ပြည်သူ့ဥယျာဉ်အတွင်း တပ်ချုပ်သား လုပ်ကိုင်ခွင့်ရရှိထားသော လုပ်ငန်းများ

By ချမ်းသာ/Myanmar Now
18 July 2019
ပြည်သူ့ဥယျာဉ်အတွင်း တပ်ချုပ်သား လုပ်ကိုင်ခွင့်ရရှိထားသော လုပ်ငန်းများ
ဗိုလ်ချုပ်မှူးကြီးမင်းအောင်လှိုင်၏သား ဦးအောင်ပြည့်စုံ ပိုင်ဆိုင်သည့် The Yangon Restaurant စားသောက်ဆိုင် (ဓာတ်ပုံ - စိုင်းဇော် / Myanmar Now)

အလုံလမ်းမှသည် နက္ခတ်တာရာပြခန်းရှိရာ ဝင်ပေါက်အတိုင်း ချိုးဝင်သွားလိုက်သည်နှင့် ရန်ကုန်၏ပူလောင်သောဘဝမှ လွတ်ကင်းရာသို့ ရောက်သွားပါသည်။ အေးမြသောအပင်ကြီးများ၊ စိမ်းလန်းသော မြက်ခင်းနှင့်ပန်းပင်များ၊ ကဗျာဆန်လှသော ဝါးရုံပင်တန်းအောက် ကတ္တရာခင်းလမ်းကလေးက မြို့ပြ၏မွန်းကျပ်မှုကို တဒင်္ဂ မေ့လျော့သွားစေနိုင်ပါသည်။

ငြိမ်းချမ်းစိမ်းလန်းလှသော ဒဂုံမြို့နယ် ပြည်သူ့ဥယျာဉ်အတွင်း ပေ ၅၀၊ ပေ ၉၀ ကျယ်သည့် နီစွေးစွေး နှစ်ထပ်အဆောက်အအုံကလေး ရှိသည်။ အရိပ်ရအပင်ကြီးများ၏ အေးရိပ်ကို ခိုလှုံနေသော The Yangon Gallery ဟု ရေးထားသည့် ထိုအဆောက်အအုံလေးက အပြင်မှကြည့်လျှင် ငြိမ်သက်လှသော်လည်း အတွင်းထဲမှာတော့ ဆလိုက်မီးရောင်၊ ကင်မရာမီးရောင်များဖြင့် ပြိုးပြက်လင်းလက်နေသည်။

ဇူလိုင်လဒုတိယပတ်က အမျိုးသမီးဓာတ်ပုံဆရာများ၏ ဓာတ်ပုံပြပွဲတစ်ပွဲကို The Yangon Gallery က လက်ခံကျင်းပနေခြင်းဖြစ်သည်။ ဓာတ်ပုံပညာရှင်များ၊ ပရိသတ်များ၏အလယ်တွင် ရှပ်အကျႌအဖြူ၊ ပုဆိုးနံ့သာရောင် ဝတ်ဆင်ထားသည့် အသက် ၃၀ ကျော်အရွယ် ပြုံးချိုသောမျက်နှာပိုင်ရှင် အမျိုးသားတစ်ဦးက ဧည့်သည်များနှင့် စကားပြောနေသည်။ ထိုသူမှာ ထိုပြခန်းကို ဖွင့်လှစ်လုပ်ကိုင်ခွင့် ရထားသည့် ဦးအောင်ပြည့်စုံ ဖြစ်သည်။

ဦးအောင်ပြည့်စုံသည် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်၏ သားဟု နိုင်ငံရေးလောကနှင့် တပ်မတော်နှင့်နီးစပ်သည့် အသိုင်းအဝိုင်းမှာတော့ သိထားကြသည်။ ၎င်းသည် ထိုပြခန်းအပါအဝင် ဘေးကပ်လျက်ရှိ ရန်ကုန်စားသောက်ဆိုင်၏ ပိုင်ရှင်လည်းဖြစ်သည်။ ထိုပြခန်းနှင့် စားသောက်ဆိုင် နှစ်ခုပေါင်း ၁ ဒသမ ၁၁ ဧကအကျယ်ကို ၂၀၁၃ ခုနှစ် ဒီဇင်ဘာလ ၁ ရက်နေ့မှ ၂၀၄၃ ခုနှစ် နိုဝင်ဘာလ ၃၀ ရက်နေ့အထိ နှစ် ၃၀ လုပ်ကိုင်ခွင့်ရထားသူ ဖြစ်သည်။

ရန်ကုန်တိုင်းဒေသကြီး စာရင်းစစ်ချုပ်အစီရင်ခံစာ (၂၀၁၅-၁၆) အရ စတုရန်းပေအားဖြင့် ၆၀,၀၀၀ ကျယ်သည့် ထိုနေရာတွင် အဆိုပါပြခန်းနှင့်စားသောက်ဆိုင်လုပ်ကိုင်ခွင့်ကို ဦးအောင်ပြည့်စုံက ရန်ကုန်မြို့တော် စည်ပင်သာယာရေးကော်မတီ ပန်းဥယျာဉ်နှင့်အားကစားကွင်းများဌာနထံမှ စာချုပ်ချုပ်ဆို ငှားရမ်းခဲ့ခြင်းဖြစ်ပြီး တင်ဒါဝင်ပြိုင်ခြင်းအားဖြင့် မဟုတ်ဘဲ စည်ပင်ကော်မတီ အစည်းအဝေးဆုံးဖြတ်ချက်အရ ငှားရမ်းခဲ့ခြင်း ဖြစ်သည်။

ထို့ပြင် ၂၀၁၆ ခုနှစ်အတွက် ဒဂုံမြို့နယ်၏မြေငှားရမ်းခကို တစ်စတုရန်းပေလျှင် ၃၉၆၈ကျပ်ဟု စည်ပင်က သတ်မှတ်ခဲ့သော်လည်း ၂၀၁၇-၁၈ ဘဏ္ဍာနှစ်ကုန်သည်အထိ ဦးအောင်ပြည့်စုံသည် ထိုမြေနေရာနှင့် အဆောက်အအုံနှစ်လုံးအတွက် တစ်လလျှင် ကျပ် ၁၀ သိန်းနှုန်းမျှဖြင့် ငှားရမ်းခွင့် ရခဲ့သဖြင့် တစ်စတုရန်းပေလျှင် ကျပ် ၁၆ ဒသမ ၆၆ နှုန်းသာ ပေးခဲ့ရသည်။

ကိုယ်တိုင်လည်း ဓာတ်ပုံဝါသနာရှင်တစ်ဦးဖြစ်သည့် ဦးအောင်ပြည့်စုံသည် ထိုနေ့က ဓာတ်ပုံပြပွဲလာ ဧည့်ပရိသတ်အချို့နှင့် စကားပြောပြီးနောက် ပြခန်းနှင့်ကပ်လျက် ရန်ကုန်စားသောက်ဆိုင်ဘက်ခြမ်း မြေနေရာလွတ်တွင် ရပ်ထားသည့် မော်ဒယ်မြင့် မာစီးဒီး ဖိုးဝှီးအနက်ရောင်ကားလေးဆီသို့ လျှောက်သွားပြီးနောက် ကားကို ကိုယ်တိုင်မောင်းကာ မိတ်ဆွေတစ်ဦးနှင့်အတူ ထွက်ခွာသွားသည်။

 

ဗိုလ်ချုပ်မှူးကြီးမင်းအောင်လှိုင်၏သား ဦးအောင်ပြည့်စုံ ပိုင်ဆိုင်သည့် Yangon Gallery ပန်းချီပြခန်း (ဓာတ်ပုံ - စိုင်းဇော် / Myanmar Now)

အလွန်နည်းသောနှုန်းထား

၁၃၅ ဧက ကျယ်ဝန်းသည့် ပြည်သူ့ဥယျာဉ်နှင့် ပြည်သူ့ရင်ပြင်အတွင်း အငှားချကာ စီးပွားဖြစ်လုပ်ကိုင်ခွင့် ပြုထားသည့် ပုဂ္ဂလိကလုပ်ငန်း ရှစ်ခုရှိသည့်အနက် ဦးအောင်ပြည့်စုံသည်လည်း တစ်ဦးအပါအဝင်ဖြစ်သည်။

တစ်လကျပ် ၁၀ သိန်းဆိုသည့် နှုန်းဖြင့် လေးနှစ်ကျော် ငှားရမ်းခွင့်ရပြီးနောက် ထိုနှုန်းကို ၂၀၁၈ ခုနှစ်တွင် မြို့တော်စည်ပင်က တိုးမြှင့်သတ်မှတ်ခဲ့သည်။ Myanmar Now က ရရှိထားသည့် ဦးအောင်ပြည့်စုံနှင့် ရန်ကုန်မြို့တော်စည်ပင်တို့ ချုပ်ဆိုခဲ့သည့် စာချုပ်တစ်ခု၏မိတ္တူတွင် ၂၀၁၈ ခုနှစ် မတ်လ ၃၁ ရက်နေ့မှ အောက်တိုဘာလ ၁ ရက်နေ့အထိ ကြားခြောက်လဘဏ္ဍာနှစ်ကာလ ‘Yangon စားသောက်ဆိုင်နှင့် ပန်းချီအနုပညာပြခန်း’ အတွက် ငှားရမ်းခမှာ ခြောက်လအတွက် သိန်း ၆၀၀ ကျော်ဖြစ်ပြီး တစ်လလျှင် ကျပ်သိန်း တစ်ရာနှင့်ငါးသောင်း ဖြစ်သည်ဟု ဖော်ပြထားသည်။

စာချုပ်ပါအချက်များအရ အဆောက်အဦနှစ်လုံးမှာ စတုရန်းပေ ၁၇,၀၀၀ ကျော်နှင့် ကားပါကင်မှာ စတုရန်းပေ ၄၂,၄၀၀ ကျော် ကျယ်ဝန်းသည်။

၂၀၁၈-၁၉ ဘဏ္ဍာနှစ်အတွက် ငှားရမ်းခနှုန်းထားမှာလည်း ထိုနှုန်းထားပင်ဖြစ်သည်ဟု စည်ပင်သာယာရေးကော်မတီ စာရင်းတစ်ခုတွင် တွေ့ရသည်။ လာမည့် အောက်တိုဘာလ ၁ ရက်နေ့တွင် စမည့် ၂၀၁၉-၂၀ ဘဏ္ဍာနှစ်အတွက်စာချုပ်ကို အောက်တိုဘာလအတွင်း ချုပ်ဆိုမည်ဖြစ်ပြီး ငှားရမ်းခနှုန်းထားကို ဌာနဘက်က လွန်ခဲ့သောနှစ်လက တင်ပြထားသော်လည်း ဆုံးဖြတ်ချက်၊ ညွှန်ကြားချက်များ ကျမလာသေးကြောင်း ပန်းဥယျာဉ်နှင့်အားကစားကွင်းများဌာန ဦးစီးအရာရှိ ဒေါ်သီတာက ပြောသည်။

ဘဏ္ဍာငွေဆုံးရှုံး

လက်ရှိအာဏာရ NLD ပါတီမှ ရန်ကုန်တိုင်းဒေသကြီး လွှတ်တော်ကိုယ်စားလှယ် တပ်မတော်အရာရှိဟောင်း ဦးကျော်ဇေယျက ၎င်း၏မဲဆန္ဒနယ်မြေ ဒဂုံမြို့နယ်တွင်ပါဝင်သော ပြည်သူ့ဥယျာဉ်နှင့် ပြည်သူ့ရင်ပြင်အတွင်း ဖွင့်လှစ်ထားသော လုပ်ငန်းရှင်များထံမှ မြေငှားရမ်းခကြေးငွေ အလွန် နည်းပါးစွာရရှိသဖြင့် တိုင်းပြည်ဘဏ္ဍာငွေ ဘီလျံနှင့်ချီ နစ်နာကြောင်း လွှတ်တော်အတွင်း တစ်ကြိမ်မက ဆွေးနွေးခဲ့ဖူးသည်။

၀၁၇ ခုနှစ် ဧပြီလ ၂၆ ရက်နေ့ လွှတ်တော်အစည်းအဝေးတွင် ၎င်းဆွေးနွေးသွားချက်အရ ထိုအချိန်တွင် ဦးအောင်ပြည့်စုံ ငှားရမ်းထားသည့် မြေတစ်ဧကကျော်အတွက် တစ်လ ကျပ် ၁၀ သိန်းသာ စည်ပင်ကရရှိသည်ဟု ထည့်သွင်းပြောကြားသွားပြီး ဦးအောင်ပြည့်စုံသည် စာချုပ်ပါအချက်အချို့ကို ဖောက်ဖျက်သည်ဟု ဆွေးနွေးသွားခဲ့ဖူးသည်။

“ရင်ပြင်ဘေးမှာ ကပ်လျက်ဆိုင်ကြီးပါ။ ဒီဆိုင်ကြီးဟာ … နိုင်ငံခြား အရက်မျိုးစုံလည်း ရပါတယ်။ အလွန်လည်း ဈေးကြီးပါတယ်။ နိုင်ငံခြားသားတွေပဲ စားတာပါ။ … ရွှေတိဂုံဘုရားကြီးကိုလည်း မြင်နေရပါတယ်။ ဒါပေမဲ့ အဆိုပါဆိုင်ကတော့ နိုင်ငံခြားသားတွေက ဒီတရားပွဲကြီးနဲ့ ရွှေတိဂုံကြီးကို ကြည့်ပြီးတော့ အရက်တို့၊ ဘီယာတို့ တစိမ့်စိမ့် သောက်နေတဲ့ မြင်ကွင်းကိုတော့ ကျွန်တော် အများကြီး ရင်နာပါတယ်” ဟု ၎င်းက အဆိုပါနေ့တွင် ဆွေးနွေးသွားခဲ့သည်။

ရန်ကုန်စားသောက်ဆိုင်သည် နှစ်သစ်ကူးတရားပွဲများ၊ နေ့ထူးနေ့မြတ် အခမ်းအနားများ ကျင်းပရာ ပြည်သူ့ရင်ပြင်နှင့် ကပ်လျက်မှာပင် ဆောက်လုပ်ထားသည့် တစ်ထပ်အဆောက်အဦ ဖြစ်သည်။ ခမ်းနားသည့် ဥရောပဟန် မော်ဒန်ဗိသုကာလက်ရာဖြင့် တည်ဆောက်ထားပြီး နိုင်ငံခြားသားများနှင့် ငွေကြေးတတ်နိုင်သူ အများစုသာ လာရောက်စားသောက်လေ့ရှိကြသည်။

ရန်ကုန်စားသောက်ဆိုင်သည် စာချုပ်ပါစည်းကမ်းများအရ အရက်ဘီယာ ရောင်းချခွင့်မရှိပေ။ ၂၀၁၈ ခုနှစ် ကြားကာလ ခြောက်လဘက်ဂျက်အတွက် ပန်းဥယျာဉ်/အားကစားကွင်းဌာနနှင့် ဦးအောင်ပြည့်စုံတို့ ချုပ်ဆိုသော စာချုပ်တွင် ‘အငှားချထားခြင်းခံရသူ၏တာဝန်များ’ ဆိုသည့် စည်းကမ်းချက် ၃၃ ချက်ပါပြီး ၁၉ ချက်မြောက် ဖြစ်သော အပိုဒ်ခွဲ (ဓ) တွင် “အရက်၊ ဘီယာ ရောင်းချခြင်းအား လုံးဝ (လုံးဝ) ဆောင်ရွက်ခြင်း မပြုရ” ဟု ပါရှိသည်။

အဆိုပါ The Yangon Restaurant စားသောက်ဆိုင်၏ ဝက်ဘ်ဆိုက်တွင်မူ နိုင်ငံခြားဖြစ် အရက်ပုလင်းပုံများဖြင့် ကြော်ငြာထားသည်ကို တွေ့ရသည်။ အနောက်တိုင်းဟင်းလျာများကို အဓိကထည့်ထားသည့် အစားအသောက်စာရင်းများပါ ဈေးနှုန်းများမှာလည်း အနိမ့်ဆုံး ကျပ် ၁၀,၀၀၀ ကျော်မှ အမြင့်ဆုံး ကျပ် ၉၀,၀၀၀ ကျော်အထိ ရှိကြသည်။ ရေခဲမုန့် တစ်ကော်စာ တစ်ပွဲသည်ပင် ကျပ် ၃,၅၀၀ ဟု တွေ့ရသည်။

Myanmar Nowက ပြီးခဲ့သည့်သီတင်းပတ်က အဆိုပါစားသောက်ဆိုင်သို့ သွားရောက်ကာ ကော်ဖီတစ်ခွက်နှင့် ဘီယာတစ်ပုလင်း မှာယူပြီးနောက် ကျသင့်ငွေ ရှင်းသည့်အခါ ကော်ဖီနှင့် ဘီယာကို ပြေစာတစ်စောင်စီ ထုတ်ပြီး ဘီယာပြေစာတွင် အခွန်တံဆိပ်ခေါင်း ကပ်မပေးလိုက်ပါ။

ဈေးနှုန်းကြီးမြင့်သည့် စားသောက်ဆိုင်လုပ်ငန်း လုပ်ကိုင်နေသော်လည်း မြေ ၁ ဒသမ ၁၁ ဧက ငှားရမ်းခအဖြစ် ဦးအောင်ပြည့်စုံသည် တစ်ဧကအတွက် ကျပ် ၃၀,၀၀၀ ကျော်သာ ပေးရကြောင်း ဦးကျော်ဇေယျက ထောက်ပြသည်။

“အဲဒီတော့ အဲဒီဆိုင်ရဲ့ရောင်းအားက ကျွန်တော်တို့စုံစမ်းကြည့်တဲ့အခါမှာ (ကျပ်) ခုနစ်သိန်းနဲ့ ၁ဝ သိန်း ပျမ်းမျှရှိပါတယ်။ ဒါလေးတွေဟာ အရမ်းနည်းနေတယ်ဆိုတဲ့အကြောင်း တင်ပြတာပါ” ဟု

ဦးကျော်ဇေယျက ၂၀၁၇ ခုနှစ် မတ်လ ၂၈ ရက်နေ့ ရန်ကုန်တိုင်းလွှတ်တော်အစည်းအဝေး၌ ပြောကြားသွားခဲ့သည်။

ဦးအောင်ပြည့်စုံ၏ ရန်ကုန်စားသောက်ဆိုင်သည် နိုင်ငံခြားသား ဧည့်သည်များအကြားတွင် လူကြိုက်များသည့် ဆိုင်တစ်ဆိုင်ဖြစ်သည်။ ခရီးသွားထောက်ကူပြုဝက်ဘ်ဆိုက်တစ်ခု ဖြစ်သည့် Trip Advisor တွင် Review များအရ ရန်ကုန်ရှိ စားသောက်ဆိုင်ပေါင်း ၉၂၀ အနက် အဆင့် ၈၀ ပေးထားပြီး Rating ၅ မှတ်တွင် ၄ ဒသမ ၅ မှတ် ရရှိသည့် ဆိုင်ဖြစ်သည်။ ဆိုင်အတွေ့အကြုံ (Review) ရေးသူ အများစုကလည်း ဆိုင်ကို “Excellent (အလွန့်အလွန်ကောင်း)” ဟု မှတ်ချက် ပြုထားကြသည်။

ဦးအောင်ပြည့်စုံ၏ ရန်ကုန်ပန်းချီပြခန်းသည် အနုပညာပြပွဲများ၊ ဓာတ်ပုံပြပွဲများ၊ စာအုပ်မိတ်ဆက်ပွဲများနှင့် ဆွေးနွေးဟောပြောပွဲများ စသည်တို့ကို ခင်းကျင်းပြသနိုင်သော ပြခန်းတစ်ခု ဖြစ်သည်။ ဓာတ်ပုံပြပွဲတစ်ပွဲအတွက် တစ်ရက်လျှင် ကျပ် သုံးသိန်း၊ ဟောပြောပွဲများအတွက် တစ်ရက်လျှင် ကျပ်ခြောက်သိန်း အသီးသီး ကောက်ယူသည်ဟု Myanmar Now က စုံစမ်းသိရှိရသည်။

ထို့ပြင် ရန်ကုန်စားသောက်ဆိုင် ကားပါကင်နေရာအတွက် သစ်ပင်များလှဲခဲ့ကြောင်းနှင့် ပတ်ဝန်းကျင်ညစ်ညမ်းမှု ရှိကြောင်း ဦးကျော်ဇေယျကဆိုသည်။

“စားသောက်ဆိုင်ဖွင့်တော့ ကားပါကင်ပေါ့ဗျာ။ ကားရပ်ဖို့လုပ်ဖို့နေရာတွေ လာတော့မယ် Customer အတွက်၊ အဲဒီမှာ သစ်ပင်တွေလှဲပါတယ်။ … စားသောက်ဆိုင်တွေ များလာတော့ စွန့်ပစ်ပစ္စည်းတွေကြောင့် ရင်ပြင်ထဲမှာ ရေကြည်သန့်တဲ့ရေမြောင်းတွေဟာ အလွန်ညစ်ပတ်သွားတဲ့ အနေအထားပါ။ ဒါ သူတို့လုပ်ထားတာပါ၊ လမ်းကိုဖောက်ပြီး သူတို့ရေထွက်ထားတာပါ” ဟု ၂၀၁၇ မတ်လ ၂၈ ရက်က တိုင်းလွှတ်တော်၌ ပြောသွားသည်။

Myanmar Now က ရရှိထားသည့် ၂၀၁၈ ခုနှစ် ကြားကာလ ခြောက်လအတွက်ချုပ်သည့် စာချုပ်ပါ စည်းကမ်းချက် ၃၃ ချက်အနက် အပိုဒ်ခွဲ (ဋ) တွင် လုပ်ငန်းဆောင်ရွက်ရာ၌ မြေပေါ်ရှိအပင်ကြီး၊ အပင်လတ်များကို ခုတ်လှဲခြင်းမပြုဘဲ သစ်ပင်ကိုငုံ၍ သို့မဟုတ် ခွကျော်၍ ဆောက်လုပ်ရမည်ဟု ဖော်ပြထားသည်။

မြေငှားခကို အများသဘောတူဆုံးဖြတ်တာလား

Myanmar Now က ရရှိထားသည့် ၂၀၁၈ ခြောက်လဘဏ္ဍာနှစ် စာချုပ်မိတ္တူအရ ဦးအောင်ပြည့်စုံနှင့် ပန်းဥယျာဉ်နှင့်အားကစားကွင်းဌာနတို့ ချုပ်ဆိုသည့်စာချုပ်တွင် ဌာနကိုယ်စားပြု လက်မှတ်ထိုးသည့် ဌာနမှူး ဦးကိုကိုလင်းကမူ ဦးအောင်ပြည့်စုံအပါအဝင် လက်ရှိ ပြည်သူ့ဥယျာဉ်ဝင်းအတွင်း ငှားရမ်းခများ နည်းပါးနေရခြင်းမှာ ဌာနဘက်က အဂတိဖြင့်လုပ်ဆောင်ခြင်း မဟုတ်ဟု ၎င်းက ခုခံပြောကြားသည်။

“ECကို အရင်တင်တယ်။ အဲဒီဟာတွေကို တိုင်းဒေသကြီးအစိုးရအဖွဲ့ကို ထပ်တင်တယ်။ အစိုးရအဖွဲ့က ဒီနှုန်းထားနဲ့ ငှားပါဆိုမှ ကျွန်တော်တို့က ငှားတာ။ ခေတ်ကာလအရကတော့ သူ့ခေတ်ကိုယ့်ခေတ်တော့ မရှိဘူး” ဟု ဦးကိုကိုလင်းက ပြောသည်။

အမျိုးသားဒီမိုကရေစီအဖွဲ့ချုပ်အစိုးရ တက်လာပြီးနောက်ပိုင်း ငှားရမ်းခနှုန်းများ တိုးမြှင့်ခဲ့သဖြင့် ၂၀၁၆-၁၇ ဘဏ္ဍာနှစ်တွင် ပြည်သူ့ဥယျာဉ်အတွင်းရှိ မြေနှင့်အဆောက်အအုံများမှ ငှားရမ်းခပေါင်း ကျပ်သိန်း ၂၅ဝဝကျော်၊ ၂၀၁၇-၂၀၁၈ ဘဏ္ဍာနှစ်တွင် ကျပ် ၁ ဒသမ ၄ ဘီလျံကျော် ပိုမိုရရှိလာခဲ့သည်ဟု ဦးကိုကိုလင်းက ဆိုသည်။ သို့သော် ၂၀၁၆-၁၇ ဘဏ္ဍာနှစ် မတိုင်မီက ရရှိခဲ့သော ငှားရမ်းခစုစုပေါင်းကိုတော့ မဖြေဆိုခဲ့ပါ။

စည်ပင်သာယာရေးနယ်နိမိတ်အတွင်းရှိ မြေနေရာငှားရမ်းခများကို ၂၀၂၀ ပြည့်နှစ်မှစပြီး တိုးမြှင့်ကောက်ခံရန် ပန်းဥယျာဉ်နှင့်အားကစားကွင်းများဌာနက ပြီးခဲ့သည့်မေလက မြို့တော်စည်ပင်ကော်မတီထံ တင်ပြခဲ့ပြီး လက်ရှိတွင် ကော်မတီက သုံးသပ်နေဆဲဖြစ်သဖြင့် ဆုံးဖြတ်ချက်မကျသေးကြောင်း ဦးကိုကိုလင်းက ဆက်ပြောသည်။

နိုင်ငံပိုင်မြေနေရာများကို အငှားချရာတွင် တစ်နှစ်လျှင် ၁၀ ရာခိုင်နှုန်းတိုးရန် စာချုပ်ချုပ်ထားကြောင်း၊ လက်ရှိနှုန်းထားများသည် မြို့တော်စည်ပင်ကော်မတီက သတ်မှတ်ထားသည့် နှုန်းထားများဖြင့် ငှားရမ်းသည့်အတွက် ဘဏ္ဍာငွေ မဆုံးရှုံးကြောင်း ကော်မတီတွဲဖက်အတွင်းရေးမှူး ဦးသန်းက ပြောသည်။

“ဝန်ထမ်းတစ်ဦးတစ်ယောက်တည်းရဲ့ သဘောထားနဲ့ အငှားချထားလို့မရပါဘူး။ ကော်မတီကသတ်မှတ်ထားတဲ့ နှုန်းအတိုင်း ငှားတာဖြစ်တဲ့အတွက် နိုင်ငံတော်လည်း နစ်နာမသွားပါဘူး။ နိုင်ငံတော်လည်း မနစ်နာ၊ လုပ်ငန်းရှင်လည်း လုပ်သာကိုင်သာရှိတဲ့ နှုန်းထားကို ကျွန်တော်တို့က သတ်မှတ်ပေးတာ ဖြစ်တဲ့အတွက် နှစ်ဦးနှစ်ဖက် မျှတတဲ့ဈေးနှုန်းဖြစ်ပါတယ်” ဟု ၎င်းက ပြောသည်။

ယခင်က အလွန်နည်းပါးသော ဈေးနှုန်းဖြင့် ငှားရမ်းခဲ့သည်ဆိုလျှင်ပင် ကာလပေါက်ဈေးနှင့် လိုက်လျောညီထွေဖြစ်အောင် ပြောင်းလဲသတ်မှတ် ကောက်ခံကြောင်း၊ မြေငှားရမ်းခနှင့်ပတ်သက်၍ ကော်မတီကသာ ဆုံးဖြတ်ကြောင်း ဦးသန်းက ပြောသည်။

“အားလုံးကို ကော်မတီမှာတင်ပြီး ဆုံးဖြတ်တယ်။ ဆုံးဖြတ်စရာရှိရင် EC (အမှုဆောင်ကော်မတီ) တင်ပြီးတော့ ဆုံးဖြတ်တာ။ မြို့တော်ဝန်ကြီးတစ်ယောက်တည်း ဆုံးဖြတ်တာမရှိဘူး” ဟု ၎င်းက ပြောသည်။

လွှတ်တော်ကိုယ်စားလှယ် ဦးကျော်ဇေယျကမူ စာချုပ်ပြင်ဆင်ချုပ်ဆိုကာ ငှားရမ်းခတိုးမြှင့်ရေးကို လက်မခံပေ။ တင်ဒါခေါ်ခြင်းမရှိဘဲ စာချုပ်ချုပ်ဆို ချထားပေးခဲ့သည့်အတွက် ဈေးပြိုင်စနစ်ဖြင့် တင်ဒါ ပြန်လည်ခေါ်ယူသင့်သည်ဟု ပြောသည်။

“ကျွန်တော်တို့ အစိုးရတက်လာတော့ တိုးကောက်တယ်။ ကျွန်တော်တို့က တိုးကောက်တာကို လက်မခံဘူး။ (မူလက) တင်ဒါမရှိဘူး။ လက်သင့်ရာ စားတော်ခေါ်ခဲ့တာ။ တင်ဒါပြန်ခေါ်လို့ ဝင်ဆွဲလို့ နိုင်တယ်ဆိုရင် ထပ်ယူပေါ့” ဟု ဆိုသည်။

အစိုးတစ်ရပ်နှင့်ချုပ်ခဲ့သည့် စာချုပ်များကို လွယ်လွယ်ကူကူ ဖျက်၍မရကြောင်း၊ ဦးသိန်းစိန်အစိုးရလက်ထက် အငှားချခဲ့သည့် ပြည်သူပိုင်မြေနေရာများမှ ဘဏ္ဍာငွေပိုမိုရရှိအောင် ပြင်နိုင်သည်များကိုပြင်ရန် ရန်ကုန်မြို့တော် စည်ပင်သာယာရေးကော်မတီ အတွင်းရေးမှူး ဒေါ်လှိုင်မော်ဦးက ပြောသည်။

“ပြန်ပြင်ချင်တယ်ဆိုရင် နှစ်ဦးနှစ်ဖက် ညှိနှိုင်းရပါတယ်။ ကော်မတီအနေနဲ့ တည်ဆဲဥပဒေနဲ့အညီပဲ။ ဥပဒေနဲ့ ကိုက်ညီမှုရှိ၊ မရှိဆိုတာကို ဥပဒေချုပ်ကို အကြံဉာဏ်တောင်းတယ်။ တိုင်းဥပဒေချုပ်နဲ့ မရဘူးဆိုရင် ပြည်ထောင်စုဥပဒေချုပ်ကို တင်တယ်။ အဲဒါကို ကျော်လွန်ပြီး ကျွန်မတို့ ဘယ်ဟာမှမလုပ်ဘူး” ဟု ၎င်းက ဆိုသည်။

ထင်ရှားသည့် ရန်ကုန်တိုင်းလွှတ်တော် ကိုယ်စားလှယ်တစ်ဦးကလည်း စာချုပ်ဖျက်သိမ်းလိုက်ခြင်းကို သဘောမတူပေ။ ထိုသို့လုပ်ပါက အစိုးရအပေါ် ရင်းနှီးမြှုပ်နှံသူတို့က အယုံအကြည်မရှိ ဖြစ်သွားမည်ဖြစ်ကြောင်း၊ မြေငှားခများ သိပ်နည်းနေမနေ စည်ပင်ဘက်က ပြန်လည်စစ်ဆေးရမည်ဖြစ်ကြောင်း တိုင်းလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီဥက္ကဋ္ဌလည်းဖြစ်သည့် ဒေါ်စန္ဒာမင်းက ပြောသည်။

“ဒါပေမဲ့ ပန်းခြံတွေငှားတဲ့အခါ (လုပ်ငန်းရှင်) သုံးတဲ့ ဧရိယာအလိုက် အကုန်လုံးကို ကောက်တာဖြစ်တယ်။ သူတို့ကို အဆမတန်နည်းပါတယ်ဆိုပြီး တိုးကောက်လိုက်ပြန်ရင်လည်း  လုပ်ငန်းရှင်တွေက ပန်းခြံကိုလာလည်တဲ့ ပြည်သူလူထုအပေါ် ဝန်ထုပ်ဝန်ပိုးဖြစ်သွားမှာ။ ဒါကြောင့်မို့ အစိုးရကနေ အများပြည်သူဝန်ဆောင်မှု လုပ်ပေးတဲ့ ဟာမျိုးတွေကျတော့လည်း နိုင်ငံရေးရှုထောင်နဲ့ ကြည့်သင့်တယ်” ဟု ဒေါ်စန္ဒာမင်းက ပြောသည်။

ငှားရမ်းခနှုန်းထားများကို ကော်မတီအဆင့်ဆင့်၏ သဘောတူညီချက်ဖြင့် ဆုံးဖြတ်သည်ဆိုသော ပန်းဥယျာဉ်ဌာနဘက်က အဆိုကိုတော့ ဒေါ်စန္ဒာမင်းက လက်မခံပါ။

“ဘာပဲလုပ်လုပ် အဆင့်ဆင့်တင်ပြပြီးတော့ ဆုံးဖြတ်တာပါလို့ (စည်ပင်က) ပြောတယ်ဆိုပေမယ့် တစ်ဦးတစ်ယောက်ကပဲ ဆုံးဖြတ်လိုက်တာပါ။ ဒီအပေါ်မှာတော့ ကန့်ကွက်တဲ့သူ ဘယ်သူမှ မရှိဘူး။ ကိုယ်နဲ့သက်ဆိုင်ရာ ပိုင်တဲ့ဆိုင်တဲ့သူကပဲ ဆုံးဖြတ်လိုက်ကြတာ။ အောက်ခြေကနေ ထိပ်က ၁၀ ဆင့်လောက်အထိ တင်ပြလည်း ဒီအတိုင်းပဲသွားတာ။ ၁၀ ဆင့်မှာ ၁ဝမျိုး ပြောင်းသွားတာမျိုး မရှိပါဘူး” ဟု ၎င်းက ပြောသည်။

ဦးအောင်ပြည့်စုံသည် Yangon ပန်းချီပြခန်းနှင့် စားသောက်ဆိုင်လုပ်ငန်းအပြင် ဖခင်ဖြစ်သူ တပ်မတော်ကာကွယ်ရေးဦးစီးချုပ် ဖြစ်လာခဲ့သည့် ၂၀၁၁ ခုနှစ်နောက်ပိုင်း ၎င်း သို့မဟုတ် ၎င်း၏ဇနီးအမည်ဖြင့် ရောင်းဝယ်ရေး၊ ဆေးရုံသုံးစက်ပစ္စည်း၊ ဆောက်လုပ်ရေး၊ ဟိုတယ်လုပ်ငန်း စသည့် ကုမ္ပဏီ အနည်းဆုံး ခြောက်ခု ထူထောင်ခွင့်ရခဲ့သည်။

ပြည်သူ့ရင်ပြင်နှင့် ပြည်သူ့ဥယျာဉ်အတွင်း ဦးအောင်ပြည့်စုံ လုပ်ကိုင်ခွင့်ရထားသည့် မြေ ၁ ဒသမ ၁ ဧက ပေါ်မှ စားသောက်ဆိုင်နှင့် အနုပညာပြခန်းလုပ်ငန်းအကြောင်း သိရှိရရန် Myanmar Now က ပထမအကြိမ် ၎င်း၏ဆိုင်တာဝန်ခံမှတစ်ဆင့် ဆက်သွယ်မေးမြန်းသော်လည်း အကြောင်းမပြန်ပါ။

ဒုတိယအကြိမ် ၎င်း၏လက်ကိုင်ဖုန်းကို ဆက်သွယ်၍ Myanmar Now က မိတ်ဆက်သည့်အခါ ဦးအောင်ပြည့်စုံက “ညီလေး အစ်ကိုမဖြေတော့ဘူးနော်” ဟု ယဉ်ကျေးစွာဖြေကြားကာ ဖုန်းချသွားခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required