ရွေးကောက်ပွဲ ကျင်းပရန် တစ်ရက်သာ လိုတော့သည့် အချိန်တွင် အမျိုးသား ဒီမိုကရေစီအဖွဲ့ချုပ်၏ စစ်ကိုင်းတိုင်း ဒေသကြီး၊ မြင်းမူမြို့နယ် မဲဆန္ဒနယ် (၁) တိုင်းဒေသကြီး လွတ်တော် ကိုယ်စားလှယ်လောင်း ဦးစိုးမြင့်သည် ရုတ်တရက် ကွယ်လွန်သွားခြင်းကြောင့် အမတ်လောင်းတစ်ဦး NLD ပါတီ ဆုံးရှုံးသွားခဲ့သည်။
နိုဝင်ဘာ ၆ ရက်က ပါတီ စည်းရုံးလှုံ့ဆော်ရေး အလှပြယာဉ်ပေါ်၌ သီချင်းသီဆို ဖျော်ဖြေရင်း ရုတ်တရက် ကွယ်လွန်သွားခြင်းဟု မြို့နယ် ရွေးကောက်ပွဲ ကော်မရှင် အဖွဲ့ခွဲ အတွင်းရေးမှူးက အတည်ပြုသည်။
''သူက ဒီနေ့ မြို့တွင်း ယာဉ်တွေနဲ့ လှည့်လည်နေစဉ် ရုတ်တရက်လဲကျပြီး ၁၀ နာရီ ၄၅ မိနစ် ဆေးရုံရောက်တယ်။ ၁၁ နာရီ ၅ မိနစ်မှာဆုံးသွားပါတယ်။ ဆရာဝန်ဆေးစစ်ချက်အရ နှလုံးသွေးကြော ပိတ်တာလို့ပြောပါတယ်။ NLD က ဦးစိုးမြင့် သေဆုံးတာ ကျွန်တော်တို့ကော်မရှင်ရုံးကို စာတင်တာမရှိ ပေမယ့် ဖုန်းသတင်းပို့ပါတယ်။ ကျွန်တော်တို့ ခရိုင်အဆင့်ဆင့်ကို ဆက်လက်တင်ပြပါတယ်။ အပြောင်းအလဲတော့လုပ်လို့ မရတော့ဘူး။ တိုင်းဒေသကြီး ၁ မှာယှဉ်ပြိုင်သူ သုံး ဦးရှိတယ်။ ဦးစိုးမြင့်ဆုံးသွားတော့ ကျန်တဲ့နှစ်ဦးဘဲ ယှဉ်ပြိုင်ရတော့မှာပါ။'' ဟု မြင်းမူမြို့နယ် ရွေးကောက်ပွဲကော်မရှင်ခွဲ အတွင်းရေးမှူး ဦးတင်အောင်ဝင်းက မဇ္ဈိမသို့ပြောကြားသည်။
မြင်းမူမြို့နယ်မဲဆန္ဒနယ် ၁ တွင် ဦးစိုးမြင့် ရုတ်တရက်သေဆုံးသွား၍ တ.စ.ည ပါတီမှ ဦးကျော်စိုးဦး၊ ပြည်ခိုင်ဖြိုးပါတီမှ ဦးသောင်းမြင့်တို့ နှစ်ဦးသာ ယှဉ်ပြိုင်ရတော့မည်ဖြစ်သည်။
