မတ်လ ၂၃။                ။ ကိုရိုနာဗိုင်းရပ်စ် COVID -19 ကာကွယ်ရေးနှင့်ပတ်သက်သည့်လုပ်ငန်းများကို မြန်မာနိုင်ငံဆရာဝန် အသင်းက စေတနာ့ဝန်ထမ်းများဖြင့် လုပ်ဆောင်သွားမည်ဖြစ်ကြောင်း မြန်မာနိုင်ငံဆရာဝန် အသင်း(ရန်ကုန်တိုင်းဒေသ ကြီး)၏ အထွေထွေအတွင်းရေးမှူး ဒေါက်တာဝင်းဇော်ကပြောသည်။

မြန်မာနိုင်ငံဆရာဝန်အသင်းအနေဖြင့် COVID -19 ကာကွယ်ထိန်းချုပ်ရေးနှင့် ကုသရေးလုပ်ငန်းများ တွင် ကျန်းမာရေးနှင့်အားကစားဝန်ကြီးဋ္ဌာနနှင့် ပူးပေါင်းလုပ်ဆောင်မည်ဖြစ်ပြီး လက်ရှိတွင်စေတနာ့ ဝန်ထမ်းအဖြစ် စာရင်းပေးသွင်းသူ ၁၁၀ကျော်ရှိပြီဖြစ်ကြောင်း ဒေါက်တာ ဝင်းဇော်က ဆိုသည်။

“ကျွန်တော်တို့ ၁၁၀ကျော်စာရင်းရရှိထားပါပြီ။ ထပ်ပြီးရောက်လာဖို့လည်းရှိပါသေးတယ်။မြန်မာပြည် တစ်ခုလုံးက ဆိုတာထက် ရန်ကုန်က စာရင်းပေးတာပိုများပါတယ်။” ဟု ဒေါက်တာဝင်းဇော်က ဆိုသည်။

COVID -19 ရောဂါသည် မြန်မာနိုင်ငံသို့ ကူးစက်ပြန်နှံ့လာခြင်းမရှိသေးသော်လည်း ကျန်းမာရေးနှင့် အားကစားဝန်ကြီးဌာနမှ ကြိုတင်ကာကွယ်ရန် စီမံချက်များ ချမှတ်ဆောင်ရွက်လျှက်ရှိပြီး မြန်မာနိုင်ငံဆရာဝန်အသင်း အနေဖြင့်လည်း ရောဂါကူးစက် ပြန့်ပွား ခြင်းမရှိစေရန် ဟောပြောပို့ချခြင်းများ၊ ပညာပေးလုပ်ငန်းများဆောင်ရွက်လျှက်ရှိကြောင်း ၎င်းကဆိုသည်။

ကျန်းမာရေးနှင့်အားကစားဝန်ကြီးဋ္ဌာနနှင့် မြန်မာနိုင်ငံဆရာဝန်အသင်းတို့မှ ပူးပေါင်းဆောင်ရွက်မည့် COVID -19 ရောဂါကာကွယ်ရေးလုပ်ငန်းစဉ်တွင် စေတနာ့ဝန်ထမ်းဆရာဝန်များက ပထမအဆင့် အနေဖြင့် ကိုရိုနာဗိုင်း ရပ်စ်နှင့် ပတ်သက်သည့် ကျန်းမာရေးအသိပညာပေးလုပ်ငန်းများကို ပြည်သူ့လူထုအတွင်း ပိုမိုသိရှိလာစေရန် လုပ်ဆောင်မည်ဖြစ်ကြောင်း ၎င်းက ဆိုသည်။

“လမ်းတွေ၊ ကားဂိတ်တွေ၊ ရပ်ကွက်တွေမှာ COVID -19 နဲ့ပတ်သက်တဲ့ လက်ကမ်းစာစောင် ဖြန့်ဝေတာ။ အပူချိန်တိုင်းတာတာ၊ လက်ဆေးဖို့ တိုက်တွန်းတာ၊ သရုပ်ပြတာတွေလုပ်ဆောင်ပါမယ်” ဟု ဒေါက်တာ ဝင်းဇော်က ဆိုသည်။

ထို့ပြင် ဝေဘာဂီဆေးရုံအပြင် ကျန်သည့်ဆေးရုံများတွင် COVID -19 နှင့် ပတ်သက်ပြီး စောင့်ကြည့် လူနာ များနှင့်နိုင်ငံခြားတိုင်းပြည်များမှ မြန်မာနိုင်ငံသို့ပြန်လာသူများကို ရန်ကုန်တိုင်းဒေသကြီးအတွင်း (Quarantined) ၁၄ရက်ကြာ ခေတ္တစောင့်ကြည့်ရာတွင် ကျန်းမာရေးဝန်ကြီးဋ္ဌာနနှင့် ပူးပေါင်း ဆောင် ရွက်မည်ဖြစ်ကြောင်း ၎င်းကဆိုသည်။

ဒုတိယအဆင့်အနေဖြင့် ကိုရိုနာဗိုင်းရပ်စ်ကူးစက်ခံရသူရှာဖွေတွေ့ရှိသည့် အဆင့်ရောက်မှသာ တစ်နိုင်ငံလုံးအတိုင်းအတာဖြင့် ဆရာဝန်များကွန်ရက်ပုံစံချိတ်ဆက် ဆောင်ရွက်မည်ဖြစ်ကြောင်း ဒေါက်တာဝင်းဇော် က ပြောသည်။

ပြီးခဲ့သည့် မတ်လ ၁၉ရက် က မြန်မာနိုင်ငံဆရာဝန်အသင်း(ရန်ကုန်) မှ စေတနာ့ဝန်ထမ်းများ ဖိတ်ခေါ် ကြောင်း ထုတ်ပြန်ချက်ထုတ်ပြန်ခဲ့ရာ မတ်လ ၂၃ရက်အထိ ငါးရက်အတွင်း စာရင်းပေးသွင်းထားသူ ဆရာဝန်ဦးရေ ၁၁၀ကျော် ရှိနေပြီကာ ထပ်မံစာရင်းပေးသွင်းသူများလည်း ရှိကြောင်း သိရသည်။

စေတနာ့ဝန်ထမ်းလုပ်လိုသူ ဆရာဝန်များအနေဖြင့် အမည်စာရင်းကို မြန်မာနိုင်ငံဆရာဝန်အသင်း (ရန်ကုန်)မှ အထွေထွေအတွင်းရေးမှူး ဒေါက်တာဝင်းဇော် ဖုန်း ၀၉- ၅၀၀၇၈၃၈ (Email:[email protected]) သို့လည်းကောင်း၊ ဦးသောင်းညွှန့် ရုံးအဖွဲ့မှူး-၀၉ ၄၄၃၉၀၂၄၅၈ (Email :[email protected]) သို့ လည်းကောင်း ဆက်သွယ် စာရင်းပေးသွင်းနိုင်ကြောင်းသိရသည်။

Photo-MMA-CME

စာရင်းပေးသွင်းထားသည့် ဆရာဝန်များတွင် အငြိမ်းစားဆရာဝန်ကြီးများနှင့် နယ်ဒေသများမှ ဆရာဝန်များ ပါဝင်ကြောင်းနှင့် အများစုသည် လူငယ်များဖြစ်ကြောင်း  မြန်မာနိုင်ငံဆရာဝန်အသင်းမှ ရုံးအဖွဲ့မှူး ဦးသောင်းညွှန့် က ဆိုသည်။

ထို့အပြင် IT ပညာရှင်များနှင့် ကျန်းမာရေးနှင့်ပတ်သက်ပြီး လုပ်ကိုင်ဆောင်ရွက်နေသူများလည်း စာရင်းပေးသွင်းကြကြောင်း မြန်မာနိုင်ငံဆရာဝန်အသင်းမှ သိရသည်။

လက်ရှိတွင် စေတနာ့ဝန်ထမ်းဆရာဝန်များအတွက် Mask(နှာခေါင်းစွပ်)  များ၊ PPE (တစ်ကိုယ် ရည်သုံး ကာကွယ်ရေးဝတ်စုံ) ဝတ်စုံများ၊ လက်သန့်ဆေးရည်များအား အလှူရှင်များရှာဖွေကာ စုဆောင်းလျှက်ရှိကြောင်း သိရသည်။

မြန်မာနိုင်ငံဆရာဝန်အသင်း အနေဖြင့် COVID -19 ကူးစက်ပြန့်ပွားခြင်းမရှိစေရန် ဟောပြော ပို့ချခြင်းများ၊ ပညာပေးလုပ်ငန်းများ ဆောင်ရွက်နေသည်။မြန်မာနိုင်ငံဆရာဝန်အသင်းသည် မြန်မာနိုင်ငံတစ်ဝန်းရှိ အဖွဲ့ဝင် ဆရာဝန်ဦးရေ တစ်သောင်းကျော် ဖြင့် ဖွဲ့စည်းထားခြင်းဖြစ်သည်။

COVID -19 ရောဂါ ထိန်းချုပ်ကုသရေးအတွက် ရန်ကုန်တိုင်းအတွင်း ခုတင် ၃၀၀ ဆံ့ ဆေးရုံနှစ်ရုံနှင့် သီးသန့်ထားနိုင်သည့် တိုက်ခန်းပေါင်း ၅၀၀ ခန့် ပြင်ဆင်ထားကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက မတ်လ ၂၁ရက်က ရန်ကုန်မြို့၌ ပြုလုပ်သည့် COVID -19 ကာကွယ်၊ထိန်းချုပ်၊ကုသရေးဆိုင်ရာရန်ပုံငွေ၊ ဆေးနှင့်ဆေးပစ္စည်း လှူဒါန်းပွဲတွင် ပြောကြားခဲ့သည်။

အလားတူပင် နိုင်ငံခြားမှ ပြန်ဝင်လာသူများကို ၁၄ရက်ကြာ စောင်ကြည့်သည့် Quarantine အတွက် မှော်ဘီတွင်ရှိသည့် ဆရာတော် အရှင်ဆေကိန္ဒ၏ ဘုန်းတော်ကြီးကျောင်း၊ ရန်ကုန်အပြည်ပြည်ဆိုင်ရာလေဆိပ်၊ ၇မိုင်ဟိုတယ်၊ ဧရာဝတီဘဏ် လေ့ကျင့်ရေးသင်တန်းကျောင်း၊ မြန်မာနိုင်ငံဘောလုံးအကယ်ဒမီ သင်တန်းကျောင်း၊ လှိုင်တက္ကသိုလ်ဝင်း ပညာရေးဝန်ထမ်းအိမ်ယာ တို့တွင် စီစဉ်ထားကြောင်းသိရသည်။