တနင်္သာရီတိုင်းအတွင်းရှိ နယ်စပ်ဂိတ် ၃ ခု ထိုင်းဘက်မှယာယီပိတ်

တနင်္သာရီတိုင်းအတွင်းရှိ နယ်စပ်ဂိတ် ၃ ခု ထိုင်းဘက်မှယာယီပိတ်
ဓာတ်ပုံ - ဒီမိုးသွေး (မြိတ်)

မြိတ်၊ မတ် ၂၁။        ။ COVID-19ရောဂါပျံ့နှံ့မှုကို ထိန်းချုပ်ရန်အတွက် ထိုင်းနိုင်ငံဘက်မှ မြန်မာနိုင်ငံနှင့်ထိစပ်နေသည့် အဓိက ဝင်ပေါက်များဖြစ်သည့် နယ်စပ်ဂိတ် ၃ ခုကို ယနေ့(မတ်လ ၂၁ ရက်)တွင်  စတင်ပိတ်တော့မည် ဖြစ်ကြောင်း သိရသည်။

တနင်္သာရီတိုင်းဒေသကြီးအတွင်းရှိ ခရိုင် ၃ ခုတွင်ရှိသည့် ထီခီး နယ်စပ်ဂိတ်၊ မောတောင် နယ်စပ်ဂိတ်နှင့် ရနောင်းနယ်စပ်ဂိတ်တို့ကို မတ်လ ၁၉ ရက်နေ့က မြန်မာဘက်မှ ပြည်ဝင်ခွင့် ဗီဇာနှင့်ဝင်ရောက် လာမည့် တတိယနိုင်ငံသားများကို စတင်ပိတ်ခဲ့ရာမှ ယနေ့(မတ်လ ၂၁ ရက်)တွင် မြန်မာနိုင်ငံသားများကို ထိုင်းနိုင်ငံဘက်က ယာယီပိတ်လိုက်ကြောင်း သိရသည်။

“အခုက ထိုင်းနိုင်ငံက မြန်မာနိုင်ငံသားများကို ဝင်ခွင့်ပိတ်လိုက်တာဖြစ်တယ်။ကုန်စည်စီးဆင်းမှုတွေရော ပါတယ်။ တရားဝင်စာထုတ်ပြီး ပိတ်တာဖြစ်တယ်”ဟု  မြန်မာနယ်စပ်ဂိတ် ၃ ခုမှ အမည်မဖော်လိုသူ တာဝန်သူများက ပြောဆိုသည်။

“ထိုင်းဘက်က တရားဝင်စားထုတ်ပြီး ပိတ်တာဖြစ်တယ်။ကျွန်တော်တို့ တိုင်းအစိုးရအဖွဲ့အနေနဲ့က ဘာ ညွန်ကြားချက်မှမလာသေးဘူး”ဟု ကော့သောင်းနှင့် မောတောင်နယ်စပ်ဂိတ်တို့မှ တာဝန်ရှိသူများက ပြောဆိုသည်။

ဓာတ်ပုံ - ဒီမိုသွေး(မြိတ်)ထိုင်းဆင်ခွန်းဂိတ်ပိတ်ရန် မောတောင်ဂိတ်ရှိ တာဝန်ရှိသူများကို ထိုင်းဘက်မှ လာရောက် အသိပေးနေစဉ်။

အဆိုပါ နယ်စပ်ဂိတ် ၃ ခုကို ထိုင်းနိုင်ငံဘက်မှ ယနေ့(မတ် ၂၁ရက်) ညနေ ၆ နာရီမှ စတင်ကာ ဧပြီလ ၃ ရက်နေ့ ညနေ ၆ နာရီအထိ ပိတ်ထားမည်ဖြစ်ပြီး လူ၊ ယာဉ်နှင့် ပစ္စည်းများ ဝင်/ထွက် သွားလာမှု အားလုံး ပါဝင်ကြောင်း  ပရကျွပ်ခီရီခန်ခရိုင်နှင့် မြိတ်ခရိုင် ထိုင်း- မြန်မာ ဆက်ဆံရေး တာဝန်ခံ ဦးအောင်ကြည်မြင့်က ဆိုသည်။

“ဒီနေ့ ညနေက နေပြီးတော့ လူ၊ ယာဉ်နှင့် ပစ္စည်းများ ဝင်/ထွက် သွားလာမှု အားလုံးကို တားမြစ် ပိတ်ပင် တော့မှာ ဖြစ်တယ်”လို့ ပရကျွပ်ခီရီခန်ခရိုင်နှင့် မြိတ်ခရိုင် ထိုင်း- မြန်မာ ဆက်ဆံရေး တာဝန်ခံ ဦးအောင်ကြည် မြင့်က ပြောကြား သည်။

ထိုသို့ နယ်စပ်ဂိတ် ၃ ခုကို ထိုင်းဘက်မှ စတင်ပိတ်သည့်အတွက် မြိတ်ခရိုင်အတွက် ရေထွက်ပစ္စည်းတင်ပို့ခြင်း၊ ခရီးသွားကျဆင်းခြင်းနှင့် ကုန်စည်စီးဆင်မှုတွေများစွာ ထိခိုက်မှုများဖြစ်ပေါ်လာနိုင်ေကြာင်း ထိုင်း- မြန်မာ ဆက်ဆံရေး တာဝန်ခံ ဦးအောင်ကြည်မြင့်က သုံးသပ်ပြောဆိုသည်။

မြန်မာနိုင်ငံဘက်မှ နယ်စပ်ဂိတ်များကို ပိတ်ထားရန် ရှိ/ မရှိအပေါ် တနင်္သာရီတိုင်းဒေသကြီး လူဝင်မှု ကြီးကြပ် ရေးနှင့် လူ့စွမ်းအား အရင်းမြစ်ဝန်ကြီး ဦးကျော်မင်းအား ဖုန်းဖြင့်ဆက်သွယ်မေးမြန်းရာ ဖုန်းလက်ခံဖြေဆိုရန် မအားလပ်သေးကြောင်း ပြောဆိုသည်။

ထိုင်းနိုင်ငံဘက်မှ ထိုသို့နယ်စပ်ဂိတ်များပိတ်ပင်မှုသည် တနင်္သာရီတိုင်းဒေသကြီး တစ်ခုတည်း ပိတ်ထားခြင်း မဟုတ်ကြောင်း၊ မြန်မာနှင့် ထိုင်း ထိစပ်နေသည့် နယ်စပ်ဂိတ်လုံးကို ပိတ်ထားခြင်းဖြစ်သည့် အပြင် ထိုင်းနိုင်ငံ၏ အိမ်နီးချင်းနိုင်ငံအားလုံး၏နယ်စပ်ဂိတ်များကို ပိတ်ခဲ့ခြင်းဖြစ်ကြောင်း သိရသည်။

 

 

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly