ပေကျင်းမှာလည်း ကျောင်းပြန်ဖွင့်မယ့်ရက်တွေ နောက်ကိုရွေ့ဆိုင်းလိုက်ပေမယ့် မြန်မာကျောင်းသားတွေပြန်လာဖို့ တရုတ်အစိုးရရဲ့ ရောဂါထိန်းချုပ်နိုင်စွမ်းကို စောင့်ကြည့်နေတယ်

ပေကျင်းမှာလည်း ကျောင်းပြန်ဖွင့်မယ့်ရက်တွေ နောက်ကိုရွေ့ဆိုင်းလိုက်ပေမယ့် မြန်မာကျောင်းသားတွေပြန်လာဖို့ တရုတ်အစိုးရရဲ့ ရောဂါထိန်းချုပ်နိုင်စွမ်းကို စောင့်ကြည့်နေတယ်
photo- Aung Lwin

တရုတ်နိုင်ငံမှာ ကိုရိုနာဗိုင်းရပ်စ်ကြောင့် သေဆုံးသူ သည်ကနေ့ (ဇန်နဝါရီ -၂၈ )ရက်နေ့မှာတော့ ၁၀၆ ဦးရှိသွားပြီဖြစ်ပြီး ကူးစက်ခံရသူ ၄၅၀၀ခန့်ရှိသွားပြီလို့ WHO ကထုတ်ပြန်လိုက်ပါတယ်။ သည်လိုအခြေအနေမှာ တရုတ်နိုင်ငံရဲ့ ဘယ်နေရာမှာမဆိုရောက်ရှိနေတဲ့ မြန်မာတွေမှာ သည်ရောဂါပိုးကူးစက်ခံရမှာ စိုးတဲ့အတွက စိုးရိမ်ပူပန်မှုတွေ မျိုးစုံရှိနေကြတယ်လို့ မဇ္ဈိမက ဆက်သွယ်မေးမြန်းချက်တွေအရ သိရပါတယ်။

ကိုရိုနာဗိုင်းရပ်စ် စဖြစ်တဲ့ ဝူဟန်မြို့က မြန်မာကျောင်းသားတွေကတော့ မြန်မာနိုင်ငံကို အမြန်ဆုံးပြန်ခွင့် ရရေးတောင်းဆိုထားပြီး ပေကျင်းက မြန်မာသံရုံးအနေနဲ့လည်း ကျောင်းသားတွေကို အမြန်ဆုံးပြန်ပို့ဖို့ အစီအစဉ်တွေ အကောင်အထည်ဖော်နိုင်ရေး တရုတ်အစိုးရနဲ့ ညှိနှိုင်းနေပါတယ်။  

ပေကျင်းမြို့က မြန်မာကျောင်းသားတွေကရော ပြန်လာချင်ကြသလားဆိုတာနဲ့ ပေကျင်းမြို့မှာ သည်ကနေ့ဖြစ်ပျက်နေတဲ့အခြေအနေတွေကိုသိရှိနိုင်ဖို့ Beihang University မှာ  အာကာသနည်းပညာအသုံးချရေးဘာသာရပ်နဲ့ ပါရဂူဘွဲ့သင်တန်းတက်  ရောက်သင်ကြားနေတဲ့ ကိုအောင်လွင်ကို မဇ္ဈိမက ဆက်သွယ်မေးမြန်းထားပါတယ်။

မေး။    ။   ပေကျင်းမြို့မှာရော လက်ရှိဘယ်လိုအခြေအနေရှိလဲ။ ပေကျင်းက ကျောင်းသားတွေကရော ဘယ်လိုဆန္ဒရှိနေလဲ။

ဖြေ။  ။  ပေကျင်းနဲ့ ဝူဟန်က မိုင်ပေါင်း ၆၅၅ မိုင်ဝေးပါတယ်။ သွားမယ်ဆိုရင် အမြန်ရထားတွေ၊ အဝေးပြေးမောင်းတဲ့ ဘတ်စ်ကားတွေ၊ လေယာဉ်တွေ ရှိတယ်။ အခုတော့ ဝူဟန်နဲ့ အဆက်အသွယ်တွေ တော်တော်ဖြတ်ထားပါတယ်။ သူတို့ကတော့ တကယ်စဖြစ်တဲ့ နေရာဆိုတော့ အပြင်မထွက်ရဘူးပေါ့။ မြို့ပြင်က ကျောင်းတွေကတော့ သွားလို့ ရနေပါသေးတယ်။ သူတို့အတွက်လည်း ကျွန်တော်တို့ စိုးရိမ်ပါတယ်။ ဝူဟန်မှာရှိတဲ့ ကျောင်းသားတွေလည်းပဲ ပေကျင်းမှာ ရှိတဲ့ မြန်မာသံရုံးနဲ့ ချိတ်ဆက်ပြီး ဆောင်ရွက်နေတယ်လို့ သိရပါတယ်။ ပေကျင်းမှာ တရုတ်နှစ်ကူးရာသီအချိန်ဖြစ်တဲ့အတွက်ကြောင့် ကျောင်းတွေ ရက်ရှည်ပိတ်ထားပြီး တရုတ်ကျောင်းသူကျောင်းသား အများစုဟာ အိမ်ပြန်ကြပါတယ်။ နိုင်ငံခြားက ကျောင်းလာတက်တဲ့ ကျောင်းသားအချို့လည်း ရက်ရှည်ပိတ်တဲ့အတွက် ပြန်ကြတဲ့ အချိန်ပါ။ ဒါ့ကြောင့် နှစ်စဉ် ဒီအချိန် ယာဉ်အသွားအလာ ရှင်းပြီး လူအသွားအလာနည်းတာ ပုံမှန်ပါ။ အခုက ကျောင်းပိတ်ရက်ရှည်ဖြစ်တဲ့အပြင် ကိုရိုနာဗိုင်းရပ်စ်ပျံ့နှံ့နေတဲ့အချိန်လည်း ဖြစ်တဲ့အတွက် ဒေသဆိုင်ရာအာဏာပိုင်တွေရော၊ ကျောင်းအုပ်ချုပ်ရေးကရော အခါအားလျော်စွာ ဆောင်ရန်၊ ရှောင်ရန်၊ လိုက်နာရမယ့် အချက်တွေကို သတိပေးထုတ်ပြန်နေပါတယ်။ ဇန်နဝါရီလ ၂၆ ရက်နေ့က စပြီးတော့ ကျောင်းတွေ နွေရာသီကျောင်းပိတ်ရက်ရှည်ကို နောက်ကို ရွှေ့ဆိုင်းလိုက်တယ်ဆိုပြီး ထုတ်ပြန်ပါတယ်။ ပြီးတော့ ဖွင့်မယ့် ရက်ကိုလည်း သူတို့ ပြန်လည်ထုတ်ပြန်ပေးပါ့မယ်ဆိုပြီးတော့ အကြောင်းကြားထားတာ ရှိပါတယ်။ ကျောင်းသူကျောင်းသားတွေ အခြားဒေသကို သွားမယ်၊ ကိုယ့်နိုင်ငံကို ပြန်မယ်ဆိုရင် အဆင့်ဆင့်စစ်ဆေးမှု ခံယူပြီးမှ ပြန်ရမယ်ဆိုပြီး ထုတ်ပြန်ထားပါတယ်။

မေး။    ။  စားရေးသောက်ရေးအခက်အခဲရောရှိလား။ ကြုံနေရတဲ့ အဓိကအခက်အခဲကရော ဘာဖြစ်မလဲ။

ဖြေ။   ။  ကျွန်တော်တို့ ပေဟန်ကျောင်းမှာ တပ်မတော်က ငါးဦး၊ ဝန်ထမ်းသင်တန်းသား လေးဦး၊ ကျန်တာကတော့ ပြင်ပကျောင်းသူ၊ ကျောင်းသားတွေပါ။ အခုကတော့ ကျွန်တော်တို့ ကျောင်းမှာတွေ့ရတာ မနက်အားကစားလုပ်တဲ့သူ၊ ဘတ်စ်ကတ်ဘောကစားတဲ့သူတွေလည်း ရှိပါတယ်။ ကျွန်တော်တို့ ကျောင်းထဲမှာတော့ ဈေးရှိပါတယ်။ ဈေးက အချိန်နဲ့ မနက် ဆယ်နာရီကနေ ညနေခြောက်နာရီလောက်ထိ ဖွင့်ပေးပါတယ်။ စားစရာဝယ်လို့ ရပါတယ်။ လောလောဆယ်အထိတော့ စားနပ်ရိက္ခာအတွက် မပူရပါဘူး။ ကျောင်းထဲမှာလည်း လွတ်လွတ်လပ်လပ်သွားလို့ ရနေပါသေးတယ်။ အခြားဒေသတွေကတော့ ဝူဟန်ကတစ်ဆင့် ကူးစက်တာပဲ ရှိပါသေးတယ်။ ဒါကြောင့် သတိထားစောင့်ကြည့်နေရတာပါ။ ပေကျင်းမှာ ကူးစက်ခံရသူအရေအတွက် ၆ဝ လောက် ရှိပါပြီ။ နှစ်ဦးကတော့ ထိန်းချုပ်နိုင်ပြီလို့ သိရပါတယ်။ ပေကျင်းက မြန်မာသံရုံးနဲ့ ချိတ်ဆက်ဆောင်ရွက်နေရတဲ့ ကျောင်းတွေက ကျောင်းသားတွေအနေနဲ့ အခြေအနေကို စောင့်ကြည့်နေကြပါတယ်။ အဲ့တော့ ကိုရိုနာဗိုင်းရပ်ဖြစ်ပွားတာကို သတိထားပြီး စောင့်ကြည့်နေတယ်။ အချို့လည်း အခြေအနေကြည့်ပြီး မြန်မာနိုင်ငံပြန်ဖို့ ဆန္ဒရှိတာ သိရပါတယ်။ ကျွန်တော်ထင်ပါတယ်။ ဒီမှာရှိတဲ့ ကျောင်းသားတွေ အဓိကရင်ဆိုင်နေရတာက ဒီကူးစက်ပျံ့နှံ့လာတာကို စိုးရိမ်တဲ့ စိတ်ပေါ့။ ဒါတော့ လူတိုင်းမှာ ရှိပါတယ်။ ဘယ်လိုပြင်ဆင်ထားလဲဆိုရင် စားနပ်ရိက္ခာစုဆောင်းထားမှုရှိပါတယ်။ အခြေအနေအပေါ် မူတည်ပြီး ကျွန်တော်တို့ ပြန်မယ်၊ မပြန်ဘူးဆိုတာက တရုတ်အစိုးရဘက်က ထိန်းချုပ်နိုင်မှုအပေါ် မူတည်ပြီး ဆုံးဖြတ်ရမှာပါ။

မေး။   ။ ဒီရောဂါဘယ်ကနေဘယ်လိုစဖြစ်လာတယ်လို့ သိထားလဲ။ တရုတ်အစိုးရကတရားဝင်ပြောကြားတာရှိလား။

ဖြေ။  ။  ဒီကိုရိုနာဗိုင်းရပ်စ်ကတော့ ဝူဟန်မှာရှိတဲ့ ပင်လယ်စာဈေးကနေ စပြန့်တယ်လို့ သံသယရှိတဲ့အတွက် ဒီဈေးကိုလည်း ပိတ်ထားပြီး ဖြစ်ပါတယ်။ အများသိသလို လင်းနို့တို့၊ မြွေတို့ကနေ ကူးစက်တယ်လို့ သူတို့ ယူဆထားတဲ့အတွက် စုံးစမ်းစစ်ဆေးမှုတွေ၊ သုတေသနတွေလုပ်နေဆဲပါ။

မေး။   ။  တရုတ်အစိုးရရဲ့ ရောဂါနဲ့ပတ်သက်ပြီး ဆောင်ရွက်မှုတွေ၊ အသိပညာပေးမှုတွေကရော ဘယ်လိုမျိုး လုပ်ဆောင်နေတာ တွေ့ရလဲ။

ဖြေ။  ။ တရုတ်နိုင်ငံက အရင်ကလည်းပဲ ၂ဝဝ၃ လောက်က ဆားစ်ရောဂါဖြစ်ပွားခဲ့တဲ့အတွက်ကြောင့် သူတို့မှာ အတွေ့အကြုံရှိပြီးသားဖြစ်ပါတယ်။ အခုကိုရိုနာဗိုင်းရပ်စ်မှာလည်း ငွေအား၊ လူအား၊ နည်းပညာအား အကုန်သုံးပြီးလုပ်ဆောင်နေတာဖြစ်တဲ့အတွက် ကျွန်တော့်အနေနဲ့ သူတို့ လုပ်ဆောင်မှုကို သတိထားစောင့်ကြည့်နေပါတယ်။ ဒီအခက်အခဲတွေကို ကျော်လွှားနိုင်မယ်လို့ ယုံကြည်တဲ့အတွက် စောင့်ကြည့်နေတာ ဖြစ်ပါတယ်။

မေး။  ။ မြန်မာနိုင်ငံအတွက်ရော ဘာပြောချင်တာရှိလဲ။

ဖြေ။  ။ အဓိကပြောချင်တာကတော့ မြန်မာနိုင်ငံမှာလည်း မဖြစ်သေးဘူးဆိုပေမယ့် ကျန်းမာရေးဝန်ကြီးဌာနက ထုတ်ပြန်ထားတဲ့ အချက်အလက်တွေအရ ဆောင်ရန်၊ ရှောင်ရန်တွေကို သတိထားလိုက်နာကြဖို့ ပြောလိုပါတယ်။ တရုတ်အစိုးရက ဒီကမြို့ကြီးတွေရဲ့ အသွားအလာတွေကို ထိန်းချုပ်ထားပါတယ်။ မြန်မာနိုင်ငံမှာလည်း ဝင်ပေါက်၊ ထွက်ပေါက်တွေမှာ ကြည့်ရှုစောင့်ကြပ်မှုတွေပြုလုပ်နေတယ်လို့ ကျန်းမာရေးဝန်ကြီးဌာနက ထုတ်ပြန်တာတွေအရ သိရပါတယ်။ ဒါပေမယ့် လေဆိပ်ကနေ ဝင်လာတာမျိုး၊ အထူးသဖြင့် တရုတ်နိုင်ငံကပေါ့၊ နောက်ပြီး နယ်စပ်မြို့တွေမှာ သေချာစောင့်ကြည့်အချက်အလက်မှတ်တမ်းတွေ လုပ်ဖို့ပေါ့။ ဒီရောဂါက ကူးစက်မှုမြန်တဲ့အတွက် ပေါ့လို့တော့ မရပါဘူး။ မြန်မာနိုင်ငံမှာ ဖေ့စဘွတ်သုံးတဲ့ သူများတဲ့အတွက်ကြောင့် ကိုရိုနာဗိုင်းရပ်စ်သတင်းတွေကို ဖြန့်ဝေနေကြတာဖြစ်တဲ့အတွက် အခြေအမြစ်ရှိတဲ့ သတင်းတွေကိုပဲ ယုံကြည်ဖို့ တိုက်တွန်းလိုပါတယ်။ နောက်ပြီး တရုတ်နိုင်ငံက ပြန်လာမယ့်သူတိုင်းကို ကျွန်တော်တို့ မြန်မာဘက်က လိုအပ်တဲ့ စစ်ဆေးမှုတွေ ပြုလုပ်ပြီးတော့ ရှင်းလင်းပြမယ်ဆို အခုဖြစ်နေတဲ့ သံသယတွေ ပပျောက်မယ်လို့ ထင်ပါတယ်။ ဘေးအန္တရာယ်ဖြစ်နေတဲ့အတွက် ကျွန်တော်တို့ အနေနဲ့ သတိထားပြီး စောင့်ကြည့်ရမှာပါ။ အခြေအမြစ်မခိုင်လုံတဲ့ သတင်းတွေ၊ လူစိတ်ဝင်စားအောင် ဖြန့်တဲ့ သတင်းတွေကို သတိထားရမှာဖြစ်ပါတယ်။