ဇန်နဝါရီ ၃၀။ ။ ရန်ကုန်တိုင်းဒေသကြီးအဆင့် သဘာဝဘေးအန္တရာယ်ဆိုင်ရာ လုပ်ငန်းစီမံချက် ( Disaster Management Plan ) ကို ယခုနှစ် ဇွန်လအတွင်း ပြီးစီးနိုင်အောင် ရေးဆွဲသွားမည်ဖြစ်ပြီး DMP ထွက်ရှိလာသည့်အပေါ် မူတည်ကာ သက်ဆိုင်ရာဌာနအလိုက် သဘာဝဘေးအန္တရာယ် ကြိုတင်ကာကွယ်နိုင်မှု လုပ်ငန်းစဉ်များ လုပ်ဆောင်နိုင်မည်ဖြစ်ကြောင်း ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ၊ ညွှန်ကြားရေးမှူး ၊ ဦးဝင်းရွှေက ပြောသည်။
ဇန်နဝါရီ ၃၀ ရက်နေ့ ၊ ရန်ကုန်မြို့ ၊ Panda Hotel တွင် လူမှုကယ်ဆယ်ရေး နှင့် ပြန်လည်နေရာချထားရေးဝန်ကြီးဌာန ၊ ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနနှင့် Plan National Myanmar တို့ ပူးပေါင်းပြုလုပ် သည့် တိုင်းဒေသကြီးအဆင့် သဘာဝဘေးအန္တရာယ်ဆိုင်ရာ လုပ်ငန်းစီမံချက် ပြန်လည်သုံးသပ်ရေးဆွဲရေး အလုပ်ရုံဆွေးနွေးပွဲတွင် ပြောဆိုလိုက်ခြင်း ဖြစ်သည်။
ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန ၊ ညွှန်ကြားရေးမှူး ၊ ဦးဝင်းရွှေ မှ “မှန်းထားတာက ဒီ Disaster Management Plan ကို ဇွန်လလောက် စနစ်တကျ ထည့်သွင်းရေးဆွဲနိုင်လိမ့်မယ်။ ဒါဆိုရင် ဌာနဆိုင် ရာအ လိုက် ကြိုတင်ကာကွယ်ရေး ၊ ကယ်ဆယ်ရေးလုပ်ငန်းတွေ ၊ ပြန်လည်ထူထောင်ရေးလုပ်ငန်းတွေ ဟန်ချက်ညီစွာနဲ့ ဆောင်ရွက်နိုင်မှာ ဖြစ်တယ်။ အခုလို အလုပ်ရုံဆွေးနွေးပွဲနှင့် လိုအပ်ရင် ဌာနအလိုက် တွေ့ဆုံပြီး သူတို့ အမြင်တွေ ထည့်သွင်းသွားမယ်။ DMP ရလာမယ်ဆိုရင်တော့ DMP ကို အခြေခံပြီး သက်ဆိုင်ရာ လုပ်ငန်းကော်မတီအလိုက် ကြိုတင်ပြင်ဆင်မှုတွေ ပေါင်းစပ်ညှိနှိုင်းမယ်။ တစ်ကယ်ဖြစ်လာတဲ့ သဘာဝဘေးအန္တရာယ်ကို အကောင်းဆုံးရင်ဆိုင်နိုင်မယ် “ ဟု ပြောသည်။
ထို့အပြင် ရန်ကုန်တိုင်းအဆင့် သဘာဝဘေး အန္တရာယ်ဆိုင်ရာ လုပ်ငန်းစီမံချက် သတင်းအချက်အလက် အသေးစိတ် ပါဝင်သည့် လက်စွဲစာအုပ်ကိုလည်း ထုတ်ဝေနိုင်ဖို့လည်း ပြင်ဆင်နေကြောင်း သိရသည်။
လူဦးရေ ၆ သန်းနီးပါးခန့် နေထိုင်လျက်ရှိသည့် ရန်ကုန်တိုင်းအတွင်း အထပ်မြင့် အဆောက်အအုံများ ဆောက်လုပ်နေမှု ပေါများလာသလို အဆိုပါ အဆောက်အအုံအများစုရဲ့ ငလျင်ဒဏ်ခံနိုင်မှုကလည်း စိန်ခေါ်မှု တစ်ခုဖြစ်နေသည်။
“ အခုဆိုရင် မီးဘေးလုံခြုံရေးအပြင် သဘာဝဘေးအန္တရာယ် ကြိုတင်ကာကွယ်ရေးကို ဟောပြောပွဲတွေမှ ထည့်သွင်း ပြောဆိုရတယ်။ အများပြည်သူနဲ့ပတ်သက်တဲ့ စီမံချက် ၊ လျာထားချက်တွေနဲ့ နှစ်တိုင်း ဆောင်ရွက်နေ ပါ တယ်။ အခုဆိုရင် သဘာဝဘေးနဲ့ ပတ်သက်ပြီး ပိုလုပ်ဆောင်ဖြစ်တယ်။ ငလျင်နဲ့ ပတ်သက်ရင်လည်း ဇာတ်တိုက်လေ့ကျင်ခန်းတွေကို ခရိုင်အလိုက် ၊ တိုင်းဒေသအဆင့် အလိုက် ဆောင်ရွက်နေပါတယ် “ ဟု သုံးခွမြို့နယ် ၊ မီးသတ်ဦးစီးဌာန ၊ မြို့နယ်ဦးစီးမှူး ဦးပြည့်ဖြိုးဟန် က ပြောသည်။
၁၉၉၈ ခုနှစ် မှ ၂၀၁၇ ခုနှစ်အတွင်း ကမ္ဘာပေါ်တွင် သဘာဝဘေးဖြစ်စဉ်ကြောင့် ပြင်းထန်ထိခိုက်မှု အများဆုံး နိုင်ငံများအနက် မြန်မာနိုင်ငံသည် တတိယအဆင့်မှာ ရပ်တည်နေကြောင်း သိရသည်။
