သြဂုတ် ၃၁ရက်
ကိုဗစ်-၁၉ ပိုးတွေ့လူနာများပြားလာသည့် ရခိုင်ပြည်နယ် စစ်တွေမြို့တွင် လူနာများထားရှိရန် စစ်တွေတက္ကသိုလ်အား ယာယီဆေးရုံပြုလုပ်ပြီး စီစဉ်နေပြီး ရခိုင်ပြည်နယ်လွှတ်တော် အဆောက်အဦကိုပါ ယာယီဆေးရုံ အဖြစ်အသုံးပြုရန် လျာထားကြောင်း သိရသည်။
ဩဂုတ် ၃၀ ရက်က ပြုလုပ်သည့် ရခိုင်ပြည်နယ်တွင် ကိုဗစ်-၁၉ ကူးစက်ဖြစ်ပွားမှု ကာကွယ်ထိန်းချုပ်ရေးလုပ်ငန်းများအတွက် အွန်လိုင်းဗီဒီယိုအစည်းအဝေး Videoconferencing စနစ် ဆွေးနွေးမှုတွင် ရခိုင်ပြည်နယ် လူမှုရေးဝန်ကြီး ဒေါက်တာချမ်းသာက ပြောဆိုခဲ့ခြင်းဖြစ်သည်။
"အဲ့ဒါကတော့ လူနာများတဲ့အပေါ်မူတည်ပြီးတော့ တစ်ဆင့်ပြီးတစ်ဆင့် ဆောင်ရွက်သွားမယ့်အပိုင်းကို ရခိုင်ပြည်နယ်အစိုးရအဖွဲ့ရဲ့ လူမှုရေးဝန်ကြီးရဲ့ ညွှန်ကြားချက်အရသိရပါတယ် လက်ရှိကတော့ တစ်ဆင့်ချင်း တစ်ဆင့် ချင်းသွားနေတာ။ လူနာကလည်း အဲ့လောက်ထိမများလာသေးဘူးထင်တယ်။ လောလောဆယ် ဟိုဘက်နဲ့ ဒီဘက်နဲ့မျှနေတယ်" ဟု ကျန်းမာရေးဝန်ကြီးဌာန၏ ပြောရေးဆိုခွင့်ရှိသူ ဒေါက်တာသန်းနိုင်စိုးက ဆိုသည်။
လက်ရှိတွင် စစ်တွေမြို့ရှိ ကိုဗစ်-၁၉ လူနာများအား စစ်တွေပြည်သူ့ဆေးရုံကြီးတွင်သာမက သူနာပြုနှင့်သားဖွားသင်တန်းကျောင်း၊ တိုင်းရင်းဆေးရုံများတွင်ပါ ထားရှိကုသနေရကြောင်း သိရသည်။
ဓာတ်ခွဲစစ်ဆေးမှုများအတွက် စစ်တွေ၊ ကျောက်ဖြူ၊ သံတွဲ၊ မြောက်ဦးနှင့် မောင်တောမြို့နယ်များတွင် GeneXpert စက်များတပ်ဆင်ထားပြီး ဓာတ်ခွဲနမူနာများအား စစ်ဆေးနေကြောင်း သိရသည်။
စစ်တွေမြို့တွင် ကျပန်း ဓါတ်ခွဲနမူနာရယူခြင်းများအား ယနေ့ သြဂုတ် ၃၁ရက်နေ့တွင် စတင်ဆောင်ရွက်နေကြောင်း ကျန်းမာရေးဝန်ကြီးဌာနမှ သိရသည်။
ယခုကဲ့သို့ ဓါတ်ခွဲနမူနာရယူခြင်းများအား ကိုဗစ်-၁၉ ကာကွယ် ထိန်းချုပ်ရေးနှင့် ကုသရေး လုပ်ငန်းများ ထိရောက်မှုရှိစေရန် ရည်ရွယ်ဆောင်ရွက်ခြင်းဖြစ်သည်။
"အဓိကကတော့ ဘယ်လိုလူတွေကိုယူမယ်။ ကျွန်တော်တို့မှာ သုတေသနတစ်ခုလုပ်မယ်ဆိုရင် ဘယ်အုပ်စုကိုယူမယ်။ ဘယ်အုပ်စုက ဘယ်လောက်ယူမယ်။ ပြီးတဲ့အခါကျတော့ ထွက်ပေါ်လာတဲ့ resultတွေကို ဘယ်လိုအသုံး ချမလဲ။ Teamတွေ ဘယ်လိုခွဲမလဲ။ အဲ့ဒါတွေအတွက် စတင်ဆောင်ရွက်နေပါပြီ" ဟု ဒေါက်တာသန်းနိုင်စိုးက ပြောသည်။
အများပြည်သူနှင့် သက်ဆိုင်သည့် နေရာများဖြစ်သော ဆေးရုံ၊ ဘဏ်၊ ဈေး၊ လေဆိပ်၊ ကားဂိတ်၊ ရပ်ကွက်နှင့် ကယ်ဆယ်ရေးစခန်းများတွင် နေထိုင်ကြသည့် ပြည်သူများနှင့် ဝန်ထမ်းများ အပါအဝင် စုစုပေါင်း လူဦးရေ ၁၀၀၀ ခန့်၏ ဓါတ်ခွဲနမူနာများအား ရယူစစ်ဆေးသွားမည်ဖြစ်ကြောင်း သိရသည်။
ကျပန်း ဓါတ်ခွဲနမူနာရယူ စစ်ဆေးခြင်းကို စက်တင်ဘာ ၅ ရက် အထိ ပြုလုပ်သွားမှာဖြစ်ကြောင်း သိရသည်။
ကျန်းမာရေးဝန်ကြီးဌာန၏ ထုတ်ပြန်ချက်အရ ရခိုင်ပြည်နယ်တွင် ယနေ့ သြဂုတ် ၃၁ရက် နံနက်ပိုင်းအထိ အတည်ပြုလူနာ ၃၄၈ ဦးရှိကာ စစ်တွေမြို့မှ ၁၈၆ ဦး၊ ကျောက်ဖြူမြို့မှ ၅၃ ဦး၊ ပေါက်တောမြို့မှ ၂၀ ဦး၊ မောင်တော မြို့မှ ၁၉ ဦး၊ မြောက်ဦးမြို့မှ ၁၈ ဦး၊ မင်းပြားမြို့မှ ၁၀ ဦး၊ ကျောက်တော်မြို့မှ ကိုးဦး၊ သံတွဲမြို့မှ ရှစ်ဦး၊ ပုဏ္ဏားကျွန်းမြို့မှ ခုနှစ်ဦး၊ မြေပုံမြို့မှ ခုနှစ်ဦး၊ ဘူးသီးတောင်မြို့မှ ခြောက်ဦး၊ တောင်ကုတ်မြို့မှ နှစ်ဦး၊ အမ်းမြို့မှ နှစ်ဦး နှင့် ဂွမြို့မှ တစ်ဦးတို့ဖြစ်သည်။
