထားပါတယ်။"ဟုသာ ပြန်လည်အဖြေပေးခဲ့ခြင်းဖြစ်သည်။

တရုတ်နိုင်ငံသည် ဒေါ်အောင်ဆန်းစုကြည်အား နေအိမ်အကျယ်ချုပ်ချထားသည့် မြန်မာနိုင်ငံ ဆိုးဝါးသောစစ်အုပ်စုအစိုးရအတွက် အနောက်အုပ်စုများက ဒဏ်ခတ်ပိတ်ဆို့ထားသော်လည်း အဓိက ကျောထောက်နောက်ခံပြုခဲ့သည့် နိုင်ငံဖြစ်သည်။

မြန်မာနိုင်ငံက ၂၀၁၁ ခုနှစ်တွင် အရပ်သားအစိုးရတက်လာပြီး တရုတ်အပေါ် မှီခိုနေရခြင်းမှ ရုန်းထွက်ရန် ကြိုးစားလာပြီး အမေရိကန်နှင့် ဆက်ဆံရေးထူထောင်နိုင်ရန် လုပ်ဆောင်ခဲ့သည်။

တရုတ်က မြန်မာနိုင်ငံ၏ အုပ်ချုပ်ရေးအာဏာကို ဒေါ်အောင်ဆန်းစုကြည် ရယူနိုင်မည် ကျိန်းသေလာချိန်တွင် လက်တွေ့ကျကျ ချည်းကပ်မှုများ ပြုလုပ်ထားခဲ့သည်။