ပြည်သူ့ဆန္ဒ လေးစားလိုက်နာရန် ပြင်သစ်သတိပေး

ပြည်သူ့ဆန္ဒ လေးစားလိုက်နာရန် ပြင်သစ်သတိပေး

နိုဝင်ဘာ ရွေးကောက်ပွဲကို သမိုင်းဝင်ရွေးကောက်ပွဲဟု ပြင်သစ်သမ္မတက ပြောဆိုလိုက်ပြီး ချီးကျူးထားကာ ပြည်သူ့ဆန္ဒကို လေးစားလိုက်နာကြရန် နိုဝင်ဘာ ၁၁ ရက်က တိုက်တွန်းလိုက်သည်။

“အများပြည်သူလူထုမှ ထင်ထင်ရှားရှား ဖော်ထုတ်လိုက်သော ထိုဆန္ဒကို အဖွဲ့အစည်းများ အားလုံးမှ လေးစားလိုက်နာကြပါရန် တိုက်တွန်းလိုက်ပါသည်” ဟု ပြင်သစ်သံရုံး၏ ထုတ်ပြန်ချက်တွင် ပါရှိသည်။

ရွေးကောက်ပွဲသည် ဒီမိုကရေစီ ပြုပြင်ပြောင်းလဲရေး လုပ်ငန်းစဉ်တွင် အရေးပါသည့် အဆင့်တစ်ခုဟု ညွှန်းဆိုကာ ရွေးကောက်ပွဲတွင် အနိုင်ရရှိသည့် အမတ်များကိုလည်း ချီးကျူးပါကြောင်း ထုတ်ပြန်ချက်တွင်ပါရှိသည်။

ရွေးကောက်ပွဲတွင် မဲအရေအတွက် အပြတ်အသတ်ဖြင့် အနိုင်ရနေသည့် အမျိုးသား ဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်ကလည်း လူထုဆန္ဒကို တည်ငြိမ်းအေးချမ်း မှန်ကန်စွာ အကောင်အထည် ဖေါ်ခြင်းမှာ နိုင်ငံ၏ ဂုဏ်သိက္ခာအတွက် လွန်စွာ အရေးကြီးသည်ဟု ကြေညချက် ထုတ်ပြန်ထားသည်။

အလားတူ အမျိုးသား ပြန်လည်သင့်မြတ်ရေးအတွက် သမ္မတ ဦးသိန်းစိန်၊ ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်၊ ပြည်ထောင်စု လွှတ်တော်နာယက သူရဦးရွှေမန်းတို့နှင့် တွေ့ဆုံ ဆွေးနွေးလိုကြောင်း ဒေါ်အောင်ဆန်းစုကြည်၏ ကမ်းလှမ်းချက်တွင်ပါရှိသည်။

သမ္မတ ဦးသိန်းစိန်ကလည်း “ပြည်သူလူထု၏ ထောက်ခံမှုကို ရရှိစေရန် စွမ်းဆောင်ခဲ့သော ပါတီဥက္ကဌ ဒေါ်အောင်ဆန်းစုကြည်နှင့် အမျိုးသားဒီမိုကရေစီအဖွဲ့ချုပ်ပါတီ၏ အောင်မြင်မှုကို လှိုက်လှဲဝမ်းမြောက်စွာ ချီးကျူးဂုဏ်ပြုအပ်ပါသည်” ဟု ဒေါ်အောင်ဆန်းစုကြည်ထံ နိုဝင်ဘာ ၁၁ ရက်တွင် သတင်းစကား ပါးထားသည်။

အလားတူ “နိုင်ငံတော် အစိုးရအနေဖြင့် မဲဆန္ဒရှင် တိုင်းရင်းသား ပြည်သူများ၏ ရွေးချယ်မှုနှင့် အဆုံးအဖြတ်ကို လေးစားလိုက်နာပြီး သတ်မှတ်အချိန်များ အတိုင်း အေးချမ်း တည်ငြိမ်စွာ လွှဲပြောင်းနိုင်ရေးကို ဆောင်ရွက်သွားမည်” ဟုလည်း သမ္မတရုံးက ထုတ်ပြန်ထားသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required