မေ ၂၀
အမေရိကန်နိုင်ငံ မီချီဂန်ပြည်နယ်တွင် ဆည်နှစ်ခု ကျိုးပေါက်မှု ဖြစ်ခဲ့ပြီး လွန်ကဲသည့် ရေလွှမ်းမိုးမှုများ ဖြစ်ပေါ်လာနိုင်သည့် အခြေအနေကြောင့် ပြည်နယ်ရှိ မစ်ဒ်လန်း ကောင်တီအတွက် အရေးပေါ် အခြေအနေတစ်ရပ်ကို ပြည်နယ်အုပ်ချုပ်ရေးမှူး Gretchen Whitmer က မေလ ၁၉ ရက်တွင် ထုတ်ပြန်ကြေညာခဲ့သည်။
ပြီးခဲ့သည့် ရက်အနည်းငယ်အတွင်း မိုးသည်းထန်စွာ ရွာသွန်းခဲ့ခြင်းကြောင့် Edenville နှင့် Sanford ဆည်တို့ ပြိုကျ ကျိုးပေါက်ခဲ့ခြင်း ဖြစ်ပြီး အနီးအနားတွင် နေထိုင်သည့် ဒေသခံများကို ချက်ချင်း ဘေးလွတ်ရာ ရွှေ့ပြောင်းရန် ညွန်ကြားခဲ့ရကြောင်း မစ်ဒ်လန်း ကောင်တီ တာဝန်ရှိသူများက ပြောသည်။
“ နောက်လာမယ့် ၁၂ နာရီ ကနေ ၁၅ နာရီအတွင်း မစ်ဒ်လန်းမြို့ထဲမှာ ပျမ်းမျှ ရေအမြင့် ၉ ပေ အောက်ကို ရောက်သွားနိုင်ပါတယ်” ဟု ပြည်နယ်အုပ်ချုပ်ရေးမှူးက သတင်းစာရှင်းလင်းပွဲတစ်ခုတွင် ပြောသည်။
လက်ရှိအချိန်အထိ နေအိမ်ပေါင်း ၃,၅၀၀ နှင့် ပြည်သူ တစ်သောင်းခန့်ကို ဘေးလွတ်ရာ ရွှေ့ပြောင်းရန် ညွန်ကြားထားပြီးဖြစ်ကြောင်း မစ်ဒ်လန်း ကောင်တီ ကော်မရှင်နာများဘုတ်အဖွဲ့ ဥက္ကဋ္ဌ Mark Bone ကို ကိုးကားပြီး CNN က ဖော်ပြသည်။
လက်ရှိအချိန်အထိ သေဆုံး သို့မဟုတ် ထိခိုက်ဒဏ်ရာရမှု သတင်းများ ထွက်ပေါ်ခြင်း မရှိဟုလည်း အဆိုပါ ဥက္ကဋ္ဌဖြစ်သူကို ကိုးကားပြီး CNN က ပြောသည်။
ဒေသခံများကို တတ်နိုင်သမျှ ကုန်းမြင့်ဒေသများသို့ ရွှေ့ပြောင်းရန်နှင့် Tittabawassee မြစ်နှင့် တတ်နိုင်သမျှ ဝေးဝေးနေကြရန် အာဏာပိုင်များက တိုက်တွန်းထားသည်ဟု သိရသည်။