ဆင်းရဲချမ်းသာ ကွာဟမှုကြီးမားတဲ့ နိုင်ငံရေးပါတီများ

ဆင်းရဲချမ်းသာ ကွာဟမှုကြီးမားတဲ့ နိုင်ငံရေးပါတီများ

ရန်ကုန် (Myanmar Now) ။             ။ အလင်းရောင်သိပ်မရှိတဲ့ အခန်းထဲက ခုံတစ်လုံးမှာ ထိုင်ရင်း စာရွက်စာတမ်းတွေဖတ်၊ ခုံဘေးမှာလည်း မဲဆွယ် လက်ကမ်းစာစောင်ထုပ်တွေ ဝန်းရံနေတဲ့ ဒီမိုကရက်တစ်ပါတီ(မြန်မာ)ရဲ့ အသက် ၈၃ နှစ်အရွယ် ဥက္ကဋ္ဌ ဦးသုဝေကနဖူးက ချွေးတချို့ကို သုတ်လိုက်ပါတယ်။

ရွေးကောက်ပွဲမှာ ဝင်ရောက်ယှဉ်ပြိုင်ဖို့ သူတို့ပါတီက ကိုယ်စားလှယ်လောင်း ၄၉ ဦး ရှိပေမယ့် မဲဆွယ် စရိတ် မစီစဉ်ပေးနိုင်တဲ့အတွက် စိတ်မကောင်းဘူးလို့ သူက ဆိုပါတယ်။ “ကိုယ့်လူတွေကို လက်ကမ်းစာစောင် လေးလောက်ပဲ လုပ်ပေးနိုင်တာ။ ကိုယ်စားလှယ်လောင်း စရိတ်ကအစ အောင်နိုင်ရေး အသုံးစရိတ် အားလုံး ကို သူတို့ဘာသာသူတို့ စိုက်သုံးရမှာ” လို့ ဦးသုဝေက ရှင်းပြပါတယ်။ 

ရွေးကောက်ပွဲဝင် ပါတီ ၉ဝ ကျော်မှာ ငွေလှိုင်လှိုင်သုံးနိုင်တဲ့ ပါတီက ၂ ခုထက် ပိုပုံမရပါဘူး။ ပါတီ ခေါင်းဆောင်များကို ဆက်သွယ်မေးမြန်းရာမှာ ဘဏ္ဍာရေး အခက်အခဲ ရှိတဲ့ကြားကနေ လှုပ်ရှား ရုန်းကန်နေ ကြရတယ်လို့ ပြောကြပါတယ်။ 

သူဌေးပါတီနဲ့ ဆင်းရဲသားပါတီ

စီးပွားရေး ခေတ်နောက်ကျနေတဲ့ တိုင်းရင်းသား လူမျိုးစုတွေကို အခြေခံထားတဲ့ တိုင်းရင်းသား ပါတီ တွေက ဘဏ္ဍာရေး ပိုမို အခက်အခဲ ဖြစ်လိမ့်မယ်လို့ ကျားဖြူပါတီခေါ် ရှမ်းတိုင်းရင်းသားများ ဒီမိုကရက်တစ် ပါတီ အတွင်းရေးမှူး ဦးစိုင်းလှကျော်က ယူဆပါတယ်။ “ကျွန်တော်တို့ တိုင်းရင်းသားတွေက ခရိုနီတို့ ဘာတို့နဲ့ နီးစပ်တာမျိုး မရှိဘူးလေ။ နီးစပ်မှ အထောက်အကူရတာ” လို့ ဦးစိုင်းလှကျော်က ဆိုပါတယ်။

ပါတီတချို့ဟာ သူပုန်တွေဆီက ငွေကြေးအထောက်အပံ့ ရနေတယ်ဆိုတဲ့ ပြောဆိုချက်မျိုးကိုတော့ သူက ငြင်းပယ်ခဲ့ပါတယ်။ တိုင်းရင်းသား လက်နက်ကိုင်အဖွဲ့ တော်တော်များများဟာ ပြည်သူတွေဆီက ဆက်ကြေးတောင်းပြီး ရပ်တည်နေကြတယ်၊ ရွေးကောက်ပွဲ ဥပဒေအရလည်း အဲဒီလိုငွေမျိုး လက်ခံခွင့်မရှိ၊ သူပုန်အဖွဲ့တွေဆီက ရတာဆိုလို့ စိတ်ဓာတ်ရေးရာ အကူညီတွေပဲ ဖြစ်မယ်လို့ သူက ဆိုပါတယ်။

မြန်မာပြည်ရဲ့ အချမ်းသာဆုံး ပါတီဖြစ်တဲ့ အာဏာရ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ပြည်ခိုင်ဖြိုး)ရဲ့ အမတ်လောင်းအရေအတွက် တစ်ထောင်ကျော်ရှိပြီး သူတို့ကို ကျပ်သိန်း ၃ဝ စီထောက်ပံ့ ပေးတယ်လို့ ပါတီရဲ့ သင်္ဃန်းကျွန်းမြို့နယ် အတွင်းရေးမှူး ဦးအောင်မြတ်ဇော်က ပြောပြတယ်။ ဒီပမာဏဟာ ပါတီဌာနချုပ် ဘဏ္ဍာရေး ဌာနဒုဌာနမှူး ဒေါ်ဌေးဌေးနွယ် ရန်ကုန်အခြေစိုက် သံတော်ဆင့်ဂျာနယ်ကို မဲဆွယ်ကာလမတိုင်ခင် ပြောပြချက်နဲ့ တူတူပါပဲ။ ပြည်ခိုင်ဖြိုးပါတီဟာ အမတ်လောင်း အားလုံးအတွက် ကျပ် သန်းသုံးထောင်ထက်မနည်း သုံးပေမယ့် မြို့နယ်ပါတီဌာနခွဲတွေ အတွက် ဘယ်လောက် သုံးစွဲတယ် ဆိုတာ ကိုတော့ မသိရသေးပါဘူး။

မဲဆွယ်ရာမှာ အမတ်လောင်းတစ်ဦးကို ကျပ်သိန်း ၁ဝဝ အထိပဲ သုံးနိုင်တယ်ဆိုတဲ့ ရွေးကောက်ပွဲ ကော်မရှင်ရဲ့ ခွင့်ပြုချက်အတိုင်း အပြည့်အဝ သုံးစွဲသွားမယ်ဆိုရင်တော့ ပြည်ခိုင်ဖြိုးပါတီ ရဲ့ရွေးကောက်ပွဲ အသုံးစရိတ်ဟာ ကျပ်သန်းပေါင်း တစ်သောင်း ကျော်ပါလိမ့်မယ်။

ပြည်ခိုင်ဖြိုးလိုပဲ အမျိုးသားဒီမိုကရေစီ အဖွဲ့ချုပ်(NLD) အမတ်လောင်း အရေအတွက်ကလည်း တစ်ထောင်ကျော်ပါတယ်။ သင်္ဃန်းကျွန်းမြို့နယ်က NLD ရဲ့ အမတ်လောင်း တစ်ယောက်ဖြစ်တဲ့ ဦးရွှေလှဝင်း က သူတို့မြို့နယ်မှာ အမတ်လောင်းတွေ တစ်ယောက် ဆယ်သိန်းစီ ထည့်ဝင်ကြတယ်၊ မြို့နယ်ပါတီရုံးခွဲက လည်း ငွေသိန်းနှစ်ဆယ်ကျော် အလှူခံရရှိထားတယ်လို့ ပြောပြပါတယ်။ ရန်ပုံငွေကို ပါတီဌာနချုပ်က မထောက်ပံ့နိုင်ဘူးလို့ ဆိုပါတယ်။

မကြာသေးခင် လပိုင်းအတွင်း ပေါ်ပေါက်လာတဲ့ အမျိုးသားတိုးတက်ရေး ပါတီက ဒီနှစ် ရွေးကောက်ပွဲ မှာ အမတ်လောင်းအရေအတွက် တတိယအများဆုံး ပါတီ ဖြစ်ပါတယ်။ သမ္မတ ဦးသိန်းစိန်ရဲ့ အကြံပေးအရာ ရှိဟောင်း ဒေါက်တာနေဇင်လတ် ထူထောင်ထားတဲ့ဒီပါတီကို  နိုင်ငံရေးလေ့လာသူတွေ စိတ်ဝင်တစား စောင့်ကြည့်ကြပါတယ်။  ဒီပါတီကြီးရဲ့ ကုန်ကျစရိတ်အတွက် ငွေကြေးထောက်ပံ့ မှုတွေက ဘယ်ကလာပါသ လဲ။ မဲဆွယ်ကုန်ကျစရိတ်တွေ ဘယ်ကရပါသလဲ။ ဒေါက်တာ နေဇင်လတ်ကတော့ အမတ်လောင်းတွေ အိတ်စိုက် သုံးကြတယ်လို့ ဆိုပါတယ်။ "ကျွန်တော်တို့ ကိုယ်စားလှယ်လောင်းတွေကလည်း ကိုယ်ပိုင်စီးပွား ရေး လုပ်ငန်းတွေ လုပ်ကြတဲ့သူတွေဆိုတော့ သူတို့ငွေကို သူတို့သုံးနိုင်ကြတာကြောင့် ပါတီဗဟိုကနေ ထောက်ပံ့ပေးတာမျိုး မရှိပါဘူး” လို့ဒေါက်တာ နေဇင်လတ်က ပြောပါတယ်။

ပြည်ပအဖွဲ့တွေ ကူညီကြသလား

အလယ်အလတ်စား ပါတီတွေထဲမှာ ထင်ရှားတဲ့ အမျိုးသားဒီမိုကရေစီ အင်အားစု(NDF) ကလည်း ဘဏ္ဍာရေး အခက်အခဲရှိတယ်ဆိုတဲ့ ပါတီများထဲမှာ ပါပါတယ်။၂ဝ၁ဝ ရွေးကောက်ပွဲ ကာလတုန်း ကတော့ NDF ခေါင်းဆောင်တွေကြား လူသိရှင်ကြား အငြင်းပွားမှု ဖြစ်ပေါ်ရာကနေ သူတို့ပါတီဟာ တခြား အဖွဲ့အစည်း တစ်ခုကနေ ထောက်ပံ့ငွေ ရယူတယ်ဆိုတဲ့အချက် ပေါ်ပေါက်လာ ပါတယ်။ ထောက်ပံ့ငွေ ပမာဏကိုတော့ မသိရပါဘူး။

အဲဒီလိုပဲ အခုချိန်မှာလည်း အစိုးရနဲ့ နီးစပ်တဲ့ အသိုင်းအဝိုင်း၊ စီးပွားရေး လုပ်ငန်းရှင်တချို့က ငွေကြေး ထောက်ပံ့ပေးနေတဲ့ အသံတွေလည်း ထွက်ပေါ်လာပါတယ်။ နေပြည်တော် အစိုးရပိုင်းနဲ့ ထိတွေ့မှုရှိတဲ့ ပြည်ပ ရောက် လုပ်ငန်းရှင်တစ်ဦးရဲ့ ငွေကြေးထောက်ပံ့ လိုကြောင်း ကမ်းလှမ်းမှုမျိုးကိုလည်း ရရှိခဲ့ဖူးတယ်လို့ ကျားဖြူပါတီမှ ဦးစိုင်းလှကျော်က ပြောပြတယ်။

ပြည်ထောင်စု ဒီမိုကရေစီ ပါတီဥက္ကဋ္ဌ ဦးသောင်းဝင်းက အဖွဲ့အစည်းတချို့ကလည်း ပါတီတချို့ကို နောက်ကွယ်က ထောက်ပံ့မှုတွေ ပြုလုပ်ပေးနေတဲ့ အသံတွေကို ကြားမိတယ်၊ သူတို့က လစဉ်လိုလို ပုံမှန် ပါတီဝင်တချို့နဲ့ အစည်းအဝေး၊ တွေ့ဆုံပွဲတွေ ပြုလုပ်လေ့ရှိပြီးတော့ အဲဒီလူတွေကနေတဆင့် ငွေကြေးစီး ဆင်းမှုတွေ ရှိနေတယ်လို့ ပြောပါတယ်။

“ဘယ်အဖွဲ့အစည်းဆိုတာတော့ ကျွန်တော် မပြောလိုဘူး။ ဒါပေမယ့် လက်ရှိအစိုးရနဲ့ အနီးစပ်ဆုံးဖြစ် ပြီး အစိုးရကိစ္စတွေကို အကောင်အထည်ဖော်နေတဲ့ အဖွဲ့ပဲ”လို့ ဦးသောင်းဝင်းက ဆိုပါတယ်။ ဦးသောင်းဝင်းက ပါတီရန်ပုံငွေ လိုတဲ့အတွက် အဲဒီအဖွဲ့ကို လျှောက်လွှာတင်မယ်၊ အဆင်ပြေရင် ဒီအဖွဲ့နဲ့ ပုံမှန် ထိတွေ့နေသူတွေ ဆီကတစ်ဆင့် ထောက်ပံ့မှု စီးဆင်းလာမယ်လို့ ဆိုပါတယ်။

ဒေါက်တာ နေဇင်လတ်ကတော့ သူတို့ပါတီဟာ အစိုးရနဲ့ နီးစပ်တဲ့ အဖွဲ့အစည်းတွေကို ပါတီတည် ထောင်စဉ်ကတည်းက ကူးလူးဆက်ဆံမှု မရှိဘူးလို့ ပြောပါတယ်။ “ကျွန်တော် သမ္မတအကြံပေး ဘဝတုန်း ကလည်း အခုပါတီတွေကို ထောက်ပံ့ပေးနေတဲ့ အဖွဲ့အစည်းတွေလို့ အသံထွက်တဲ့ ဟာတွေနဲ့ မနီးစပ်ခဲ့သလို ပါတီထောင်တဲ့အခါ ပိုလို့တောင် အလှမ်းဝေးပါတယ်ဗျာ” လို့ သူက ဆိုပါတယ်”။

ငွေကြေး ထောက်ပံ့ပေးကြတဲ့ အဖွဲ့အစည်းတွေရဲ့ ရည်ရွယ်ချက်က လက်ရှိ မြန်မာ့နိုင်ငံရေးမှာ အင်အားကြီး ပြည်ခိုင်ဖြိုးနဲ့ အတိုက်အခံ NLD တို့အပြင် တတိယ အင်အားစုများ ပေါ်ထွန်း လာစေရေး ဖြစ်တယ်လို့ ထောက်ပံ့မှု ကမ်းလှမ်းခံရဖူးသူ ကျားဖြူပါတီမှ ဦးစိုင်းလှကျော်က ပြောပါတယ်။

ရုံးခန်းငှားခ ခေါင်းကိုက်နေရ

သင်္ဃန်းကျွန်းမြို့နယ်က NLD အမတ်လောင်း ဦးရွှေလှဝင်းက မဲဆွယ်ကာလမှာ အခမဲ့ လိုက်လံ ကူညီပေးမယ့် ကားပိုင်ရှင်တွေ ရှိပေမယ့် အဲဒီကားတွေအတွက် ကုန်ကျစရိတ်ဆိုပြီး စာရင်းပြုစုရေးသွင်းထား တယ်လို့ သူက ဆက်ပြောတယ်။ NLD ရဲ့ မဲဆွယ်လှုပ်ရှားမှုကို အာဏာပိုင်တွေက အချိန်ပြည့် စောင့်ကြည့်နေ တဲ့အတွက် ဂရုစိုက်ရမယ်လို့ သူက ရှင်းပြပါတယ်။

“(အာဏာပိုင်တွေ စုံစမ်းထားတဲ့စာရင်းနဲ့)  ကွာဟခဲ့မယ်ဆိုရင် ကျွန်တော်တို့ အနိုင်ရတဲ့အခါ အဲဒီအ ချက်နဲ့ ကျွန်တော်တို့ကို ဖြတ်ချနိုင်တယ်” လို့ သူက ဆိုပါတယ်။

ပါတီအများစုဟာ အိမ်ခြံမြေဈေးနှုန်း မြင့်မားတဲ့ရန်ကုန်မှာ အခြေစိုက်တာကြောင့် ပါတီတွေရဲ့ ဘဏ္ဍာ ရေးဆိုင်ရာ အခက်အခဲတွေထဲမှာ ပါတီရုံးချုပ် ဖွင့်လှစ်ရေးအတွက် ခေါင်းကိုက်ရတဲ့ အချက်လည်း ပါပါတယ်။ ရုံးခွဲတွေကိုတော့ ပါတီဝင်တွေရဲ့အိမ်တွေမှာပဲ ဖွင့်ကြပါတယ်။

ရန်ကုန် တိုက်ခန်းကျဉ်းတွေကိုပဲ ဈေးကြီးကြီးပေးငှားပြီး ပါတီဌာနချုပ် ဖွင့်သူတွေထဲမှာ ဒီမိုက ရက်တစ်ပါတီ(မြန်မာပြည်)လည်း ပါဝင်ပါတယ်။ အခန်းငှားခ မတတ်နိုင်တာကြောင့် ၂ဝ၁ဝ ပြည့်နှစ် ပါတီ တည်ထောင်စဉ်ကစပြီး ဒီနေ့အထိ ဌာနချုပ် ရုံးပြောင်းရွှေ့ရတဲ့ အကြိမ်ပေါင်း ၅ ကြိမ်ရှိပြီလို့ ပါတီဥက္ကဋ္ဌ ဦးသုဝေက ရှင်းပြပါတယ်။

“ဒီအခန်းက ၂ နှစ်စာ ချုပ်ချုပ်ထားတယ်။ ရွေးကောက်ပွဲပြီးတဲ့ အချိန်အထိတော့ ဒီကျောက်မြောင်းမှာ ကျွန်တော်တို့ ဖွင့်နိုင်ဦးမှာပေါ့။ နောက်ထပ် စာချုပ်ချုပ်တဲ့အချိန်ကြမှ ပြောင်းမလား၊ ဒီမှာပဲ ဆက်ရှိမလားတော့ မသိသေးဘူး” လို့ ဦးသုဝေက ပြောပြပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly