နေပြည်တော်၊ အောက်တိုဘာ ၁၄ ။ ။ အပြည်ပြည်ဆိုင်ရာ သဘာဝဘေးလျော့ပါးရေးနေ့ အခမ်းအနားနှင့် ဘေးသင့်ဒေသများ ပြန်လည်ထူထောင် ရေးဆိုင်ရာ နှီးနှောဖလှယ်ပွဲကို ယမန်နေ့က နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန-၂ ကျင်းပတွင် ကျင်းပပြုလုပ်ခဲ့ကြောင်း သိရသည်။

အဆိုပါပွဲသို့ တက်ရောက်ခဲ့သော အမျိုးသားသဘာဝဘေး အန္တရာယ်စီမံခန့်ခွဲမှုဗဟိုကော်မတီ ဥက္ကဋ္ဌ ပြည်ထောင်စုသမ္မတ မြန်မာ နိုင်ငံတော်ဒုတိယသမ္မတ ဦးဉာဏ်ထွန်းက ပြီးခဲ့သည့် လများအတွင်းက ရေကြီးရေလျံ မြေပြိုမှုများဖြစ်ပေါ်ချိန်တွင် နိုင်ငံ့ဝန်ထမ်းများ၊ တပ်မတော်သားများ၊ အရပ်ဘက် လူ့အဖွဲ့အစည်းများနှင့် လူသားချင်း စာနာပံ့ပိုးသည့် အဖွဲ့အစည်းများ၊ စေတနာ့ဝန်ထမ်း လူငယ်များက သက်စွန့်ဆံဖျား ကြိုးပမ်းဆောင်ရွက်ခဲ့ကြောင်း ပြောကြားသည်။

ပရဟိတစိတ်ဓာတ် အပြည့်အဝဖြင့် အနစ်နာခံ ကြိုးပမ်းခဲ့သူများနှင့် ရေဘေးသင့်ပြည်သူများ၏ ပူးပေါင်းဆောင်ရွက်မှုကြောင့် အသက်ဆုံးရှုံးမှုများကို နည်းနိုင်သမျှ နည်းစေရန် ကာကွယ်ပေးနိုင်ခဲ့ပြီး စီးပွားရေးထိခိုက်မှု အကျိုးဆက်များ ကိုလည်း နည်းပါးအောင် ကြိုတင် ပြင်ဆင်ပေးနိုင်ခြင်းဖြင့် ကနဦး စိန်ခေါ်မှုများကို အောင်မြင်စွာ ကျော်လွှားနိုင်ခဲ့ကြောင်း ဦးဉာဏ်ထွန်းက ပြောသည်။

ပြန်လည် ထူထောင်ရေး မူဘောင်တစ်ရပ် ဖော်ထုတ်ရန် အခြေခံဖြစ်သည့် ပျက်စီးဆုံးရှုံးမှုတန်ဖိုးနှင့် ရေဘေးသင့်ပြည်သူများ၏ လိုအပ်ချက်များကိုသိရှိနိုင်ရန် ရေဘေးနှင့် မြေပြိုဘေးကာလလွန် လိုအပ်ချက် များ လေ့လာဆန်းစစ်ခြင်းလုပ်ငန်းစဉ်ကို ကမ္ဘာ့ဘဏ်၊ ကုလသမဂ္ဂ၊ JICA နှင့် အခြားမိတ်ဖက်အဖွဲ့အစည်းများနှင့် ပူးပေါင်းဆောင်ရွက်ခဲ့ခြင်း ဖြစ်ကြောင်း ဦးဉာဏ်ထွန်းက ရှင်းလင်းပြောကြားခဲ့သည်။

ပြန်လည်ထူထောင်ရေး လုပ်ငန်းစဉ်အတွက် အရေးကြီးသည့် အချက် ၃ ချက်ဖြစ်သည့် မူဝါဒပိုင်း၊ ဖွဲ့စည်းမှုအပိုင်းနှင့် ဘဏ္ဍာရေး အပိုင်းတို့ကိုလည်း ရှင်းလင်းပြောကြားသွားခဲ့သည်။
ပိုမိုကောင်းမွန်သောစီမံခန့်ခွဲမှုနှင့် ကြိုတင်ပြင်ဆင်ခြင်းသည် အသက်အန္တရာယ်များ၊ ထိခိုက် အနာတရဖြစ်ခြင်းများ၊ စီးပွားရေးအရပျက်စီးဆုံးရှုံးခြင်းများနှင့် ဆောက်အဦပျက်စီးခြင်းများ လျော့နည်းအောင် ဧကန်ပြုလုပ်နိုင်ကြောင်း မြန်မာ့ရပ်ရွာလူထု ဘေးဒဏ်ခံနိုင်စွမ်း တိုးမြှင့်ရေးပူးပေါင်းအဖွဲ့(MCCR)ထံမှ သိရသည်။