COVID-19 အမှတ် (၈) လူနာ ဘယ်တွေသွားခဲ့တာလဲ

မတ်လ ၃၀

ကိုရိုနာဗိုင်းရပ်စ်ကူးစက်ခံထားရကြောင်း ဓာတ်ခွဲအတည်ပြု လူနာအမှတ် (၈) ဖြစ်သူ အသက် ၆၀ အရွယ် ဧည့်လမ်းညွှန်အမျိုးသမီးနှင့် ပြင်သစ်ခရီးသွားအဖွဲ့ သွားခဲ့ရာလမ်းကြောင်းနှင့် ပတ်သက်ပြီး မဇ္ဈိမက သိရှိထားရ သမျှကို သတင်းပေးပို့လိုက်ပါသည်။

ရန်ကုန်တိုင်းဒေသကြီး ဗဟန်းမြို့နယ် ဆရာစံမြောက်/ရှေ့ ရပ်ကွက်တွင် နေထိုင် ဧည့်လမ်းညွှန်သည် ဆေးစစ်ချက်မပြုမီက ပြင်သစ်ခရီးသွားများနှင့်အတူ မန္တလေး၊ အင်းဝ၊ စစ်ကိုင်း၊ မုံရွာ၊ ပခုက္ကူ၊ ပုဂံ၊ ပုပ္ပါး၊ ကလော တို့ကိုလည်း သွားရောက်လည်ပတ်ခဲ့သည်။ အပြန်ခရီးတွင်တော့ အဖွဲ့ခွဲကာ ဧည့်လမ်းညွှန်မပါသော တစ်ဖွဲ့က ငပလီသို့သွားခဲ့ကြသည်။

ယခုအခါ အဆိုပါလူနာနှင့်  လူနာအမှတ် (၅) ဖြစ်သည့် ရန်ကုန်တိုင်း မင်္ဂလာတောင်ညွှန့်မြို့နယ်မှ အသက် ၆၉ နှစ်အရွယ် ကင်ဆာဝေဒနာခံစာနေရသူအမျိုးသားတို့မှာ ဝေဘာဂီအထူးကုဆေးရုံ အထူးကြပ်မတ် ကုသဆောင် တွင် ကုသမှု ခံယူနေရကြောင်း ကျန်းမာရေးဝန်ကြီးဌာနမှ ညွန်ကြားရေးမှူး ဒေါက်တာခင်ခင်ကြီးက မဇ္ဈိမသို့ ပြောသည်။
 
 " သူတို့ နှစ်ယောက်ကတော့ နဂိုကတည်းက သူတို့ ရောဂါ အခံတွေကလည်း ရှိတယ်ဆိုတဲ့ အတွက်ကြောင့်မို့ သေချာ ဂရုစိုက်နေရတာ ဖြစ်ပါတယ်။... ICU ဆိုတာ အထူးကြပ်မတ်ကုသမှုပေးတဲ့ နေရာ ဖြစ်ပါတယ်"ဟု ဒေါ်ခင်ခင်ကြီးက ပြောသည်။

လူနာ အမှတ် (၈) ၏ နေအိမ်အပါအဝင် ၎င်းတို့ ခရီးသွားအဖွဲ့သွားရောက်ခဲ့သော နေရာများကို Lockdown လုပ်ခြင်းအပါအဝင် ထိတွေ့ဆက်ဆံသူများကို ၁၄ ရက် ကွာရန်တိုင်း (Quarantine) လုပ်ခြင်းများပြုလုပ်ခြင်း၊ ပိုးသတ်ဆေးဖျန်းခြင်းများ ပြုလုပ်ထားကြောင်း သိရသည်။

လူနာ အမှတ် (၈) သည် ပြည်တွင်းနေသူများထဲမှ COVID-19 ကူးစက်သူ ပထမဆုံးဖြစ်သော်လည်း မည်သို့ ကူးစက်ခံရသည်ကို မသိရှိရပါ။

မြန်မာနိုင်ငံတွင် COVID-19 ကူးစက်ခံထားရသူ အတည်ပြုလူနာ ၁၀ ဦးအထိရှိသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly