ဧပြီ ၁၆

အပြည်ပြည်ဆိုင်ရာ လူသားချင်းစာနာမှု အကူအညီပေးရေးအေဂျင်စီ ၂၆ ဖွဲ့သည်  ဒုက္ခသည်များ၊ နေရပ်စွန့်ခွါထွက်ပြေးသူများ၊ ကယ်ဆယ်ရေးအဖွဲ့အစည်းများအတွက် COVID-19 ကပ်ရောဂါဆိုင်ရာ သတင်းအချက်အလက် များ ရရှိစေရန်နှင့် ကူညီထောက်ပံ့မှုများလုပ်ဆောင်နိုင်ရန်အတွက် ကော့စ်ဘဇား၊ ရခိုင်နှင့် ချင်းပြည်နယ်တို့တွင် မိုဘိုင်းအင်တာနက်နှင့် ဆယ်သွယ်ရေးအပြည့်အဝရရှိအောင် ဆောင်ရွက်ပေးရန် မြန်မာနှင့် ဘင်္ဂလားဒေ့ရှ် အစိုးရတို့အား ဒီကနေ့ တိုက်တွန်းလိုက်သည်။

ကော့စ်ဘဇားဒုက္ခသည်စခန်းများတွင် အမျိုးသမီးများ၊ ကလေးများ၊ မသန်မစွမ်းနှင့် သက်ကြီးရွယ်အိုများအပါအဝင် ဘင်္ဂါလီ (မူရင်း ရိုဟင်ဂျာဟုဖော်ပြ) တစ်သန်းခန့် သည် နေရာအကန့်အသတ်ဖြင့် ကျပ်တည်းစွာ နေထိုင်နေကြရသည်။ နှစ်နိုင်ငံအကြားရှိ နယ်စပ်များမှ အဆိုပါ လူမှုအသိုင်းအဝိုင်းများသည် လူဦးရေသိပ်သည်းခြင်း၊ သန့်ရှင်းသောရေနှင့် ရောဂါကာကွယ်ရေးဆိုင်ရာ ပစ္စည်းများ မလောက်ငှခြင်း၊ COVID-19 ရောဂါ စမ်းသပ်စစ်ဆေးပေးမည့် ကျန်းမာရေး စောင့်ရှောက်မှုစနစ်မရှိခြင်း စသည့် စိန်ခေါ်မှုများကိုရင်ဆိုင်နေကြရသည်။

ရခိုင်ပြည်နယ်နှင့်ကော့စ်ဘဇားတို့တွင် အသက်ရှူစက်များလည်းအလုံအလောက်မရှိသည့် အခြေအနေများကြောင့် ရောဂါကူးစက်မှုများ မြန်ဆန်ပြီး သေဆုံးနှုန်းမြင့်တက်လာနိုင်ဖွယ်ရှိသည်ဟုဆိုသည်။ ဘင်္ဂလားဒေ့ရှ်နိုင်ငံသားများ ၊ ဘင်္ဂါလီများနှင့်ရခိုင်လူမျိုးများအား  COVID-19 ဆိုးကျိုးသက်ရောက်မှုများမှ  ကာကွယ်ပေးနိုင်ရေးအတွက် လိုအပ်သောစီမံချက်များလုပ်ဆောင်ရန် အရေးကြီးသည် ဟု အဆိုပါအဖွဲ့အစည်းများ၏ ထုတ်ပြန်ချက်တွင် ရေးသားထားသည်။

လက်ရှိဆက်သွယ်ရေးဆိုင်ရာကန့်သတ်ချက်များသည် ရောဂါပျံ့နှံ့မှုနှေးကွေးစေမည့် လုပ်ဆောင်ချက်များအတွက် အဟန့်အတားဖြစ်နေသည်ဟုဆိုသည်။ ကော့စ်ဘဇားရှိ ဘင်္ဂါလီဒုက္ခသည်များသည် ဖုန်း sim card များ တရားဝင် သုံးစွဲခွင့်မရရှိဘဲ  ၂၀၁၉ စက်တင်ဘာမှစ၍ အဆိုပါစခန်းများ၌ အင်တာနက်လိုင်းဖြတ်တောက်ရန် ဆက်သွယ်ရေးအော်ပရေတာများကို အာဏာပိုင်များက ညွှန်ကြားထားသည်။

 ရခိုင်နှင့်ချင်းပြည်နယ်ရှိ ပဋိပက္ခဖြစ်ပွားသည့် မြို့နယ် ၉ မြို့တွင်လည်း ၂၀၂၀ ဖေဖော်ဝါရီလမှ စတင်ကာ မိုဘိုင်းအင်တာသုံးစွဲမှု ဖြတ်တောက်ထားသည်။ ဆက်သွယ်ရေး ကောင်းမွန်မှသာ  COVID-19 ရောဂါလက္ခဏာရှိနေသူများအနေဖြင့် မည်သည့်အချိန်တွင် မည်သို့ သီးသန့်ခွဲနေရမည်ကို သိမည်ဖြစ်ကာ မိသားစု၊ ကျန်းမာရေးဝန်ထမ်းနှင့် ၎င်းတို့အားပြုစုစောင့်ရှောက်နေသူများကို ထိတွေ့ကူးစက်မှု လျော့နည်းစေမည်ဖြစ်ကြောင်း၊ အထူးကြပ်မတ်ကုသရန်လိုအပ်သူများအတွက် ဆေးရုံများသို့ ပို့ဆောင်နိုင်မည်ဖြစ်ကြောင်း၊ အဆိုပါဒေသများသို့ လူသားချင်းစာနာမှု အထောက်အပံ့များလုပ်ဆောင်ရန် အရေးတကြီးလိုအပ်ကြောင်း၊ မိုဘိုင်းအင်တာနက်များမသုံးစွဲနိုင်ပါက လိုအပ်သောဝန်ဆောင်မှုများ လုပ်ဆောင်နိုင်မှာမဟုတ်ကြောင်း အဆိုပါအဖွဲ့အစည်းများက ထောက်ပြပြောဆိုခဲ့ကြသည်။

ယခုကဲ့သို့ ကပ်ရောဂါဆိုက်ကပ်နေသည့်အချိန်၌ အချိန်မီနှင့် ထိရောက်စွာ စီမံခန့်ခွဲနိုင်ရန် ဆက်သွယ်ရေးသည် အခရာကျသည့်အတွက် ဘင်္ဂါလီဒုက္ခသည်စခန်းများ၌ မိုဘိုင်းအင်တာနက်နှင့် ဆက်သွယ်ရေးဖြတ်တောက်ထားမှုကို ပြန်လည်ဖွင့်လှစ်ပေးရန် မြန်မာနှင့်ဘင်္ဂလားဒေ့ရှ်အစိုးရတို့ကို တိုက်တွန်းတောင်းဆိုထားခြင်းဖြစ်သည်။

ထိုတောင်းဆိုချက်ကို International Rescue Committee၊ World Vision ၊ People in Need Myanmar ၊ Plan International ၊ Save the Children နှင့် United Purpose ကဲ့သို့သော အဖွဲ့အစည်းများကလည်း ပါဝင်လက်မှတ်ရေးထိုးခဲ့ကြသည်။