ဇန်နဝါရီ ၂၇ ။ ။ အမေရိကန်နှင့် ကိုလံဘီယာတို့၏ ပူးတွဲလေထီးခုန်လေ့ကျင့်မှုတစ်ခုကို ဇန်နဝါရီ ၂၆ ရက်က ကိုလံဘီယာနိုင်ငံတွင် လုပ်ဆောင်ခဲ့ကြောင်း သိရသည်။လက်ရှိကာလတွင် ဗင်နီဇွဲလားရှိ သမ္မတ နီကိုလပ်စ် မာဒူရိုအစိုးရအပေါ် ဆန့်ကျင်ပြီး သံတမန်ရေးဆိုင်ရာ ဖိအားပေးရန် ရည်ရွယ်ကာ အမေရိကန်နှင့် ကိုလံဘီယာတို့အကြား မဟာမိတ် ထူထောင်ဆောင်ရွက်လျက် ရှိသည်။
နိုင်ငံဖြတ်ကျော် ခြိမ်းခြောက်မှု အန္တရာယ်များအပေါ် ပူးပေါင်းရင်ဆိုင်သွားရေး မူဘောင်အရ ယမန်နေ့က အမေရိကန်နှင့် ကိုလံဘီယာ အထူးတပ်ဖွဲ့ဝင်များက အဆိုပါ လေထီးခုန် အထူးလေ့ကျင့်မှုတစ်ခုကို ပူးတွဲလုပ်ဆောင်ခဲ့ကြခြင်း ဖြစ်သည်။
“ ဒီလို ပူးပေါင်း စစ်ရေးလေ့ကျင့်မှုမျိုးက တကယ့်ကို အကျိုးရှိပါတယ်၊ ဒါဟာ ကျွန်တော်တို့ လက်ရှိ ရင်ဆိုင်နေရတဲ့ နိုင်ငံဖြတ်ကျော် ခြိမ်းခြောက်မှုတွေနဲ့ပတ်သက်လို့ ကျွန်တော်တို့အကြား ပိုမို ခိုင်မာစွာနဲ့ တိုးမြှင့်ကာကွယ်သွားနိုင်မယ့် အခွင့်အရေးတစ်ခုကိုပါ ပေါ်ပေါက်စေပါတယ်” ဟု ကိုလံဘီယာ ကာကွယ်ရေးဝန်ကြီး ကားလို့စ် ဟိုလ်မက်စ်က ပြောသွားသည်။
