PSG အသင်း တိုက်စစ်မှူး အီကာဒီကတော့ ကိုရိုနာဗိုင်းရပ်စ်ဖြစ်ပွားနေတဲ့အချိန်အတွင်း အီတလီနိုင်ငံကို ပြန်ပြီး မိသားစုနဲ့အတူ အိမ်တွင်းပုန်းနေခဲ့တာပါ။
အီတလီနိုင်ငံမြောက်ပိုင်း လွန်ဘာဒီပြည်နယ်ထဲမှာ အီကာဒီတို့ ဇနီးမောင်နှံဝယ်ထားတဲ့ ပေါင်(၂.၅)သန်းတန် နေအိမ်တစ်လုံးရှိပြီး ကိုမိုရေကန်ကြီးရဲ့နံဘေးမှာ တည်ရှိတဲ့ အိမ်ကြီးပါ။
ဧကပေါင်း (၃၆၀၀၀)ကျော် ကျယ်ဝန်းတဲ့ ရေကန်ကြီးရဲ့ နံဘေးကနေ အိမ်တွေဟာ လှပတဲ့ ရှုခင်းကို မြင်တွေ့ကြရတာကြောင့် စျေးကြီးတဲ့ အိမ်တွေဖြစ်ကြပြီး ကိုယ်ပိုင်ခြံဝန်းကျယ်နဲ့ ခမ်းနားတဲ့နေအိမ်ကြီးတွေပါ။
ဒီစုံတွဲဟာ ပြင်သစ်ကနေ ကိုရိုနာဗိုင်းရပ်စ်အတွက် ထုတ်ပြန်ထားတဲ့ စည်းမျဉ်းတွေကို ဖောက်ဖျက်ပြီး အီတလီကို ပြန်လာခဲ့ကြပေမယ့် သူတို့ရဲ့ နေအိမ်မှာ ကျန်းကျန်းမာမာပဲ ရှိနေခဲ့ကြပါတယ်။
မီလန်မြို့နဲ့ မိုင်(၄၀)အကွာမှာ ရှိတဲ့ ဒီနေအိမ်ကြီးမှာ အိမ်နီးချင်းအဖြစ် နာမည်ကျော် ရုပ်ရှင်သရုပ်ဆောင် ဂျော့ချ်ကလူးနေး နေထိုင်တာဖြစ်ပြီး သူတို့က တကယ့်မိတ်ဆွေကောင်းတွေပါ။
ရေကန်ကို မြင်ရတဲ့ မြင်ကွင်းကြောင့် ခြံထဲမှာပဲ မိသားစုလိုက် အချိန်ကုန်ကြတာများပြီး ကလေးတွေအနေနဲ့လည်း ခြံထဲမှာပဲ ဆော့ကစားကြတာများပါတယ်။
ဒီအိမ်ကြီးကို ၂၀၁၈ ခုနှစ်မှာ အီကာဒီက သူ့ရဲ့ဇနီးဖြစ်သူကို လက်ဆောင်ဝယ်ပေးခဲ့တာဖြစ်ပြီး ကလေး(၅)ယောက်ရှိတဲ့ အီကာဒီတို့ မိသားစုအတွက်တော့ အသင့်တော်ဆုံးပဲလို့ ပြောရမှာပါ။
နေအိမ်အတွင်းမှာ အိပ်ခန်းကြီး (၃)ခန်းပါပြီး ရေချိုးခန်း (၂)ခန်း၊ မြေအောက်ခန်း၊ အိမ်အကူတွေအတွက် အခန်းတွေပါဝင်ပါတယ်။ အီကာဒီကတော့ မကြာခဏဆိုသလို ရေကန်ကြီးထဲမှာ မော်တော်ဘုတ်တစ်စီးနဲ့ လျှောက်မောင်းနေလေ့ရှိပြီး သူတို့ရဲ့ ကား (၄)စီးကို ထားဖို့အတွက်လည်း သီးသန့်နေရာတစ်ခု ရှိသေးတာပါ။
ဒီအိမ်က လက်ရှိမှာ ပေါင်(၃.၅)သန်းလောက် တန်ကြေးမြင့်နေပြီဖြစ်ပြီး အိမ်ခြံမြေပွဲစားတွေရဲ့ အကြိုက်ဆုံးနေရာတွေထဲက တစ်ခုဖြစ်တယ်လို့လည်း အီတလီသတင်းစာတွေက ဖော်ပြခဲ့ကြပါတယ်။